محمد خالد : يا مصر قومي و شدي الحيل

طول عمري متعطش لأي معلومة جديدة.و علشان كده كنت من الأطفال القلائل اللي لازم تتفرج على نشرة الأخبار كل يوم.و متابعة الاخبار هواية زادت عندي لما إتعرفت على الأنترنت. و خصوصا إني عشت فترات طويلة برة بلدي و الأنترنت كان الوسيلة السريعة و المتوفرة طوال الوقت للوصول الى الحقيقة دائما عما يجري وراء البحار.
و تمر السنين و تقوم الثورة في مصر. وانا مش فيها. تخيل كده اليوم اللي كنت مستنيه طول عمرك و ضحيت بحاجات كتيرة علشانه يجي وانت مش موجود؟ فكانت مشاعر الفرح الشديد مختلطة بأحاسيس الحزن الشديد.الأولى لأن مصر تحررت و الثانية لأني مش هناك.
و يظل الأنترنت وسيلة إتصالنا الوحيدة بمصر. ولا يعلم أحد مقدار الرعب الذي عشنا فيه بالخارج عندما قطعت الحكومة الانترنت في مصر. و خصوصا أن أخر رسالة سمعتها كانت للأستاذة اللي زعلانة مني بدون سبب و مابتكلمنيش نوارة نجم و هي بتصرخ على الجزيرة يوم الاربعاء الأسود بليل (ألحقونا هايموتنا كلنا) . كمية الخوف اللي صابتني و أصابت غيري كانت كفيلة بموتنا جميعا بأزمات قلبية عندما أنقطعت الأخبار فجاءة من مصر.
و بعد الثورة أصابتني لأول مرة حالة غريبة و لأول مرة و هي القرف من الأخبار. فالأول مرة أظل أسبوعا كاملا بدون تويتر ولا حسابي كناشط حقوقي على الفيسبوك. و عدت كل يومين أو أكثر محاولا قراءة الأخبار فأصاب بالأحباط من أول خبر فأبتعد سريعا لمتابعة المواقع الرياضية العالمية فقط وليس حتى العربية كي لا أصاب بأحباط أكثر.
فمن بين خبر البيه بتاع غزوة الصناديق الى قطع السلفيين لأذن قبطي في الصعيد إلا مظاهرات ضباط الشرطة الى أحد أسوء الأخبار كما صنفته في العشر سنين اللي فاتوا و هو قانون تجريم الاحتجاجات. لا أريد الحديث عن هذا القانون الذي مهما كانت تفسيراته أعطتني أحساسا أننا لم نفعل شئ و لم يمت لنا شهداء ولا ضاع من عمرنا سنين إلا في سبيل حرية الرأي و التعبير. أهم بنود حقوق الإنسان وضع له قانون لتجريمه بعد ثورتنا للتحرر. ليه عايزين الواحد بعد كل ده يرجع يقرا أخبار؟
عارف يا مصر أنها مرحلة و هاتمر. أي مريض بيعمل عملية حالته بعد العملية بتبقى أسوء من قبلها.و محتاج فترة طويلة من التأهيل. يصاب المريض فيها بنكسات سودة من النوع اللي يطلع ميتين (أسلافه) بس هايرجع يقوم و يخف و يبقى أحسن من الأول. ماتخفيش يا مصر من السلفيين و المتشددين في الناحيتين و الحرامية و الأنتهازيين. الناس دي طول عمرها شغالة في الضلمة و طلعوا في النور فجاءة. هاينكشفوا واحد واحد. دول زي الخفافيش ما بتعشي الا في الضلمة.
ولادك و عمالك و طلبتك .رجالتك و ستاتك فاقوا و عرفوا فين الصح.و أكمن السكة جديدة عليهم هايتوهوا شوية و كل واحد يقولهم خش يمين و التاني خشوا شمال و لأ مش من هنا دي الناحية التانية.الطريق هايطول عليهم بس هايوصلوا.و أوعي تصدقي اللي بيقولك دي عملية بسيطة و الأشعة بعد أسبوعين. دانت بتغيري موتور و شاسيه و ابنك الصنايعي هايعملك من جديد. الصبر عليه ده بيحبك قد عنيه.
و ماتخافيش عليا.أنا لسه واخد بالي منك و متابع أخبارك و بسأل عليكي. ولا عمري حاجة هاتشغلني عنك. مش لاقي غير كلام عم نجيب اللي واحشني جدا و ماشفتوش بقالي زمان و صوت الشيخ أمام و هو بيقول:
يا مصر قومي وشدي الحيل
كل اللي تتمنيه عندي
لا القهر يطويني ولا الليل
آمان آمان بيرم أفندي
يسعد صباحك يا جنينة
يسعد صباح اللي رواكي
يا خضرا من زرع إيدينا
شربت من بحر هواكي
شربت من كاس محبوبي
وعشقت نيل أسمر نوبي
وغسلت فيه بدني وتوبي
وكتبت إسمه على جلدي
آمان آمان بيرم أفندي
الفيديو : http://www.youtube.com/watch?v=o2lTs4tWnVY