فراج وفيديو: خالد جلال وقهوة سادة وش السعد علينا.

"محمد سلام" و"محمد فراج", أو الثنائي "فيديو" و"فراج", على طول كنت بشوفهم في مسرح الجامعة, ثنائي كوميدي جامد جدا, انضموا لورشة خالد جلال في مركز الإبداع, وبعد كده ظهروا هما الاتنين مع الأحمدين "حلمي" و"مكي", وتألقوا بشكل جميل،رحنا قابلناهم في الأوبرا، وبعد ما اعتذروا لنا عن التأخير عشان البروفة طولت وماكنوش عاملين حسابهم, دار بيننا الحوار ده.
كنا في الجامعة على طول نسمع عن "فيديو" و"فراج".. إيه حكاية "فيديو" دي؟
فيديو: أنا اسمي "محمد سلام" بس كان عندي نادي فيديو وأنا في ثانوي عشان كده طلع عليا اسم "فيديو".
طب وايه حكاية الثنائي الرهيب "فيديو" و"فراج"؟
فيديو: (وهو يضحك) قول إنت يا فراج عشان أنا بشرب الشاي.
فراج: (يضحك) ماشي يا سيدي, أنا و"فيديو" طلعنا مسرح تجارة في نفس السنة، وكنا بنقعد مع بعض كتير في مسرح الجامعة.. وكان باين علينا إننا متفاهمين وقريبين من بعض, عشان كده فكرنا نعمل ثنائي كوميدي, والحمد لله كان ناجح جدا أيام الجامعة.
فيديو: واتعرفنا هناك على شباب محترمين جدا, وقابلنا هناك الأستاذ "حسين محمود" اللي بنعتبره (الأب الروحي) لمسرح الجامعة, اتعلمنا منه كتير جدا ومش هننساه طول عمرنا، كانت أيام جميلة، اتعلمنا فيها إزاي نحب بعض ونجتهد في شغلنا.
دي كانت البداية, تجربتكم مع "حلمي" و"مكي" حصلت إزاي؟
فراج: طبعا لازم نشكر أستاذ "خالد جلال" ومسرحية "قهوة سادة" اللي كانت وش السعد علينا, من خلالها اتشافت أنا و"فيديو" واترشحنا لنفس الدورين مع "أحمد حلمي" و"أحمد مكي".
إحساسكم إيه بعد ما اشتغلتم مع نجوم شباك؟
فيديو: مبسوطين, لأن ده قصّر علينا طرق كتيرة جدا.
فراج: إحنا اتشافنا من خلال النجوم دي, ودي مسئولية كبيرة لازم نكون قدها.
كانو بيتعاملوا معاكم إزاي في التصوير؟
فيديو: أحمد مكي ده محترم جدا, وابن بلد جدع, وعشان تعب لحد ما وصل للي هو فيه, بيعاملنا كويس جدا, زي ما كان نفسه يتعامل وهو في بدايته, كان بيقعد معايا ويحط لي إفيهات, وكمان يفكر إزاي الإفيه بتاعي يكون أحسن ويضحك الناس, وكان بياخد رأينا في حاجات كتير وده دليل على التواضع بتاعه.
وحلمي كان عامل إيه معاك يا فراج؟
فراج: بص, أنا كنت مرعوب رعب غير طبيعي, أحمد جلال مخرج ليه وزنه, وأحمد حلمي نجم محبوب جدا, وفكرة إني أعمل درو صديقه في الفيلم، كانت مخلياني خايف قوي, بس في أول يوم تصوير، الناس كانت بتعاملني بطريقة محترمة جدا, شفت قد إيه هو وأحمد جلال متفاهمين جدا في الشغل, وقد إيه أحمد حلمي متواضع جدا ومش تنك أبدا, كان بيعاملني زي مايكون أخويا بالظبط, ديما يسأل عليا ويدردش معايا, وكمان كان بيظبط معايا الإفيه، ويقولي ارميه ماتخافش, وشفت فيه حاجة مهمة جدا, وهي إن لو الممثل اللي قدامه مجتهد وبيتعب في دوره, هو هيخدمه بعنيه في كل حاجة, لكن لو الممثل مش مجتهد, هو هيفرمه في التمثيل.
بعد نجاح الفيلمين قلتوا لبعض إيه؟
فيديو: كنا فرحانين لبعض قوي وتقريبا قلنا لبعض نفس الكلام.
فراج: أحلى حاجة إننا طلعنا المسرح في سنة واحدة, واشتغلنا مع بعض كل حاجة, حتى الدورين كنا مترشحين ليهم مع بعض, والفيلمين نزلوا في نفس الموسم ونفس اليوم.
بعد قد إيه ممكن نشوفكم في بطولة مطلقة؟
فيديو: لازم نتبهدل الأول قبل ما نعمل ده, عشان نستوي ونوسع قاعدة حب الناس لينا.
فراج: فعلا.. أنا أحمد حلمي قال لي حاجة مهمة جدا, قال لي( أول ما تلاقي الناس عارفاك بالاسم, وبتناديك في الشارع, ابدأ اترعب واعرف إنهم مستنيينك).
نشر في شهر9 سنة 2009 من مجلة كلمتنا