"فيس توك.. فيس بوق" سنيه ومحروس أون لاين!

"يخرب بيتك يا سنيه على بيت اليوم اللي عرفتك فيه".. جملة بقيت بكررها في بالي كل ما زمارة القطر تخنقني.. مش عارف اشم نفسي..
أول ما آجي انزل الشغل اسمع الموشح اليومي بصوت جهوري ولا صوت الجاموسه.."اوعى تتأخر..بطل رغي مع اصحابك بعد الشغل..تخلص شغلك الساعه 2..2 وخمسة تبقى قدامي هنا تديني التمام.."
أقول لها: "يا سنيه انا على ما اقف واخد الميكروباص فيها ساعه، " تروح شاخطه فيا.." هس ولا كلمه، لوقلت كلمه زياده مفيش غدا، ولا زودت كلمه تانيه مفيش عشا!!" طبعا رحت صارخ فيها.."تمام يا فندم!!"
آجي بعد المغرب واحاول اهرب عشان أقعد مع اصحابي ع القهوه فأقولها "مش عاوزه عيش يا سنيه؟".. تروح شاخطه فيا كالعاده.."لا مش عاوزه، م الآخر مفيش نزول لأصحابك اللي ع القهوه ومن بكره مفيش نزول خالص، والطلبات تشتريها وانت راجع من الشغل فاهم ولا.." طبعا رحت رادد بسرعه.."عارف عارف..مفيش غدا ولا عشا.."
سنية ع الفيس توك
الله يكرمه مسعود زميلي في المصلحه قال لي ع الحل " شوف يا حلاوه.. مفيش أحلى م الفيس بوك.. هتفضل قاعد في البيت قدامها.. وفي نفس الوقت تلعب بديلك"
قلت له "والله فكره بس افرض هي لاحظت حاجه، وانت عارف سنيه عامله زي الجاموسه وايديها طارشه ودايما تسبق لسانها". راح العفريت رادد عليا بحل شيطاني "هتفضل عبيط زي ما انت، طبعا لو لقتك لازق في الفيس بوك ليل نهار هتشك فيك.. الحل موجود في الكتاب اللي في ايدي ده اللي اسمه..(علمها الفيس بوك..قبل ما تخرب بيت أبوك)"..رحت قايل له: "وحياة ابوك تفهّمني قبل ما اخرب بيت ابوك!!"
راح قايل لي:"بص يا سيدي..انت تعلمها الفيس بوك وتعمل لها أكاونت وتخليها تبعت لك وانت تبعت لها..وفي نفس الوقت تقضيها انت مع بنات أجنبيات وتبعت لهم رسائل خاصة من غير ما تضيفهم عندك..عشان الوليه مراتك تلاقي اصحابك كلهم رجاله وكل ده من غير ما تديها الباس وورد بتاعك مفهموم؟؟"
طبعا كان حل أكتر من رائع.. لكن لما جيت أعلمها لقيتها بتقولي بغباوة "الفيس توك؟ ايه الفيس توك ده؟!..يكونش ابن عم التوك توك؟"..رحت قايل في سري "غبيه يا سنيه..طول عمرك غبيه" وقايل في نفس الوقت بصوت عالي.."لا يا حبيبتي، ده حاجة تانيه خالص، تعالي وانا أفهمك"
قعدت اسبوع افهم فيها لغاية ما فهمت بالعافيه.. وراحت قايله "المهم بس اني عرفت افتح واقفل عشان ابص عليك بتعمل ايه كل شويه..وانا بطبخ أو بغسل"
تلاتة في واحدة
طبعا حمدت ربنا على غباوتها.. ودورت على بنات أجنبيات زي الشربات لغاية ما لقيت كام واحده زي العسل واتصاحبت عليهم.."جيسيكا" من انجلترا..و"تاتيانا كازانوفا" من روسيا..و"كارلا" من امريكا..حياتي اتقلبت جنه..كل يوم الصبح..أصبح على "جيسكا"..والضهر اتطمن على "تاتيانا" وبالليل ما أنامش قبل ما أمسي على "كارلا"..لأوايه..التلاته كانوا زي القمر واحلى من بعض..وكل يوم كانوا يبعتولي صور ليهم..مره ع الشط..ومره في حمام السباحه..ومره في المزرعه..عشت احلى شهر في حياتي..كل ده وسنيه الغبيه تدخل ع الفيس بوك تقولي حاجات من عينة "جبت العيش يا منيل؟".."اوعى تتأخر في الشغل وانت جاي يا بعيد"..لغاية ما جيت في يوم من الشغل لقيتها عاملالي صينية الفراخ بالبطاطس اللي بحبها..وصممت انى آكلها بحالها..وللأسف مفهمتش انها كانت حاطه منوم في الفراخ الا لما صحيت من النوم ولقيت نفسي مربوط في الكرسي اللي في الصاله وهي ماسكه المقشه وبتقول.."بقى بتحب "جيسيكا" و"تاتيانا" و"كارلا"؟؟ قلت لها "عرفتي منين يا سنيه!!" راحت قايلالي.."ماهو انا التلاته يا بعيد!!!"
بقلم عمرو عكاشه
------------------------------------------------------------------------
أنا والمحروس والفيس بوق!
الفتره دي لقتني متحاصره في كل حته بحاجة اسمها "الفيس بوك" يعني لما افتح نشرة الأخبار ألاقي المذيعة بتقول مثلا: "ووفقا لما نشره النائب العام على صفحته الرسمية على الفيس بوك...." ده غير أن زمايلي في الشغل ماوراهمش سيره غيره.
عندكم مثلا مدام ابتهال كل شويه تتفشخر وتقول: "ابني ياخواتي ما بيقومش من ع الفيس بوك، كنت زمان بازعق له عشان يقوم يذاكر لكن ده كان زمان دلوقتي باقوله براحتك يا حبيبي وبادعيله كمان.. ما هو حبيب قلبي السبب في التغيير الكبير اللي انتو فيه.."!!
وش كلمنجي !
بصراحه عمري ما دخلت ع "الفيس بوك" ولا أعرف شكله ايه فسألت المحروس جوزي يعني ايه "فيس بوك" فافتكس حتة دين افتكاسه: ""الفيس بوق" ده حقل انترنتي عولمي غربي.."فيس" كلمة انجليزيه معناها وش..أما "بوق" فمعناه بق.. يعني من الآخر وش كلمنجي، يعني ناس فاضيه رغايه مش وراها حاجه غير اللت والعجن".
استغربت كلامه أوي وقلت له: "لأ معلش بقى..ده بيقولوا انه كان ليه دور كبير اوي في الثورة، وبعدين انت ازاي تحكم على حاجة من غير ما تجربها، نجربها الاول".
اتقلب في ثانية زي الغراب وهو بيقول: "نعم نعم يا اختي..ايه اللي نجربه ده..ايوه كده انكشفي وباني انا تايه عنك.. ماهو انت اولك سؤال واخرك هات"..اتفقعت واستغربت ابن الأروبه ده فهم انا عايزه ايه ازاي، بس وحياتكم ما سكتش..قلت له: "بالذمه مش مكسوف من نفسك، ده عبده البواب عنده كمبيوتر والموبايل بتاعه بيجيب نت" لقيته مسخسخ من الضحك وهو بيقول: "بذمتك مش مكسوفه من نفسك..حتى البواب عايزه تقلديه وتعملي زيه..انت مش سايبه حد في حاله..ارحمي عنيكي شوية"
ولعت وحسيت بالدخان وهو بيطلع من وداني وأنا بقوله: "طب من الآخر نتقاسم.. نجيب كمبيوتر وانا هادفع النص وانت النص"، مقالش غير جملة واحده: "موت يا حمار"!!
استسلمت واشتريت كمبيوتر على حسابي واشتركت كمان في النت.. وبما اني عارفه شويه في الكمبيوتر دخلت على طول على عالم الانترنت، وولاد الحلال عندي في الشغل ماسابونيش ومفيش يومين وكنت مشرفه على "الفيس بوك".. وكل اللي في الشغل طالب اضافه، فرحت اوي وانا كل شوية افتحه واشوف بقى عندي كام فريندز.
توم فريندز
مع الوقت و"الفيس بوك" بقى زي الميه والهوا بالنسبه لي، بقى ادمان، وكلام في سركم حرقت الاكل كام مره، بانساه على النار وانا قاعده ع "الفيس بوك".. وكنت باضطر اطبخ من تاني واتخلص من أي أثر للأكل اللي اتحرق، والمحروس شكله كده شك لأنه كل ما ييجي من بره يشوف دخان ويشم ريحة حريقة.. فيجري ع المطبخ وهو مخضوض ان يكون الاكل اتحرق، ويلاقي كل حاجة زي الفل فيستغرب.. فاقول على طول: "الجيران دول مش هيجبوها البر.. ميعرفوش يطبخوا ما يطبخوش"!!
المره دي عملت احتياطاتي كويس..حطيت صنية البطاطس على نار هادية، وحطيت المنبه قدامي وكل ربع ساعه اقوم ازود لها ميه.. كل ده عشان ما تتحرقش، وكان النهارده يوم سعدي، لقيت "توم كروز" طالب اضافه..ايوه والله..توم كروز بشحمه ..وكاتب اسمه: "توم حبيب الملايين"..لقيت نفسي رقعه زغروده..ايوه كده خلي البروفايل بتاعي انترناشونال.. ملحقتش أفرح..الفار لعب في عتبي لما لقيت ان الفريندز المشتركين كلهم من اللي معانا في الشغل.. دخلت عنده احاول أعرف هو مين.. ومعرفتش.. كل المعلومات والصور اللي حاطتها بتاعة توم كروز.
اتأكدت انه أكيد توم كروز مزيف لما لقيته كاتب لي ع الوول وبالعربي: "ده ايه النشاط ده كله..دي الصفحة عندك مليانه لشوشتها"..شكرته وكانت ايدي بتاكلني اسأله انت مين..بس اتكسفت..لقيته كاتب لي تاني ع الوول: "شكلك كده ما بتقوميش من عليه"..رديت "بصراحه انا نسيت هي حياتي قبله كان شكلها ايه!!"..رد عليا وقال: "ايه ده..عندك خمسين فريندز بس!!!!..ده انت شكلك مش اجتماعيه خالص"..مش عارفه ليه اتغظت من كلامه..بصيت عنده لقيته النبي حارسه عنده 150 فريندز..رحت كاتبه له "اصلي لسه مبقاليش اسبوعين..جديده يعني"
راح رادد "ماتفرقش بقالك اد ايه..الكبير كبير والصغير صغير والنص نص.. نص نص ".. ولعت بجد وفكرت اعمل له ديليت بس لقيته كتب "شم شم..شم شم..شمشمشمشم"..كتبت له "يعني ايه؟!!"..كتب تاني: "شم شم..شم شم..شممممممممممم"..برضه مفهمتش فكتبت له "يعني ايه..شم شم"...مفيش ثواني وشميت ريحة مش تمام وقبل ما اقوم من مكاني لقيته كاتب: "يعني الاكل اتحرق يا وليه...الله يحرق قلبك يا بعيده"!!
بقلم رانيا صالح