"الشربيني" ل"البديل": ثابت الأحق بخلافة حمدي.. والظلم وراء احتقان علاقة الأهلي والقناة

يعتبر المعلق الرياضي أحد أهم الوسطاء ما بين الأحداث والناس ، فقد تخطى دوره وصف مباراة في كرة القدم ، ليصبح شاهدا على بعض الوقائع التي تحدث داخل المستطيل الأخضر ، وكم من معلق حفر إسمه في ذاكرة المشاهدين ، لدرجة أن يكون سببا لكي تتابع المباراة ، حتى وإن لم يكن فريقك المفضل أحد طرفيها، وفي الفترة الأخيرة كان موسما ل" هجرة المعلقين " إلى القنوات العربية والخاصة، بعد توقف الدوري المصري والنشاط الرياضي بشكل عام، وربما سعيا وراء شهرة أكثر وربح أسرع.
"ميمي الشربيني" يعد أحد أفضل المعلقين الرياضيين في تاريخ الرياضة المصرية والعربية بشكل عام, ودائما ما اتربطت الأحداث الرياضية الكبرى باسمه, وكان سببا في تعلق الملايين برياضة كرة القدم، بصوته المميز وتعليقاته الفريدة, ومصطلحاته التي حفرها بصوت من ذهب في ذاكرة كل عاشق لكرة القدم.
ولكن شيخ المعلقين المصريين وأحد نجوم الجيل الذهبي للنادي الأهلي في حقبة الستينيات قد ابتعد عن الساحة في الوقت الحالي برغم كثرة القنوات والبطولات والمباريات ،وكان ل"البديل" معه هذا الحوار المطول والشيق, والذي كشف من خلاله العديد من الأمور, وأبدى رأيه في الكثير من الأمور الإدارية والفنية على الساحة الرياضية المصرية والعالمية.
وإليكم نص الحوار ....
*لماذا ابتعدت عن التدريب واتجهت إلى التعليق؟
-هو التدريب والتعليق كانا سويا في البداية، يعني دربت فترة وتوليت قطاع الناشئين في النادي الأهلي ثم سافرت دربت في الامارات، وأرى مهنة التدريب مهنة عظيمة جدأ وتقدر تقول "مهنة البحث عن الاحتراق" والمدرب يشبه إلى حد كبير مخرج السينما بيكون عايز الممثلين يعملو الدور بشكل معين، كما المدرب يرسم خطة وعايز اللاعبين ينفذوها بشكل معين، وهذا قمة الاستمتاع بالنسبة للمدير الفني وهو شايف فرقته فائزة في النهاية.
لكن أنا عشقت التدريب والتعليق وفي النهاية كان اختياري التركيز في التعليق.
* أين أنت من التعليق الآن؟
- أنا كنت بفضل التعليق في التليفزيون المصري، ومكنتش عامل تعاقد مع أي قناة فضائية، بس للأسف تلفزيون الدولة مش بيوفر الإمكانيات الفنية ولا المادية للمعلق علشان يستمر .
آخر مباراة علقت عليها في التلفزيون من سنتين ولحد دلوقت مخدتش أي فلوس، وده اللي مخلي كل المعلقين المصريين يتجهوا للقنوات العربية الخاصة والقنوات الفضائية زي الكابتن "محمود بكر" اتجه للقنوات الخاصة علشان مش لاقي التقدير الجيد من تلفزيون الدولة.
* من هو المعلق المفضل لديك؟
- الكابتن لطيف ده كان فاكهة التعليق ووالدتي رحمها الله كانت بتحبه جدا.
* هل توجد عروض فضائية خلال المرحلة المقبلة؟
والله هو في عروض في قنوات عربية مشهورة زي الجزيرة وغيرها بس أنا ظروفي الخاصة لا تسمح بالسفر المستمر ،وأفضل التواجد في مصر وفي كلام مع بعض القنوات الفضائية المصرية زي "القاهرة والناس" و"النهار" المفاوضات شغالة والفترة المقبلة هشوف الأفضل.
* لماذا توجه المشاهد المصري للقنوات الفضائية؟ والسبب وراء ندرة المعلقين الموهوبين خلال الفترة الماضية؟
-أنا شايف إن المعلق يشبه إلى حد كبير المطرب، ممكن تلاقي مطرب بيقول كلمات حلوة بس صوته مش حلو ومطرب تاني صوته حلو بس مش بيقول كلمات تتسمع، المعلق كده بالظبط لازم يكون صوته حلو يتسمع ويقول كلمات ومعلومات تخطف المشاهد يعني زي ما بقول دايما "ياخد الودن من العين".
* رأيك في الكرة المصرية ..
الكرة هي الكرة في العالم إحنا بنمر بأزمة لكن نستطيع أن ننهض وننافس بدليل أن لاعبين مصريين خرجوا احترفوا في الفترة الأخيرة زي صلاح وجدو ونجحو مع فرقهم، مصر مليئة بالمواهب بس احنا محتاجين تخطيط وتنظيم ورعاية علشان نقدر ننافس دول العالم اللي سبقونا بسنوات في عالم الساحرة المستديرة.
انا عرضت على الكابتن صالح سليم رحمه الله قبل وفاته خطة لاكتشاف المواهب الصغيرة في أقاليم مصر كلها بس هو رفض وقتها.
*من هو أفضل فريق في بطولة الدوري هذا الموسم؟
نادي الزمالك فاجأ الجميع هذا الموسم المدرب البرازيلي فارق كتير مع الفريق، بس نرجع ونقول إن دي بذرة حسام حسن وتعبه مع القلعة البيضاء لأن حسام هو اللي اكتشف الولاد الصغيرين دول زي محمد إبراهيم وعمر جابر.
ولاول مرة من سنين بنشوف الزمالك مش فريق النجم الواحد يعني متقدرش تقول إن اللاعيب ده هو اللي بيكسب النادي في جماعية في الأداء.
بس أداء الزمالك تراجع في الفترة الأخيرة وده أمر طبيعي بيحصل في العالم كله مفيش فريق بيمشي بأداء ثابت، والأهلي رغم النقص اللي بيعاني منه إلا أنه بيكسب وجاي في الطريق.
* مع اعتزال "الزئبقي" محمد بركات؟
- كل الناس ليها نهاية بس محمد بركات يستطيع أن يواصل في الملاعب ويكمل, ده لاعيب زي ما كل الناس بتقول "زئبقي" يقدر يرقص أي حد ويعدي ويفوت انا بطلق عليه "لاعيب البلاي ستيشن" حجم بركات وعدم زيادة وزنه يخلوه في الملعب كام سنة تاني.
* من أفضل لاعب كرة قدم مصري حاليا؟
- تريكة .. بس فين أمير القلوب بتاع زمان، دلوقتي هو يقدر يخلص بس ميعملش التابلوه بتاع زمان، أنا شايف إن كان في نجم أنا بعتبره بعد ليونيل ميسي ورونالدو هو شيكابالا بس مش محافظ على نفسه، إنما لو قلت في الدوري المصري هيبقى محمد إبراهيم لاعب الزمالك "بس هو محتاج علقة كل يوم".
* تتوقع انتقال محمد صلاح للريال أو البارسا ؟
- صلاح محتاج وقت لأن الناس في أوروبا مش بتقيّم اللاعيب بمباراة أو اتنين، وتكوينه الجسماني يمنعه إنه يكون رأس حربة وينافس النجوم الكبار في الدوري الأوروبي، يعني معندوش خيارات غير إنه يكون صانع ألعاب وهو لاعيب رائع بيعرف يفوت ويعدي بس لسه شوية عليه.
* عودة اللاعبين المعارين للنادي الأهلي مجددا سيعيدون بالأهلي لمستواه المعهود؟
- مفيش شك كلهم لاعبين كبار وأصحاب خبرات ومهارات يستطيعوا أن يصنعوا الفارق.
* حظوظ الأهلي والزمالك في البطولة الإفريقية؟
- انا كنت أفضل عدم تواجد الفريقين في مجموعة واحدة، بس أتوقع أن يصعد الفريقين عن المجموعة والذهاب إلى الدور نصف النهائي، ونشوف نهائي مصري إفريقي زي بطولة أوروبا.
* وماذا عن حظوظ منتخب مصر الأول في تصفيات كأس العالم 2014؟
- كبيرة جدا وتكاد تصل إلى 90%
* رأيك في منتخب الشباب وأبرز نجومه؟
- منتخب الشباب ظروفه صعبة جدا، وشايف إن ربيع ياسين مظلوم مفيش فترة إعداد كويسة، يعني ربيع من المدربين اللي ممكن يضحي بأي حاجة بس يشوف فرقته بتكسب، أما بالنسبة لأبرز نجوم الشباب هما كلهم كويسين بس أنا مش شايف نجم في المنتخب وينقصهم الخبرات.
* تتوقع أن يحقق منتخب الشباب نتائج إيجابية في بطولة العالم المقبلة بتركيا؟
-اه طبعا نقدر نحقق مركز كويس وننافس، بس أهم حاجة يكون في فترة إعداد كويسة للفريق ده.
* تعليقك علي رحيل البدري عن الأهلي قبل نهاية الموسم؟
-هو أكيد في مشاكل والدليل إن البدري في الفترة الاخيرة الكاميرا جايباه زعلان علطول، الراجل شايف إنه متقدرش كويس من النادي ومن حقه إنه يشوف مستقبله .
*هل اختيار لجنة الكرة لمحمد يوسف قرار صائب؟
-مكانش قدامهم خيار تاني، يوسف المدرب الوحيد اللي اشتغل مع جوزيه والبدري في الفترة الأخيرة، وهو قريب من اللاعبين وعارف مشاكلهم كويس ويعرف يتعامل مع كل واحد فيهم.
*من أفضل مدير فني أجنبي درب في مصر؟
-من وجهة نظري هيديكوتي، مدرب ذكي جدا في إدارة المباراة من خارج الملعب.
*من هو أفضل مدير فني مصري حاليأ؟
- شوقي غريب.
* ترشح مين لخلافة حسن حمدي في الأهلي؟
- "عصام ثابت" .. علشان ده راجل أعمال يقدر يصرف على النادي ويدخل استثمارات ، وليس شرطا لرئيس النادي إنه يكون لاعب كرة قدم.
*أفضل لاعب كرة قدم أجنبي احترف في مصر؟
-إيمانويل أمونيكي.
* أسباب الصراع الأزلي بين جماهير القناة والنادي الأهلي؟
- في تراكمات من الماضي وجماهير الإسماعيلي والمصري والسويس مش بيحبو الأهلي ولا الزمالك بس يمكن الأهلي أكتر علشان هما شايفين إن الأهلي هو العملاق وهو المتحكم في المسابقات المحلية وواخد بطولات كتير، بالإضافة إلى شعبية النادي الأهلي.
والشعور إن في مجاملات من إتحاد الكرة للأهلي وانحياز من الحكام جعل جماهير القناة شايفه إن الأهلي "فتوه" أو "فرعون" فالشعور إن كل الأندية بتلاعب الفرعون ده تسبب في كراهية داخل الجماهير.
بالإضافة إن كان في لاعيب كرة قدم في النادي المصري كان زيه زي الخطيب في الأهلي وهو" الضظوي" ده راح الاهلي وجماهير بورسعيد انقلبت وقتها ازاي يروح الأهلي، يمكن دي الأسباب من وجهة نظري.
ماهو أفضل دوري في أوروبا؟
- كان زمان الدوري الايطالي مليء بالمواهب واللاعبين الكبار، دلوقتي الدوري الإنجليزي فيه أفضل نجوم العالم بس مفيهوش المتعه اللي بيحبها المشاهد المصري اللي تلاقيها في الريال والبارسا علشان كده أنا أفضل الدوري الإسباني.
* لمن تريد أن توجه كلمة؟
-أكيد للمسئولين عن الرياضة المصرية والعامري فاروق، ياريت يكون في إعادة نظر في قانون انتخابات الأندية، يعني أنا شايف إن الانتخابات تكون على مقعد الرئاسة زيها زي انتخابات رئاسة الجمهورية، ومن حق الرئيس هو اللي يختار الأعضاء اللي يشوف إنهم هيخدمو مصلحة النادي ويكون في بينهم انسجام.
* وما كلمتك للجماهير المصرية؟
- متعة كرة القدم أن تجد المدرج مليان بالجماهير على أخره، أتمني إن روابط الألتراس تراجع نفسها وتلتزم بالتشجيع المثالي علشان نتفرج على كورة حلوة.
- شيكابالا بين أفضل 3 لاعبين في العالم
- حسام حسن وراء نهضة الزمالك
- محمد إبراهيم عايز "علقة" كل يوم
- الفراعنة في المونديال بنسبة 90%