لم يختلف كثيراً حال زوار ياللاكورة عن حال كل جماهير الأهلي التي صبت جام غضبها على حسام البدري المدير الفني للفريق بعد التعادل أمام شبيبة القبائل الأحد في إستاد القاهرة الدولي. واستقبل Yallakora.com بعد المباراة الآلاف من التعليقات على جميع الأخبار المتعلقة بها، وكانت معظمهم هجوم على البدري، والمطالبة برحيله، مع وجود بعض التعليقات القليلة من بعض الزوار طالبت بالهدوء والصبر على المدرب حتى نهاية الموسم. وفيما يلي بعض ما جاء في تعليقات زوار Yallakora.com بعد المباراة: في البداية اعترف "عبدالرحمن" بخطئه عندما ساند البدري في بداية توليه مهمة الأهلي، حيث قال " يا جماعه لا اخفي عليكم اني في البدايه كنت مع البدري ولكن للاسف كنت غلطان و قولت قبل كده نصبر عليه لكن لاسف برده كنت غلطان مش هقول علي ضعف مستوي البدري في المباره وانه معرفش يتعامل معاها ولا انه لم يستغل الطرد اللي حصل ولكن شوفت تصريحاته بعد مباره الشبيبه الاولي في الجزائر قال ايه الاهلي كان الافضل والاخطر طول المباره، ياراجل حرام عليك بجد ده الاعمي كان شايف ان الاهلي كان مضغوط في المباره وان اللاعيبه كانت بتجري (هبلولي) مش العيب انك تغلط لكن العيب انك تستمر في الغلط، ارجوكم كفايا البدري علشان بالاسلوب ده مش هنكمل في البطوله وشكرا". أما "غازي" فأعترف بأن البدري مدرب جيد، ولكنه لا يصلح مديرا فنيا، مضيفا "البدري ليس له أي فكر نهائياً .. وتغييراته في منتهى العشوائية .. نفسي أعرف .. هو محمد فضل ده بيلعب بواسطة ،، هو متمسك بيه قوي ليه كده رغم إنه مش موفق .. ليه يضيع شوط بحاله معاه .. وبعد كده منزل أسامة حسني ،، اللي هو أساساً ما بيجريش .. إزاي رغم إن الماتش واضح جدا إنك لازم تعتمد على السرعة لإنهم شباب وسراع جدا جدا ..وطول الماتش عمال يتكلم مع هادي خشبة وكأنه بيشهده على اللعيبة .. بدل ما يتكلم مع اللعيبة نفسها ويوجههم .. يا حسام يا بدري .. خد بعضك من سكات . واتكل على الله". البحث عن "الجمل التكتيكية" ويرى "باسم" ان البدري يفتقد لصناعة الجمل التكتيكية في فريقه، بالإضافة لعدم قدرته على إدارة المباراة، وقال "مشوفناش منك جملة تكتيكية بتتلعب في الملعب تبين ان فيها فكر ولا حتى تغيير يبين انك بتفهم كرة أصلا في حين لو رفعت عينك لأي واحد من الجمهور اللي وراك هيقولك تغير مين وتنزل مين وعلى فكرة كلامنا دا مش عشان ماتش امبارح بس احنا مجيبناش أجوان عليها القيمة من أول الدوري وكمان معاهم بطولة أفريقية كلها أجوان في الزحمة من عند ربنا عشان الجمهور مايزعلش وعشان اسم الأهلي كبير إنما انت بجد اللي عمله جوزيه في سنين انت هتضيعه في سنة وياريت يا أخي ما تكمل والله بجد كفاية حرقة دم جوزيه وحسن شحاته كانو سبب في رفع مستوى الكرة المصرية وانت وحسام حسن هتنزلوها لسابع أرض إرحمنا يارب". لك الاختيار.. ولنا النتائج وبعنوان "لك الاختيار.. ولنا النتائج" قال "أيمن أبوزيد" في تعليقه على البدري " مع كامل احترامنا لحقك الأصيل كمدير فني في اختيار العناصر التي تلعب بها .. فهذا لا يهمنا يا كابتن حسام .. ما يهمنا هو نتاج اختيارك فقط فنحن القلب النابض للنادي وأحد أضلع منظومة النادي الأهلي ولنا كل الحق فب ابداء آراءنا .. فأنت حتى الآن لم تثبت تشكلك خاصة في الهجوم .. كما أنك تصبر كثيرا على أي لاعب غير موفق .. مش عيب أني أغير العنصر الغير موفق العيب اني أكابر وانتظر منه ما لا يقدر على إعطاؤه لي .. مثل اللاعب محمد فضل الذي أبقيت عليه نصف مباراة اليوم وقبلها مباراة الكأس مع حرس الحدود وتأتي بلاعب لم يلعب منذ فترة وتقوم بحرقه مثل اينو أو أسامه حسني أو حتى فرانسيس الذي دائما ما يكون خارج الخدمة .. تصر على استبعاد لاعبين موهوبين أمثال سعيود ومن قبله حسين ياسر .. لن نسألك لماذا دائما تستبعد عفروتو وسعد سمير وتوبة وعلاء شعبان ..برغم هبوط مستوى بدلاؤهم في أوقات كثيرة .. كابتين حسام لن نسألك إلا عن النتائج فالمؤشر يتجه لأسفل منذ بداية الدور الثاني من الموسم الماضي .. كابتن حسام فلتصلح أخطاءك إذا كنت معترف أن لديك أخطاء .. أما إذا كنت تصر على أنك صح في كل شئ فاخرج علينا في قناة الأهلي موضحا وجهة نظرك علنا نكون مخطئين في حقك .. كابتن حسام انت واحدا منا ممن أحبوا النادي الأهلي وممن أعطوا له من عمل ولعب أو تشجيع أرجوك أن تراجع نفسك وتعمل لصالح الفريق حتى لو كان ذلك بتركك مهمة التدريب إذا كنت لست قادر .. والله الموفق". مدرب فقير اعتبر "Mohamed" البدري مدرباً "فقيرا فنيا" مضيفا "مع الأسف لا داعى من التمثيل بدور الشهيد و تقول انك مسئول علشان تسكت الناس مع الاسف انت مدرب فقير فنيا و سؤال السنه دى كان فيه فى الاهلى احمد فتحى حسام عاشور شهاب احمد حسن و اشتريت حسام غالى محمد شوقى عبد الحميد شبانة 7 لاعيبه خط وسط مدافع هل فكرت تدور على صانع العاب بديل لمحمد بركات او ابو تريكه اللى قدم كل اللى عنده خلاص ولا هو بنشترى و خلاص عندك بديل لسيد معوض ووائل جمعه، حسام البدرى رجاء ارحل بهدوء". وسأل "mody" البدري عن الثلاثي الأجانب في الفريق ولماذا لا يستفيد منم الفريق، وقال"وبعدين هو فين فرانسيس وسعيود وغدار، هو احنا جبناهم ليه وازاي البدري اختارهم او وافق عليهم مادام مش هيستفيد منهم، ليه الاهلي مفيهوش جودوين وديفونبيه وبابا اركو ولا هما بيلعبوا في اندية أكبر من الاهلي، ياريت الاهلي والبدري يعيدوا النظر في اللاعبين الاجانب في الفريق، كفاية سامسرة بقى، وياريت تمشي يابدري". تدخل إدارة الأهلي وخاطب "mahmoud" إدارة الأهلي مطالبا برحيل البدري ، قائلا "ان الأوان يا مجلس الادارة يجب بسرعة التحرك نحو ايجاد مدرب اكثر نفعا للأهلي من المدرب الحالي قبل فوات الآوان. الاهلي كسب الدوري السنة الماضية من البداية عندما كانت الاندية في سبات عميق. ثم خسر الكأس والسوبر ، ويترنح في بطولة افريقيا. لماذا الانتظار ؟؟؟". أما "رامي" فرأى ان ما يحدث مع البدري الان هو خير من قال في السابق ان جوزيه كان يفوز لأنه يملك نجوما في فريقه، وأردف " ادي البدري معاه لاعيبه اقوى من اللي كانوا مع جوزيه وبيخسر. البدري كان لازم ياخد عشره اتناشر سنه تدريب قبل ما يمسك النادي الاهلي ، يا جماعه ده اول فريق يدربه في حياته مش ممكن الاداره فاكره انه عشان بس اسم النادي الاهلي هايفوز". الرأي الأخر ورأى عدد أقل ضرورة الصبر على البدري، ومن بين هؤلاء، قال "bibo" انه يجب الصبر على البدري، وتابع "انا شايف اننا نصبر شويه ونديله فرصه لاخر البطوله طيب لو كنا فزنا ياترى كنا هنقطع فيه كده ولا كنا هنقول ده بطل انا معاكم ان البدرى عنده نواحى قصور كتير اخطرها انه مش بيعرف يقرأ المباراة وتغيراته مش بيكون لها مفعول بس ياترى لو مشى دلوقتى الاهلى هياخد بطولة افريقيا ؟؟؟ اري انه ياخد فرصته فى البطوله دى والدور الاول من الدورى وساعتها نحاسب همش هو ده اللى فرحنا بيه لما لعب بشكرى وهاب وقولنا انه مش بيكرر خطأ جوزيه فى قتل ابناء النادي من الصغار". ولم يختلف رأي "محمد" كثيراً عن رأي "bibo" حيث قال "هو البدرى ضيع بطولات ايه ضيع الكاس بس وده ياما ضاع من جوزيه صح ولا لا والدورى خدناه قبلها بثلاث ماتشات والله البدرى كويس مش وحش وكل فريق بيكسب ويخسر ياناااااس حرااااااااام والله الماتش ده كان بيفكرنى بنهائى البرسا والانتر دفاااع 90 دقيقه حرام عليكم". وفي الختام وبنبرة تفاؤل، طالب "atef" بالهدوء خلال الفترة المقبلة، قائلا " اطالب الجميع بالهدوء وخصوصا محبي النادى الاهلى انا فعلا حزين لتعادل الاهلى ولكن احب اطمانكم الاهلي ان شاء الله بطل افريقيا وهيفوز على النهائي على الترجى التونسي وان شاء الله تبقوا تفتكرو كلامى، واحب ان اطالب جماهير النادي الاهلي بالصبر على البدرى وعدم مهاجمتة لأنه مازال امامة فرصة التاهل للمربع الذهبي وهو ايضا ما زال يحتاج الى خبرات عديدة ودفعة معنوية من جماهير النادى . وان شاء الله الاهلى بطل افريقيا". شارك برأيك.. هل تؤيد رحيل البدري عن الأهلي أم الأبقاء عليه؟ انضم إلى جروب ياللاكورة على الفيس بوك وشارك برأيك ومواضعيك انضم إلى صفحة محبي ياللاكورة على الفيس بوك وشارك برأيك ومواضعيك تابع أخبار ياللاكورة على تويتر
