محمد الصبان : مش احنا خلاص .. أكيد حد تاني !

" شاب " سايق عربيته وبيسمع أغنية في الراديو .. وهو في غمرة نشوته بالأغنية افتكر أيام كتير جدا ، شريط طويل عدى في لحظات أو دقايق أو ساعات ، يمكن معيار الزمن العادي كان غايب ، سرح كتير وافتكر كتير ..
عيل صغير مش فاهم هو ايه اللي بيحصل ليه احنا بنحاول نهرب بعربية في دروب الصحرا .. صدام احتل الكويت ولازم نرجع بلدنا .. هنرجع بلدنا بعربية ؟؟!! الأهل 24 ساعة قدام نشرات الاخبار .. الأمريكان بيحرروا الكويت وبيضربوا العراق .. راكب تاكسي وشاف النيل .. ايه الجمال دة .. مصر حلوة أوي يا بابا بس انا عاوز بقة أرجع عشان مدرستي وأصحابي ..
بلدنا حلوة .. وبنكبر فيها بس فيه حاجات مش عاجبانا .. ايوة كتيييير أوي .. سمعت شريط عمرو دياب الجديد؟ .. الشاب مامي شرايطه بقت تنزل بالكلمات مكتوبة ! .. المعمورة في التسعينات ! .. وسط البلد بعد الساعة 1 بالليل ليلة راس السنة .. صغير أوي وانت واقف قدام باب جامعة القاهرة أول يوم دراسة فرحان انك داخل الجامعة وبقيت ملو هدومك .. وعالم كبير وجديد بيبدأ .. طموح كبير وعين بتلمع .. نشاطات وتأسيس اسر وندوات ونقاشات واساتذة كبار بيحبوك ونظرة للمستقبل كبيرة كلها أمل ..
مظاهرات وأعلام فلسطين وصور القدس والإشتراكيين والتيار الإسلامي .. اسرة حورس والحزب الوطني .. أول حجر شيشة وأول علبة سجاير ..
بلدنا بتظلمنا واحنا شبابها .. احنا المفروض نكون أملها وسندها وأحلامها .. فاكر الظابط اللي شتمك بالأم والأب ولا فاكر امين الشرطة اللي كان واقف بيسترزق من قوت سواقين الميكروباص كل يوم الصبح وانت رايح الجامعة .. طيب فاكر لما كان ييجي وينزل الركاب كلهم وياخد الميكروباص هو وزمايله والسواق يبص ويضحك قال يعني مش متضايق .. طيب فاكر اول خطبة ليك وسط مظاهرة وأول مرة تهتف بصوت عالي ..
أيوة احنا أمل البلد دي احنا عاوزين نصلحها ونغيرها .. يااااه عندنا أحلام كتير وأمال كبيرة .. فاكر مشاريعنا الصغيرة ونقاشاتنا على القهوة وفي بيوتنا .. انا عازمك عالغدا عندي .. قال يعني كبير وبعزم بقة .. والست الوالدة تعمل أكل ونقعد قال يعني بنذاكر .. واحنا كنا بنتخانق .. ايوا بنتخانق في التاريخ اللي بندرسه .. وفي التربية الوطنية ومنهجها .. ونتخانق على عبد الناصر والسادات وكامب ديفيد والقرآن والخلافة والدين واللحية ..
طيب فاكر حركة "كفاية" فاكر اول انتخابات ورايح كلك أمل قال يعني هتدي صوتك .. أيمن نور .. فاكر البديل .. والدستور .. فاكر مقال " إنك ميت " طيب فاكر 6 إبريل ..
أيوة احنا شباب البلد دي اللي هنحقق الحلم ونبنيها من جديد .. ايوة مش هنسكت أكتر من كدة .. فاكر 25 يناير فاكر صحتنا كانت غريبة ازاي .. كنا بنتحرك ازاي ..
طيب فاكر النار في عز البرد في صينية ميدان التحرير .. فاكر خطاب مبارك بتاع لم اكن أنتوي .. فاكر دموع اليأس والأمل .. أيوا احنا الشباب اللي لازم نبني البلد ونغيرها .. أومال مين يعني .. إذا ماكنتش بلدنا تتسند علينا احنا شبابها هتتسند على مين ..
طيب فاكر صفعة استفتاء 19 مارس والدستور أولا .. وفاكر الإخوان ومش هنرشح حد ومشاركة مش مغالبة .. فاكر محمد محمود ومجلس الوزرا .. طيب فاكر مرسي وشفيق ؟! فاكر ولا مش فاكر؟
والأغنية شغالة في الراديو .. أغنية لعمرو دياب في التسعينات بعدها مد ايده في تابلوه العربية ولقى نفسه بيشغل سي دي " ناقص حتة " وجيه عزيز ..
ايوا فاكر .. هو فاكر حاجات كتير كدة ليه ؟! هو الذكريات كتير أوي كدة ليه ؟! هو انا عايش بقالي أد ايه ! النهاردة عيد ميلادي … أوبا .. عيد ميلادي .. هو انا لسة بقول ايه ؟؟!! هو انا هفضل لغاية امتى بقول أيوا احنا .. هو احنا لسة احنا ؟! احنا نسينا في وسط الزحمة ان الشباب بيخلص زي أي حاجة .. وان العمر بيجري .. وان قربنا أوي نقول لأ
لأ مش احنا خلاص .. أكيد حد تاني غيرنا