أمين "الديمقراطى الاجتماعى" للثوار: التصويت ب"نعم" انتقام من الإخوان وليس "فوتوشوب".. وعلينا مراجعة أخطائنا

قال أحمد فوزى، الأمين العام للحزب الديمقراطي الاجتماعى، إن ما حدث أمس الأربعاء هو تصويت عقابي ضد الإخوان، داعيًا الغاضبين فى التيار الديمقراطى من النتائج بالتعامل معها على كونها حقيقة وليس فوتشوب ومراجعة أخطائهم بدلا من التشكيك في النتيجة.
وقال فوزى في تدوينة له على "فيس بوك": "إنت ممكن ميعجبكش اللى حاصل.. ممكن تبقى رافض الدستور.. ممكن تكون حاسس إن ده انقلاب.. ممكن تكون متعاطف مع الإخوان أو ممكن تكون قلقان من اللى جاى أنا قلقان مثلا .. إنما تتصور إن اللي حصل اليومين اللي فاتوا فوتوشوب.. وإن محدش نزل وإنك متفهمش إن ده تصويت عقابى ضد الإخوان؟.
وأضاف: "تبقى زيك زى الإخوان متفرقش عنهم ويبقى قدامك حاجة من الاتنين يا تهاجر لأن الناس فى البلد دى حتبقى معفنة من وجهة نظرك.. يا تبقى عارف إن فيه أخطاء ارتكبتها إنت وغيرك خلت الناس اللى ممكن تقتنع إنها تقول لأ بمنطقك إنت مش كتير وإنك ملكش تأثير ودى حقيقة علشان تبنى نفسك وتصلح".
وأوضح فوزى أنه يوجه حديثه لرفاقه في التيار الديمقراطي والثوري وليس للإخوان أو المتعاطفين معهم قائلا « أنا مش بتكلم عن الإخوان أو المتعاطفين مع التيار الإسلامى.. لأ عن رفاقى من التيار الديمقراطى والثورى اللي مش حاسين باللي حصل».
وتابع «الناس فى حاجة لمراجعة مواقفها وخطابها ولغة حوارها علشان متخسرش كل حاجة طلعنا بيها من يناير.. إنما عايز تتريق على النتيجة إنت وراحتك حتعمل زى الإخوان وتقول ده جابوا راقصين قدام اللجان إنت وراحتك».
وقال فوزي « امبارح الإخوان انهزموا شعبيا.. ودور الناس استغلال ده ومقاومة أي اتجاه ياخد الناس دى فى سكة فاشية تانية غير الفاشية الدينية.. الاختبار الأول هو انتخابات الرئاسة اللي حيقاطع أو يقول لا يمثلنى ويشتم المرشحين كلهم يبقى البقاء لله.. وبعدين انتخابات برلمان بتحالفات معقولة تسمح بوجود ناس عاقلة والناس بقى تدخل أحزاب تعمل أحزاب تعمل نقابات تشتغل على أى حاجة غير إنها تتريق وتنكت وتندب.. أو تسكت خالص».