د. إياد حرفوش: حجرين ورئيس جمهورية

على قهوة بلدي في قلب بلدي اتمد حبل الدردشة والتعليقات، وكان الكلام عن الانتخابات. واحد يقول "هنتخب فلان علشان بتاع ربنا"، كأن الباقيين بتوع الشيطان. والتاني يقول "هنتخب يا إما فلان يا فلان علشان واحد منهم اللي هينجح غالبا"، ميعرفش إن فلان وفلان دول صرفوا ملايين علشان الفكرة الجامدة دي توصل لحضرته، وإن صوته هو وغيره اللي هينجح مش بوسترات العربيات ولا إعلانات التليفزيونات. وتالت يقول "هنتخب مرشح الإخوان"، طيب مبروك، وإبقى حطه جنب البرلمان وعيط على الاتنين. يرد الرابع يقوله "أنا بأة هنتخب فلان علشان هيلجم الإخوان بتوعك"، حتى لو كان فلان اللي يقصده ده فِل الفلول. مش ده الكلام اللي بيدور بينا اليومين دول؟ طيب هي دي معايير نختار بيها رئيس جمهورية ولا نوع المعسل؟
تعالوا نشوف إحنا فين ومحتاجين إيه من الرئيس قبل ما نتكلم في فلان وعلان. في رأي العبد الفقير كاتب هذه الكلمات مصر محتاجة في رئيس الثورة خمس شروط، علشان ميخيبش أملنا فيه زي ما خاب في برلمان الثورة:
1. مطلوب رئيس عنده رؤية وبرنامج واضح، مش مواضيع تعبير ووعود مطاطة لسنة 2070. رئيس مننا وعينه ع الغلبان والجعان، برلمان الثورة راح لأحزاب مدنية رأسمالية وتيارات دينية رأسمالية، وفي بلد نص سكانه تحت خط الفقر، يبقى لازمنا رئيس معجون بالاشتراكية والتكافل الاجتماعي.
2. مطلوب رئيس عنده الخبرة السياسية الكافية للتعامل مع الوضع المعقد الموجود حاليا، ولتحقيق التعددية السياسية الحقيقية، وفي نفس الوقت التعامل مع المؤسسة العسكرية بدون عقد وبدون تهاون، وبفهم لطبيعتها علشان يرجعها لدورها الطبيعي.
3. مطلوب رئيس إيده نضيفة علشان يكون قلبه قوي، وذمته المالية معروفة على الملأ، بما فيها الفلوس اللي صرفها على حملته الانتخابية، كام ومنين؟؟؟ ونحط تحت كام ومنين دي عشر خطوط.
4. مطلوب رئيس مدني بجد وبوضوح، علشان يوزن الكفة مع الإخوان والتيار الديني. يعني مينفعش ننتخب رئيس إخواني حالي أو سابق، ولا سلفي، ولا مدني بخلفية دينية ومزاج يساري وهوى ليبرالي وحنين قومي وميول ازدواجية .. فخفخينا يعني.
5. مطلوب رئيس يحترمه العالم عامة، والعالم العربي والإسلامي وأفريقيا خاصة، يعني له تاريخ وتواصل كناشط حقوقي وسياسي خارج مصر.
لو كل واحد فينا طبق المعايير دي هيكون اختياره أقرب للصح، أنا طبقتها وكانت الإجابة هي: حمدين صباحي
1. برنامج حمدين صباحي مركز على الاحتياجات الحقيقية للمرحلة، وهي العدل الاجتماعي والحريات المسئولة والديمقراطية واستعادة دور مصر الدولي والإقليمي. وأكبر عقول البلد وفي مقدمتها الدكتور أحمد زويل تدعم برنامجه. مقارنة بالبرنامج المطاط المسمى مشروع النهضة بتاع سنة 2025م، تقليد أعمى لأردوجان في الانتخابات الأخيرة، وناسيين أن أردوجان بنى الأساس في فترات سابقة والنهاردة بيأسس عليه مراحل المستقبل. وكمان مشروع رأسمالي بالدرجة الأولى بيتعامل مع البلد على أنها شركة مساهمة.
2. حمدين عنده الخبرة السياسية والإرادة الثورية اللي تخليه قادر على مواجهة تحديات الخروج من المرحلة الانتقالية، وتحقيق التعددية السياسية والإصلاح الديمقراطي في مصر. وده اللي رجح كفته عندي على مرشح آخر بحترمه جدا هو خالد علي.
3. نزاهة حمدين يعرفها كل أهالي دايرته في كفر الشيخ وكل ناشط سياسي في مصر، وذمته المالية معلنة على الهوا في برنامج، وحملته ظاهرة الفقر وقلة الموارد لأنه غير ممول داخليا ولا خارجيا، مقارنة بحملات باذخة لعبد المنعم ابو الفتوح وعمرو موسى وشفيق، من أين لهم هذا؟ لو أول القصيدة تمويل هيكون آخرها فساد بلا شك.
4. توجه حمدين المدني الثابت لا يشوبه تاريخ من العمل تحت مظلة الإخوان ولا الجماعة الإسلامية ولا مغازلة السلفيين بتصريحات تمسك العصاية من النصف.
5. حمدين بخلفيته القومية وجه معروف على مستوى العالم العربي وله دراية واسعة بالملف الفلسطيني والقضايا العربية والأفريقية المختلفة.
علشان كل ده هنتخب حمدين، هنتخبه سواء انتخبته لوحدي أو انتخبه كل المصريين، هنتخبه وفاء لحق مصر في عنقي وأداء لأمانة صوتي. اللهم ألا قد بلغت، اللهم فاشهد.
Comment *