إنت بتعرف تبعد عني

إنت بتعرف تبعد عنى
وأنا مش بعرف ليه؟
أنت بتقدر تنسى حنينى
وقلبك بتقسّيه!
ليل ونهار دايماً بفتكرك
واشغل بالى عليك
وإنت بتقوى عليّا فى عز
ما قلبى اتعلّق بيك
وبحاول اقرّب واوصلك
وانت فى عالم تانى
شاغل بيها على طول نفسك
دايماً وبتنسانى
طب ماحاولتش ليه تقرّبلى
لمّا شعورك خانك؟
وعرفت ان اللى انت اختارته
مهوش مخلوق علشانك
ليه مادتش لنفسك فرصة
تقرّب أكتر ليّا؟
ليه مسمعتش دقات قلبى
وانت عنيك فى عنيّا؟
ليه اخترت البَرّ تملّى
وانا غرقانه فى حبك؟
ومفكرتش يوم تنقذنى
وانا ضايعة وباندهلك!
ليه محستش بكل مشاعرى
اللى انا وهباها لقلبك؟
يمكن علشان قلبك عارف
ان انا هفضل جنبك
والا عشان متأكد إنى
بكل مشاعرى بحبك....
أيوة بحبك هنكر ليه
وانا عايشة العمر عشانك
لما بشوفك نظرة عينك
بتشبّعنى حنانك
واسمع صوتك بيزلزلنى
وأتوه لما تكلمنى
لمسة إيدك بتحسسنى
انك يا حبيبى مالكنى
راجع علشان اسمع منّك
والا عشان تسمعنى
أسأل قلبك
شوف هيقولك
إيه قبل ما تظلمنى
عيد حساباتك واعرف مين
يا حبيبى الباقى عليك
واعرف مين يستاهل قلبك
ويعيش مخلص ليك