هوة ده راجل ؟

السلام عليكم ,, ازيك استاذة نيفين ارجو الله ان تكوني بخير ,, مش هطول عليكي انا عندي مشكلة مع جوزي كبيرة وبسببها بعيد النظر في استمرار جوازنا وبفكر في الطلاق بقالي مدة لكن مستنية ردك وبعدها هاخد القرار .. انا اخدت كمان رأي صديقة لية وأختي الكبيرة والأتنين نصحوني بالطلاق .
جوزي من بعد ما اتجوزنا بحوالي سبع شهور قرر انه يسيب شغله وبدون اي اسباب هوة بيقول انا مش حاسس نفسي في الشغل ده وبعمل مجهود كبير والدخل مش مغري .. عايزة اقول لكم ان مرتبه يفتح عشر بيوت لكن الظاهر كدة انه طمعان في اني انا اللي اشيل البيت لاني انا كمان والحمد لله مرتبي عالي وبحب شغلي وعملت فيه انجاز كبير وطبعا مش هعمل زييه واستقيل .. والشئ اللي بيأكدلي على انه عايز يعيش على حس مرتبي انه بدأ في رمي كل مسئوليات البيت علية وهوة مع نفسه قعد خلاص في البيت ومن وقت للتاني يسافر مع اصحابه للرفاهية ومن هناك يقعد يريس علية .. عملتي ايه في الموضوع الفلاني .. البنت دفعتلها القسط التاني ولا لسة .. طيب الشغالة انا مش حابب انها تكون مصرية .. الخ كل العيشة بالمنظر ده فطبيعي جدا انا احس انه بيستغلني وعايز يعيش على قفى جيبي وإحنا على الحال ده يقالنا حوالي سنتين وشوية.. دي المشكلة باختصار .. تفتكري يا استاذة نيفين اطلب الطلاق فعلا ؟! ولا ايه ؟
س . م

فضفضة
محررة الصفحة .. نيفين حجازي
تفتكري انتي .. هوة ده راجل أصلا ؟