جورج عزمي هو واحد من أكثر الناس شهرة في مقدمي ما يسمى بالستاند آب كوميدي في مصر وله عرض مشهور بيتكلم فيه أن كل ما يقعد مع حد مهما كان شغله أو دوره في المجتمع يكلمه عن الشعب المصري ويقول بص يا أستاذ ( أصل هو الشعب المصري ده كده ) ( ما هو يا بيه عيب الشعب المصري أنه ..) ( دي بأه مشكلة الشعب المصري ) وكأن الشعب المصري ده ناس تانيه غيري وغيرك وكويس أوي أن أحنا أتجمعنا النهاردة عشان نشوف حكايته ايه !! مش هقول زي الناس دي وأقول أن أنا مستغرب من الشعب المصري لأني بطبيعة الحال مصري والحمدلله ومبسوط على فكرة مش متأزم يعني !! لكن هقول أن في ناس مصريين معرفش هما مين ..يمكن يكون أنا أو أنت ,أخويا أو أخوك ,أبويا أو أبوك ..بيسخروا طول الوقت من الشعب المصري بطريقة عجيبة جدااا. عند إعلان نتيجة المرحلة الأولى من انتخابات مجلس الشعب الحالية وظهور مؤشرات بفوز حزب الحرية والعدالة وحزب النور بأغلبية المقاعد تبادل مستخدمي الفيس بوك وتويتر جملة ( الشعب المصري اختار حزب الحرية والعدالة وحزب النور على الرغم من أن ايرادات فيلم شارع الهرم حققت المركز الأول في ايرادات أفلام العيد ) وهو ما يدل على شئ عجيب بأنفسنا ..شويه نقول على نفسنا أحسن ناس في الدنيا وشويه نقول أن أحنا نعاني من أزمات نفسية وعقد مالهاش آخر والغريب أن أوقات بيبقى فيه فخر بأننا ( تافهين أوي ) وأوقات زعل من أننا صحينا وفوقنا وهو شئ يدعو للخجل الحقيقة لأن ده بينقلني لحاجة تانية خالص !! لما الجيش هجم على اعتصام مجلس الوزراء بحجة أن اللي هناك دول وحشين وبلطجية وأشكال ضالة – حب البلد بيعيش لما يموت الجوع – وقام عساكر من الجيش المصري بسحل فتاة واتضح بعد ذلك أنها طبيبة واتعرت الفتاة – اتعرت مصر- ظهرت النخوة الغير المحسوبة ..الغير مدروسة .. الغير سياسية .. من شباب مصري طبيعي شافوا أن في البنت دي ممكن تكون أخته أو أمه أو مراته ظهرت فيديوهات وأحاديث وتصريحات بأن ( النخوة مواسم ) طيب لو النخوة مواسم يبقى اللي ثار وهددد بحرق الكنائس بتاعت إمبابة موسمي برضه – زي المشمش – كده . النخوة يا عزيزي شئ كده ربنا بيخلقه جوه الأنسان الراجل اللي بحق وحقيق بتظهر فجأة من غير حسابات ولا تفكير, عمرك ما هتحس بنار اللي جوه الثائر الحق طول ما أنت – مأنتخ – وعاوز الدنيا تمشي كده على مزاجك ,لو اللي شوفته من جرائم ارتكبت في حق البنات دي على مرأى ومسمع من العالم واتعلقت في ديل شماعة المؤامرات والأصابع اللي لامؤاخذة خ...فيه يبقى أنت محتاج تراجع نفسك شويه عشان الرجوله مش مواسم بجد !! كلمة أخيرة وبالبلدي كده رغم اعتبار لغة المقال لدى البعض – ركيكه- ومش فصحى وعامل زي كلام القهاوي ..الخلاصة جواك أوعى تصدق غير أخوك ابن أمك وأبوك ..أوعى تصدق سيدك اللي عاوز يضرب ويجرم ويحرم وتوطيلوا بكيفك ,عمر بلدنا ما هتكون لينا غير بإيدينا ..سيبكوا من الناس اللي بتقول ضهري وسندي ..الضهر لو محني عمره ما يرفع راس ... كلمتين أبرك من عشرة للخال الأبنودي : احنا ولاد الكلب الشعب.. احنا بتوع الأجمل و طريق الصعب و الضرب ببوز الجزمة و بسن الكعب والموت في الحرب لكن انتوا خلقكم سيد الملك جاهزين للملك إيدكم نعمت من طول ما بتفتل و بتفتل ليالينا الحلك انتوا الترك.. واحنا الهلك سواق حكمته صاحب الملك أنا المسجون المطحون اللي تاريخي مركون وانت قلاوون و ابن طولون و نابليون الزنزانه دي مبنيه قبل الكون قبل الظلم ما يكسب جولات اليوم