يوميات المراقب: مفيش هزار مع مرشحي الرئاسة.. والله العظيم هنحاسبهم.

اليوم : 26 ابريل 2012
المكان : منبر الشعب
الشخصية : "مش بيهزر"
بالامس كنت في رحلة شيقة في خان الخليلي، ولكن اليوم لن أكون خفيفا كما كنت بالامس، فالموضوع أصبح اكثر جدية وصرامة، وأتمنى ألا أكون شخصية رخمة علشان هضربكوا على راسكوا شوية، ولنقسم جميعا معا " والله العظيم سأنتخب من يخدم وطني .. ومفيش هزار تاني".
نحن الأن أمام حقيقة واقعة، فاليوم ستعلن القائمة النهائية لمرشحي الرئاسة، ويجب أن نكون واضحين أمام أنفسنا وأمام المرشحين، فتصريحات المرشحين هذا يشتم ذاك، وذاك يتهم الأخر بكذا وكذا لن يفلح معنا.
كل واحد من المرشحين يكون واضح ويضع برنامجه على الترابيزة، برنامج انتخابي واضح وأليات تنفيذ مرحلية خلال 4 سنوات، ونضع البرامج كلها في مقارنات مع بعضها، سيبك من فلان ده عنده خبرة في السياسة، والتاني كان عامل مطار جديد، والتالت هيوفر رغيف العيش، والرابع وقف قصاد السادات، والخامس هيوزع انابيب غاز، والسادس هيعمل نهضة، والسابع هيدافع عن حقوق الإنسان كل الكلام ده مش هينفع معانا أحنا عايزين برامج واضح وصريحة.
من الآخر احنا منتظرين اغلاق باب التصريحات وفتح باب البرامج الانتخابية الحقيقية وعلى الإعلام أن يعرض كل البرامج ويقارنها ويعمل مناظرات نظيفة ونزيهة بين المرشحين، عايزين برامج تفصيلية كاملة مش شوية شعارات وخلاص كلنا نقدر نقول شعارات وكلنا بنسمع شعارات كل يوم ملهاش لزمة.
الكرسي لم يعد يورث ولن يدوم لأحد، فهو تكليف واضح لخروج مصر من نظام فسد وصدر لنا ثقافة فاسدة وصلت حتى النخاع، فهو عمل شاق مستمر لتحقيق طموحات المواطنين الذين ذاقوا الأمرين على مدار 60 عام من حكم عسكري عقيم جعلنا في ذيل قائمة الأمم المتقدمة.
ياللا ورينا نفسكم اعرضوا برامجكم الانتخابية؛ وكل واحد مننا لما يتكلم عن مرشحه المفضل يكون قادر على استعراض برنامجه، مش يقولي "انا هنتخب فلان علشان باين عليه دمه خفيف"، وفلان علشان سمح ووسيم، وفلان علشان صاحب خبرة وتجربة، وعلان علشان هو اللي هيحكمها صح، وعلان التاني علشان هو اللي فاهم في سياسة، وفلان التالت علشان هيشبع الفقرا، وعلان الخامس، دي مش برامج ده كله كلام فاضي أحنا عايزين برامج بجد مش مهلبية.
ادعم مرشحك مفيش مشكلة، بس اطلب منه برنامجه الانتخابي، ولازم يكون عارف أنه هيتحاسب على كل كلمة هيقولها أحنا مش بنهزر، علشان ده هيكون رئيس أكبر وأعظم وأعرق وأقدم دولة في تاريخ البشرية.
مراقبات اليوم:
- شفيق قلتله باي باي في يوميات الامس.. انا كنت بهزر معاه وكمان اللجنة العليا للانتخابات كانوا بيهزروا .. كان قصدي باي باي وتعالى بكرة تاني.
- لسه موضوع الجيزاوي شغال.. والازمة بتزيد والتصعيد الإعلامي مستمر .. هو اسمه الجيزاوي فعلا !! هو في ايه؟.
- دعوة عادل إمام اترفضت .. في هوجة الرجوع في القرارات والحكام.. طيب ما تيجي نرجع للدستور أولا.
موضوعات ذات صلة
يوميات المراقب: وبقيت سائح في خان الخليلي !
يوميات المراقب (1) : التغيير يبدأ بالنخبة .. والبركة بالشباب
المراقب يكشف عن شخصيته ويبدأ يومياته .. ساعدوه
يوميات المراقب (1) : التغيير يبدأ بالنخبة .. والبركة بالشباب
المراقب يكشف عن شخصيته ويبدأ يومياته .. ساعدوه