اجعلي حبك له في النور

نفسي بجد تردوا عليّ، أنا عندي 19سنة وزميلي عنده 20 سنة، إحنا بنحب بعض من فترة المراهقة؛ بس الحمد لله حبنا فضل معانا ودماغنا كبرت، وهو جه اتقدم فى البيت وكلم ماما وبابا؛ بس المشكلة إننا في حقوق، وهو عاد أول سنة وأنا عدت تاني سنة والكلية دي بجد ربنا يرحمنا منها، يعني هو لسه قدامه حبة عشان يخلص دراسة؛ بس هو بيشتغل الحمد لله وبيتعب والله عشاني كتير، وبيعاملني كويس، وحاسة إني لو ربنا كتبنا لبعض هنبقى مرتاحين إنشاء الله.
المشكلة بقى إني حاسة إن فيه حاجة غلط، حاسة إننا طول ما إحنا مش مخطوبين، مش من حقي حتى أشوفه ولا يكلمني مثلا على طول على الموبايل والحاجات دي الحمد لله إحنا طول فترة ال 4 سنين دي إحنا ما عملناش أي حاجة تغضب ربنا، ولا مسك إيد ولا الحاجات دي، وهو كمان لأن هو بيحترمني وبيخاف عليّ زي أبويا.
ردوا عليّ بالله عليكم. اللي أنا فيه ده صح ولا غلط، هو فاكر إني عاوزة أبعد عنه عشان سقط أول سنة بس، والله باخاف من ربنا أوي وخايفة أعمل حاجة صغيرة تزعّل ربنا مني انصحوني بالله عليكم.
ن.ص