أمين الديمقراطي الاجتماعي لرفاقه الثوار: ما حدث تصويت عقابي ضد الإخوان وليس فوتشوب.. وعلينا مراجعة أخطائنا

أحمد فوزي: لو تصورت إن اللي حصل اليومين اللي فاتوا فوتوشوب.. ومحدش نزل تبقى زيك زى خرفان الاخوان والعساكر
فوزي: نحن فى حاجة لمراجعة مواقفنا وخطابنا ولغة حوارنا علشان منخسرش كل حاجة طلعنا بيها من يناير
قال أحمد فوزي الأمين العام للحزب الديمقراطي الإجتماعي إن ما حدث أمس هو تصويت عقابي ضد الإخوان ودعا الغاضبين من النتائج من التيار الديمقراطي بالتعامل معها على كونها حقيقة وليس فوتشوب ومراجعة أخطائهم بدلا من التشكيك في النتيجة.
وقال فوزي في تدوينة على فيسبوك أنت ممكن ميعجبكش الى حاصل ممكن تبقى رافض الدستور ممكن تكون حاسس ان ده انقلاب ممكن تكون متعاطف مع الاخوان أو ممكن تكون قلقان من الى جاى أنا قلقان مثلا .. انما تتصور ان اللي حصل اليومين اللي فاتوا فوتوشوب.. وان محدش نزل وانك متفهمش ان ده تصويت عقابى ضد الاخوان تبقى زيك زى خرفان الاخوان والعساكر متفرقش عنهم و يبقى قدامك حاجة من الاتنين يا تهاجر لان الناس فى البلد دى حتبقى معفنة من وجهة نظرك يا تبقى عارف ان فيه أخطاء ارتكبتها انت وغيرك خلت الناس اللي اممكن تقتنع انها تقول لأ بمنطقك انت مش كتير وانك ملكش تأثير و دى حقيقة علشان تبنى نفسك وتصلح.
وأوضح فوزي إنه يوجه حديثه لرفاقه في التيار الديمقراطي والثوري وليس للإخوان أو المتعاطفين معهم قائلا « أنا مش بتكلم عن الإخوان أو المتعاطفين مع التيار الاسلامى لأ عن رفاقى من التيار الديمقراطى والثورى اللي مش حاسين باللي حصل».
وأضاف «الناس فى حاجة لمراجعة مواقفها وخطابها ولغة حوارها علشان متخسرش كل حاجة طلعنا بيها من يناير انما عايز تتريق على النتيجة انت وراحتك حتعمل زى الاخوان وتقول ده جابوا راقصين قدام اللجان انت وراحتك».
وقال فوزي « امبارح الاخوان انهزموا شعبيا.. ودور الناس استغلال ده و مقاومة أي اتجاه ياخد الناس دى فى سكة فاشية تانية غير الفاشية الدينية.. الاختبار الأول هو انتخابات الرئاسة اللي حيقاطع او يقول لا يمثلنى و يشتم المرشحين كلهم يبقى البقاء لله وبعدين انتخابات برلمان بتحالفات معقولة تسمح بوجود ناس عاقلة و الناس بقى تدخل احزاب تعمل احزاب تعمل نقابات تشتغل على اى حاجة غير انها تتريق وتنكت وتندب.. أو تسكت خالص»