سارة عثمان تكتب: جواب إلى شهيد.. اخترت اللي يجيب حقك

يسعد مساك يا.. صحيح هو أنت اسمك ايه أنا نسيت اسألك.. أصلا يوم ومكان ما قابلتك مكانش عاطفي بالمرة.. اصل طيب
يعني بذمتك ينفع حد يقابل حد في المشرحة و كمان بالليل ؟ بس تقول ايه بقى ظروف البلد هي اللي حتمت علينا كده ان ولادها بدل ما يتقابلوا في النوادي والجنين يتقابلوا في المشارح والمقابر وسين 28.. المهم يعني يسعد مساك.. صحيح هو انتو عندكو دلوقت الصبح ولا بليل بتوقيت الجنة ؟ هو أصلا فيه ليل عندك ؟ تلاقي الدنيا على طول منورة وطراوة ما شاء الله مش بحسد يعني .
المهم انت طبعا مش عارفني أنا سارة اللي دخلت شفتك يوم استشهادك أيام محمد محمود الاولى في المشرحة بعد ما كان اهلك مش راضيين ادخل وقلت لهم أنا بس عاوزه أوصل صوتكو للناس.. راح والدك الله يكرمه واخدني من ايدي وقال لي ادخلي ودخلت ومن ساعتها وانت بالنسبة لي صاحبي واخويا اللي لا شافني ولا عرفني .
أنا جيت النهاردة اقول لك أنا رحت انتخبت آه انتخبت و حاولت أختار رئيس لمصر رئيس بحق وحقيقي يعني مش اراجوز أو لعبة . رئيس زي اللي بنشفهم دول في فرنسا وامريكا والدول اللي ربنا رحمها من الطغاة .
اصلا بقى ايه راجعة من الشغل هلكانه وتعبانه بس كنت راجعه بدري شوية فقلت بالمرة اروح انتخب علشان بكرة أبدأ شغلي من بدري ..رحت اللجنة يا سيدي يا لهوك يا .. بقول لك ايه أنا هاسميك أمير علشان مقعدش اقول يا.. وخلاص .. لقيت بقى يا أمير اللجنة يا لهوك زحمة جدا جدا وأنا اصلا مسحولة طول اليوم في متابعة الانتخابات .. ف اتسحبت كده وركنت جنب باب المدرسة وقلت ه اقول للظابط أنا صحفية وهيدخلني بقى . ما البني ادم مننا مش ملاك يعني وفي اوقات كتيرة بالذات أما بيكون تعبان بيحاول يصيع على نفسه ويقنعها ان اللي بيعمله ده صح . المهم يعني لقيت الظابط بينادي على شوية ستات وبنات وبص لي رحت قلت: " ايوه بقى" و دخلت يا سيدي وعملت فيها عبد ربه التايه .
أول ما دخلت لجنتي على ايدك اليمين كده كان فيه مسرح بتاع مدرسة كلية السلام الثانوية التجريبية المسرح كان اسمه "مسرح الشهيد عمرو غريب" ومكتوب تحته تاريخ استشهاده 2/2 / 2011 موقعة الجمل. قلت بس دي علامة تانية تأكد لي اني ماخنتش دم الشهيد زي ما بعض المجانين بيقولوا اننا بمشاركتنا هانخون دمكم !! طيب يا امير بذمتك ده كلام ؟ يعني أما كنا نقاطع ونسيبها بيضة مقشرة للفلول كان دي هاتبقى مش خيانة .
سيبك... دخلت واختارت اللي شفت انه اقرب حاجة لي وليك ولمعظم اللي ماتوا أنا مش هاقول لك طبعا أنا اخترت مين أنا مش جايه أحاول أؤثر عليك أو أوجه الناس لعبد المنعم ابو الفتوح لا سمح الله .. أنا جيت بس اقول لك الف شكر أنك انت وآلاف غيرك خليتوني أنا وملايين غيري نوصل للخطوة دي . يمكن يكون التوقيت مش صح ولا ظرف وقوعنا تحت حكم العسكر صح ولا الاختيارات اللي موجودة قدامنا هي أفضل اختيارات بس ادي الله وادي حكمته .. كل اللي اقدر اقوله لك اني حاولت ويا رب اكون ما خذلتكش انت ولا اصحابك اللي معاك دلوقت .
عارفة انه كانت ممكن الدنيا تبقى ألطف من كده وكان ممكن الانتخابات تتم في ظروف أحسن من كده لو كنا فضلنا كلنا يد واحدة ماتفرقناش وبقينا عشرين فصيل وميت جبهة وبناكل في بعض وبنخون في بعض وبنهاجم بعض لكن تقول ايه محدثين ثورات والشيطان دخل بينا وقدامه شوية على ما يخرج ادعي لنا وانت بتصلي ربنا يهدينا تاني ويرجعنا يد واحدة....كل اللي اقدر اعمله دلوقت اني اطلب منك تدعي لنا ربنا يرحمنا ويغفر لنا وتسامحنا إذا كنا قصرنا في حقك انت واصحابك ويارب نكون أحسنا الاختيار وماخذلناكمش
ملحوظة :
. سلامي الخاص لمينا دانيال وعمك الشيخ عفت والدكتور علاء عبد الهادي الراسل
سارة عثمان
Comment *