رانيا محمد تكتب :مذكرات امرأة فقدت جنينها

مش عارفة ابدأ منين أو اقول ايه.. بس هاعتبر نفسي بأفضفض يمكن الألم النفسي اللي حاسة بيه يخف شوية..يمكن البعض هنا عارف اني كنت حامل..بس يشاء الله ان الجنين يتوفاه الله جوايا وهو في الشهر الرابع.
وكان لابد من عملية لإخراجه عشان انا أعيش. وبما اني في الرياض لوحدي وماما كانت رجعت اسكندرية قبل اللي حصل ب 3 ايام بس.. فكان لازم ناخد قرار اما اني افضل في الرياض وادخل مستشفى واعمل العملية دي أو اني انزل مصر واكون في وسط ماما وبابا واخواتي واهلي.
قررنا اني أنزل مصر افضل رغم الخطورة اللي كانت موجودة في ركوبي طيارة في حالتي دي بس ترتيب ربنا كان الحمدلله ميسر حكاية النزول والحمد لله ترتيبه دايما خير.
رجعت مصر والحمد لله عملت العملية امبارح، وحاليا أنا في مرحلة النقاهة زي ما بيقولوا . مش عارفه اوصفلكم احساسي بس هو زي الصورة الرمزية بالظبط حاسة ان قلبي اتكسر.. ومع ذلك حمدت الله وشكرته.. ما فيش أي اعتراض مني أو من جوزي على قضاء الله وقدره لانه هو من اعطى وهو من اخذ وله الحمد سبحانه.. لكن قلبي مفطور طبيعي زي قلب كل ام بتحب جنينها من اول ما تعرف انه جواها.. حب الهي ربنا بيحطه في قلب الام عشان تقدر تستحمل أي تعب أو الم في سبيل انها تشوف البيبي ده..
كنت بدأت اهدأ نفسيا شوية لكن لما جابوه وغسلوه وكفنوه ونزلوا يدفنوه كأن حد جاب سكينة وغرزها في قلبي من اول وجديد.
ادعولي ربنا يربط على قلبي بالصبر عشان اقدر اعيش.
منقول عن موقع محاورات المصريين