بغض النظر عن أداء المنتخب المصرى فى كأس الأمم.. لازم نقف مع «نفسنا» شوية... نقف مع المنظمة «الكروية» فى مصر.. ونحاول نعالج الملامح المُشوهة لصورة «الكرة فى مصر» إيه هدف «الأندية» من نشاط الكرة فيها؟؟ ليه بيصرفوا كل الملايين ديه على اللاعيبه وعلى مرتباتهم؟؟ وفين المنتخب الوطنى من خريطة الكرة المصرية؟؟ الأسئلة بديهية بس الإجابات صعبة وتحديدها محتاج تركيز كبير.. مثلاُ يعنى لما الأهلى ولا الزمالك ولا أى نادى يدفع بتاع 10 مليون فى لاعب؟؟ طيب هايعمل إيه باللاعب ده؟ ولما يبيعه هايعمل إيه.. فى أفريقيا، وبمناسبة كأس الأمم، نلاقى الدول الضعيفة اقتصادياً.. الهدف الأساسى من المنظومة الكورية هو تخريج أكبر عدد ممكن من اللاعبين للاحتراف فى أوروبا..اللاعب الواحد بيخرج ب 10 آلاف دولار أو 20 ألف دولار، والنادى بيشترط نسبة من قيمة بيع اللاعب لأى ناد آخر.. يبقى الهدف عندهم واضح هو تحقيق أكبر ربح مادى من بيع اللاعبين للأندية فى أوروبا.. طيب تعالى عندنا فى مصر.. أتحدى أى حد يقول لى إيه الهدف من اللعبة عندنا.. خد عندك مثلاً عمرو زكى والزمالك.. كان بسهولة كبيرة جدًا ممكن الزمالك يكسب رقم خيالى لو باع اللاعب فى يناير اللى فات لما جالوا عرض مقابل 11 مليون استرلينى من أستون فيلا.. المبلغ ده يعادل تقريبا 100 مليون جنيه.. ممكن الزمالك يبنى بيهم استاد ولا يحل بيهم كل أزماته المادية لمدة عشر سنين لكن لأن ما فيش هدف واضح العملية باظت.. دلوقتى عمرو خد من الزمالك تقريباً 3 مليون جنيه فى بداية الموسم الحالى وجه الزمالك خد 400 ألف استرلينى لما اللاعب انتقل على سبيل الإعارة يبقى المحصلة تقريبًا زيرو الزمالك لم يستفد أى شىء من بيع اللاعب، أو الفايدة المالية ضعيفة. وطالما بنتكلم عن أهداف المنظومة الكروية.. يبقى لازم نسأل نفسنا ونسأل الجماهير.. الأولوية لمين المنتخب ولا النادى؟؟.. مثلا عندك فى مصر فى جماهير مش مهم عندها على الإطلاق مصلحة المنتخب..أهم حاجة إن لاعيبة ناديها تبقى كويسة ولو واحد لا قدر الله تعرض لإصابة مع المنتخب بتبقى كارثة كبيرة، والجهاز الفنى للمنتخب بيتعرض لانتقادات حادة لو اختار لاعيبه من الأهلى أكثر من الزمالك أو العكس يعنى. فى الآخر.. كأس الأمم الأفريقية الحالية، هاتكون نهاية المشوار لأكثر من لاعب من نجومنا فى المنتخب.. المرحلة الجاية نتمنى نشوف وجوه جديدة فى الدورى المصرى تكون قادرة على سد الفراغ.. نتمنى نشوف 20 لاعب زى وائل جمعة «صخرة» الدفاع اللى أعلن اعتزاله.. نتمنى نشوف لاعيبه متميزين فى المسابقة المحلية.. تقدر تجيب لنا لقب كأس الأمم فى البطولة اللى جاية إن شاء الله فى الجابون وأثيوبيا.. واللى بعدها كمان فى ليبيا بإذن الله.. قولوا يااااااااااااااااااااااااااااااااااارب.
