حديث المدينة

مفيد فوزى: هل تعتقد ان هناك حالة عزوف عن الانتخابات ؟
محمد عبد العزيز: هو في عزوف عام عن الانتخابات نتيجة التجارب السابقة القديمة بتقولك طب انا هروح انتخب ليه النتيجة بتطلع زى ما هم عايزينه فده طبعا عزوف عام انما العزوف اللى قلقنى جدا و اللى قالق الناس المسئولين كلهم عزوف الشباب وعزوف المرأة الاتنين فئتين من اهم الفئات اللى من الممكن قوى تؤثر فى الانتخابات و مع ذلك عندهم عزوف كبير جدا
مفيد فوزى: ايه اسبابه ؟
محمد عبد العزيز: اسبابه اولا طبعا بالنسبة للشباب ان الوعى السياسى عندهم معدوم مش غائب كمان معدوم ليه مفيش تنشئة سياسية خالص التنشئة السياسية غير موجودة دلوقتى فى الشباب بعكس ايام الاحتلال الايطالى كانت الجمعيات الاهلية قايمة بدور هذه التنشئة السياسية مثلا ايام الاحتلال البريطانى كانت الجمعيات الاهلية قايمة بدور هذه التنشئة السياسية و نشأ فيها الزعماء السياسيين كلهم بتوع مصر يعنى
مفيد فوزى: كان فى حافز؟
محمد عبد العزيز: كان في حافز اه وقتها انه كان في عدو المحتل البريطانى و كان بيحاولوا انهم يقاوموه فكانت ديه دافع انهم عملوا تنشئة سياسية فى الشباب و كلهم اتربوا فيها مصطفى كامل فى جمعيات اهلية جمعية مصر فهذه التنشئة السياسية غير موجودة حاليا والطلبة اللى فى الجامعات كان ممنوع عليهم تماما العمل بالسياسة او الاتصال بالسياسيين والكلام فى السياسة حتى فديه اصبحت رعب بيهدد الولاد ميقدرش يتكلم بالتالى في بعد تام عن كل ما هو سياسى فى البلد و ده لأن ايضا اشتراكهم فى العمل العام اصبح قليل حتى فى العمل الاهلى اللى هو التطوع و العمل الاهلى بعدوا عنه و انصرفوا بقى فى الgames و اللعب على ال computer و الحياة اللى فيها لعب وسهر ومش عارف ايه ولذلك ده قلقنا جدا لأن شباب بهذه الصورة و دول بيمثلوا 40% من تعداد مصر شباب
مفيد فوزى: كيف الطريق للاجتذاب ؟
محمد عبد العزيز: ضرورى اشعار الشاب بأهمية دوره ودية مهمة جدا ان احنا نشعر الشباب انهم مهمين جدا لأنهم الوسيلة لنا اللى هتجرنا الى العالم المتقدم
مفيد فوزى: خايف يكون الكلام ده يا سيادة المستشار نوع من الكلام الإنشائى اللى هو اشعار الشباب انه ليه دور
محمد عبد العزيز: إشعاره بالفعل مش اشعار بالكلام
مفيد فوزى: نشعره ازاى
محمد عبد العزيز: لا لا نشعره بأن احنا اولا نلجأ له نستعمله نجنده فى الحاجات اللى احنا عايزينه يتدرب عليها يعنى نبتدى بالعمل الاهلى نبتدى بالعمل الاجتماعى ان انا اقنع الشاب بالتطوع بالعمل الاهلى خدمات مجتمعية فى توعية فى اى حاجة من ديه
مفيد فوزى: لكن فى انتخابات قادمة و له صوت
محمد عبد العزيز: لابد ان انا اجتذبه بهذه الصورة و ان انا افهمه ان ده حيعمل مصر فى المستقبل اللى انت هتبقى فيها ليك دور لأن الشباب هو المستقبل مش انا فلابد ان يشعر انه حينما يشارك فى الانتخابات بيعد للمرحلة اللى هيبقى له دور فيها قيادى او دور سياسى
مفيد فوزى: سلوكيا ازاى ده يحصل ؟
محمد عبد العزيز: من خلال التواجد مفيش حاجة اكتر من ان انا لازم اروح له و اقعد معاه واتحاور معاه وانا بتجربتى الشخصية شباب كانوا عاملين مؤتمر هنا فى اسكندرية فى مكتبة الاسكندرية عن دور الشباب والمرأة فى الحياة والحياة الاجتماعية ولاقينا انهم فعلا لما بنتكلم معاهم عنده وعى وعنده كل حاجة بس حد يكلمه لما اتكلمنا معاهم لاقيناهم انهم مستعدين انهم يشاركوا وكل حاجة بس حد يقول له احنا محتاجينك و فعلا احنا محتاجين هذا الشباب من غيره مش هنقدر ابدا نلاحق الزمن
مفيد فوزى: هل انت بتحلل الانسحاب ده بأنه ملوش دور ؟
محمد عبد العزيز: اه اه ده مش ملوش دور ده مهمش عمدا
مفيد فوزى: بدليل انا قلت لك ده مغيب انت توافقنى ؟
محمد عبد العزيز: وهذا الكلام ورد فى التقرير ان الشباب مغيب عن الحياة العامة والحياة السياسية
مفيد فوزى: يعنى 40 % فى حالة عطل ؟
محمد عبد العزيز: و لو اضفنا المرأة كمان هيبقى 50% فى مجتمع مصر اللى هم السيدات دلوقتى تحولوا الى 50 % هم 40 % لكن بيعتبر حوالى 50% فده عدد كبير جدا عدد ضخم جدا يعنى معناها ان نصف المجتمع معطل ونصف المجتمع الان لأن الشباب هو المستقبل المرأة هى اللى بتعد هذا الشباب وهى اللى بتربى وهى اللى بتنشئ الشاب على انه طالع وطنى وانتمائه وتقديره للظروف والمامه بالحياة ومشاكلها هو ده كله بيتم من خلال المرأة
***
مفيد فوزى: بس انا عبر عن نفسك وانت في انتخابات جاية لمصر انتخابات مجلس الشعب كلام ترسمه لنفسك عشان الناس تشوفك على الشاشة تقول ايه ده الواد ده هيطلع وزير عبر عن نفسك بواقعية انت والانتخابات
اسامة : انا اسمى اسامة طالب فى سنة 5 طب
مفيد فوزى: ميهمنيش اعرف ده , السؤال تانى عبر عن نفسك مرة تانية
اسامة : اول مشاركة لي فى الانتخابات كانت انتخابات مجلس الشعب اللى فاتت بصراحة واضح بالنسبة لانتخابات مجلس الشعب اللى فاتت بالنسبة لى مش كافى للدرجة بس نزلت انتخابات واخذت معلومات وعرفت ازاى اخد صوتى واديه لمين ان كان فيه شوية عواقب او عوائق بتقبالنى بس الى حد ما حابب انى اشارك فى الموضوع ده و نفسى ان الموضوع يكون ايه بيجيب نتيجة كويسة يعنى نفسى اكون رايح وأنا عارف ان صوتى له فايدة و ان صوتى له قيمة
مفيد فوزى: انت حاسس ان صوتك ملوش قيمة ؟
اسامة : الى حد ما
مفيد فوزى: بمعنى ايه؟ فسر
اسامة : بمعنى ان انا مثلا بشوف حاجات انا مش بتكلم على صوتى انا بتكلم على صوت الشباب بصفة عامة يعنى مثلا
مفيد فوزى: اتكلم عنك؟
اسامة : اول حاجة ان فيه موضوع منتشر جدا اللى هو بيع الاصوات واحد واقف قبل ما يدخل الدايرة او قبل ما يدخل لصندوق الانتخابات
مفيد فوزى: فيه حد بيقف جنب الصندوق ؟
اسامة : مش جنب الصندوق لكن هو واقف مثلا
مفيد فوزى: اه بيعمل ايه؟
اسامة : بيقف يقطع الفلوس يدي له نص الفلوس و هو طالع
مفيد فوزى: انت شفت ده بعنيك ؟
اسامة : هو طبعا فيه حاجات انا شفتها بس يعنى
مفيد فوزى: قد ايه الفلوس؟
اسامة : 50 جنيه او 100 جنيه على حسب اللى نازل رجل اعمال نازل واحد مثلا تاجر كبير فى المنطقة الى هو فيها او فى الدايرة اللى هو فيها تلاقيه داخل بفلوسه الفلوس تعمله شعبية
مفيد فوزى: ده بيسموه المال السياسى تفهم يعنى ايه المال السياسى؟
اسامة : اللى هو بيدخل السياسة او بيدخل البرلمان او اى منصب سياسى عن طريق المال مش عن طريق الفكر بتاعه او عن طريق الخطة بتاعته او هو ناوى يعمل ايه
مفيد فوزى: انت بتشوف هل حد عرض عليك يوم ما هذا ؟
اسامة : اتعرض عليا
مفيد فوزى: كان اد ايه المبلغ ؟
اسامة : كان 100 جنيه
مفيد فوزى: انك تعمل ايه , تدخل تدى صوتك يدوك 100 تانية ؟
اسامة : هى 100 واحدة بيقطع بيدينى نصها وانا طالع لما اعطيته الصوت بيدينى النص التانى وانا طالع طبعا ده مش ضمان ممكن ادخل جوه ادى صوتى للى انا عايزه بس انا مقبلتش
مفيد فوزى: طبعا تدى للمنافس
اسامة : طبعا
مفيد فوزى: مش كده , انت و هو بيديك ال 100 جنيه مخدتهاش؟
اسامة : لا والله
مفيد فوزى: ليه ؟
اسامة : عشان انا مش عايز كده انا عايز ادى صوتى انا عندى اقتناع بكده
مفيد فوزى: فيه غيرك خد؟
اسامة : طبعا فيه ناس بتاخد فيه ناس بتروح اصلا يعنى لو قلنا مثلا هناك انا شايف نسبة انا محددها عن نفسى يعنى لأنى انا عضو فى اتحاد الطلبة حابب موضوع النشاط و حابب موضوع التواجد و بس
مفيد فوزى: هل الناس ديه سماسرة يجيبوا ناس عشان خاطر يختاروهم عشان؟
اسامة : انا لسة هقول لحضرتك الناس ده بتعمل ايه بتجمع مجموعة ناس محتاجين الفلوس يعنى فيه ناس محتاجة الفلوس
مفيد فوزى: يعنى يعنى انا اقدر اقول كده وصحح لى اذا كنت غلطان ان الضائقة الاقتصادية لهذه البلد بتخلى الناس ممكن انها تبيع ذمتها
اسامة : طبعا
مفيد فوزى: ولا انا غلطان ؟
اسامة : لا طبعا ده موجود والناس مش ملهية عن الانتخابات يعني بطاقات الاقتراع بتبقى موجودة ميهماش التوجه الصح لسببين بيبقوا عارفين الموضوع هيبقى عامل ازاى
مفيد فوزى: متقوليش كلام زى بتاع الاتحاد الاشتراكى ان الناس مش عارفة التوجيه الصح ان الناس تريد التوجيه الصح خليك بسيط اوى كده فهمنى يعنى الناس اولا مش ملهية يعنى يعنى الناس مشاركة ولا رايحة تستفيد من هذا المكان ماديا ؟
اسامة : سببين اول سبب انهم رايحين يستفيدوا ماديا
مفيد فوزى: يعنى هو جى خصيصا ليستفيد ماديا مش لا هو عايز لا المسألة نصب ولا المسألة انتخابات ولا اى شئ من هذا القبيل كده بوضوح
اسامة : يعنى ممكن نقول حاجة يعنى اللى بدافع الفلوس او بسبب الضائقة المالية تانى حاجة هو الى حدا ما فيه واحد هتخلص على ايده
مفيد فوزى: انت شاب شايف الصورة ايه فى دماغك
اسامة : يعنى الفترة الجاية ممكن تبقى حلوة اوالى حدا ما اتجاه للتغيير فى الى حد ما نشاط عن الفترة اللى قبل كده بدأ ينتشر فى الجامعات فكرة نشر الوعى السياسي و ليس الدعاية السياسية حاجة معينة الجامعة مش مكان للسياسة بس نشر الوعى السياسى نفسه بدأ ينتشر الموضوع ده
مفيد فوزى: هل انت بتشتغل بالسياسة بالجامعة ما انت ممنوع تشتغل بالسياسة؟
اسامة : ما انا مبشتغلش بالسياسة انما ممكن انشر الوعى السياسى اوعى الطالب سياسيا انما مش ادعى لسياسة معينة او حزب معين
مفيد فوزى: مين زمايلك اللى بينسحبوا مبيرحش ينتخبوا؟
اسامة : واحد ذا وعى سياسى يفهم ايه دوره وايه واجبه وايه اللى المفروض يعمله فى الانتخابات وانا مقدرش اوعد لأن انا برده مش واعى سياسيا تماما يعنى ان الانتخابات الاصوات هى اللى هتحدد المسألة
مفيد فوزى: عجبتنى قلت انا مقدرش اوعد لأن انت شخصيا مش واعى سياسيا وبالتالى متقدرش وانت مش واعى سياسيا
اسامة : مش هوعد بحاجة منتهية
***
مفيد فوزى: دكتور صلاح سرور كيف نجتذب شبابنا حتى لا ينسحب وكثير جدا من الناس بتنسحب من الانتخابات بحجة انه النتيجة معروفة فكرة الانسحاب فكرة عدم المشاركة انا اقضى عليها ازاى ونحن على مدخل الانتخابات ؟
صلاح سرور: ديه اقضى عليها بوجود القدوة الحزبية
مفيد فوزى: بمعنى؟
صلاح سرور: يعنى فيه احزاب بتعزف عن الاشتراك فى الانتخابات و ده يعتبر انتحار سياسى الحقيقة فالمسئولية بلاقى بعض الاحزاب لا تشارك اساسا فى الانتخابات الحزب نفسه بينسحب يبقى اين القدوة لي فديه نقطة مهمة جدا اللى هو الحرص حرص الاحزاب وديه مسئولية قومية وطنية انها تشارك فى الانتخابات يعنى ايا كانت فيه اسباب سلبية فهذه احزاب لابد ان تتعامل مع هذه السلبيات لتجد مخرج و لا تؤدى الى فقدان هذه القدوة قدام الشباب اهى ديه من النقط المهمة جدا الحاجة التانية لازم يبقى فيه ثقة كاملة او مثلا من المتقدم للانتخابات امام الشباب عشان يحذو حذوهم زى مثلا يحضرنى دلوقتى مرشحين للمستقل و الناخبين ضد اصوات مستقل اول ما ينجح ينضم لحزب الحزب الاساسى بتاعه فانا بعتبر عدم ثقة يعنى امام الشباب انه مش لاقى هيلاقى فين مش عايز اقول يعنى مافيش كلمة الصريحة او الهدف الصريح امامه لأنه واحد بينزل مستقل اداله الصوت على اساس انه مستقل اول ما نجح فى الانتخابات راح للحزب بتاعه فى ناس اتحطت غلط فى هذه النقطة
مفيد فوزى: رأيت الضابط ايه ؟
صلاح سرور: رأيت الضابط انه برده بتيجى بالتوعية يعنى بالتوعية وفيه شبه تعليمات اللى هو نازل مستقل عن الحزب خلاص يبقى متعهد انه ميرجعش تانى والحزب كان مبيقبلوش كان بيرجع تانى يبقى بهذه الطريقة انتجت لك مستقلين وتبقى مؤثرة فى اتخاذ القرارات بعد كده
مفيد فوزى: هل تعتقد انه فيه حالة رغبة فى ان يكون لنا مجلس شعب جديد مختلف عن ما كان , هل هذه الرغبة موجودة لدى الناس ام ان الناس منصرفة حتما الى حياتها الشخصية والرزق؟
صلاح سرور: لا هو شوف حضرتك الرغبة طبعا موجودة مفيش اى واحد فى هذا الشعب معندوش الرغبة بالعكس الناس عندها جوع سياسى زى الارض المشققة اللى عايزة ترتوى بالميه انما مش لاقية الحقيقة
مفيد فوزى: ايه صور الجوع السياسى ده؟ عشان ميبقاش العبارة مجرد انها تقال فقط
صلاح سرور: جوع سياسى ان مثلا راح لجنة الانتخابات او سمع ان راح لجنة الانتخابات لقى عملية بلطجة راح لجنة الانتخابات منع انه يدى صوته هو يعنى فيه بتدى حالة احباط سياسى الحقيقة لقى مافيش القدوة فى بعض القيادات وديه نقطة مهمة جدا
مفيد فوزى: مفيش ؟
صلاح سرور: القدوة,اه من ناحية المبادئ من ناحية القيم سمع عن مخلفات جسيمة فى مجال الصندقة واصبحت فيه مسميات نواب القروض نواب الموبايل نواب كل ديه تراكمات بتبقى موجودة.
مفيد فوزى: اثارها ايه على الناس ؟
صلاح سرور: لا طبعا اثار سلبية جدا الحاجة التانية النقطة المهمة يمكن ده مجال هؤلاء نظام الكوتة فى مجلس الشعب فيما يخص الاقباط فيما يخص المرأة ده يؤثر على تعريف المواطنة كويس ديه تتحل ازاى احنا على ما يتم النضج السياسى بالنسبة لنا وبالنسبة لشبابنا اذا كان هناك اقتراح او اذا كان فيه عدد معين كمرحلة انتقالية الاول فى مجلس الشعب انما انا يعنى طب ما فيه اقباط نزلوا اكتسحوا مينزلش كقبطى نزل كمصرى النقطة مش عارف مأثرة في ليه على اساس الكوتة هنحط مثلا كذا مقعد للاقباط يبقى كأن الاقباط ديه حاجة منفصلة عن الوطن هنحط كذا مقعد مكان المرأة يبقى كأن المرأة منفصلة عن الوطن لا ده يتعارض مع التعريف الاساسى للمواطنة
فاصل
مفيد فوزى: دكتور مرسى عرب هل تعتقد انه الانتخابات القادمة تحتاج الى عملية تنويرية لكى نحصل على مجلس شعب افضل؟
مرسى عرب: قطعا يعنى هناك حاجة ماسة جدا للتنوير و تنوير المواطن المصرى بوجه عام وطبعا زى ما حضرتك شفت كان فيه نشاط فى هذا المجال تنوير المواطن المصرى بوجه عام ليمارس دوره السليم فى احدى الظواهر فى حياته وهى عندما يظهر الى صندوق الانتخابات
مفيد فوزى: قل لى ايه هى العوائق؟
مرسى عرب: اول حاجة العائق انه يصح ميرحش خالص ده خطأ كبير جدا احنا دلوقتى لما بنقول عايزين نربى المواطن المستنير لازم نمرة واحد ان يعلم تماما انه من واجبه مش عايز اقول من حقه من واجبه انه يذهب الى صناديق الانتخابات و لا يكون سلبيا و ميقولش بقى الحجج اللى بتتقال انا عارف ان النتيجة ومش عارف ايه مهما كان هناك من الحجج المواطن المستنير يتمسك بحقه و يذهب الى الانتخابات
مفيد فوزى: احيانا بتطلع عبارة يقولك ايه صوتك هو عرضك, هل الكلام ده موثق انسانيا ؟
مرسى عرب: الشخص المستنير يعتبر ان صوته امانة و يعتبر انه صوته عرضه فعلا الشخص الغير مستنير زى ما حضرتك عارف ممكن يبيع عرضه واحنا عارفين انه فى بعض الانتخابات ممكن ان الواحد يروح ينتخب ويبيع صوته فيبقى بتعبير حضرتك كده يبقى باع عرضه
مفيد فوزى: طيب خلينى ادخل فى نقطة تانية المال السياسى بيلعب دور سلبى فى الانتخابات؟
مرسى عرب : قطعا لأنه بيشترى اعراض الناس لأنه زى ما قلنا ان اصوات الناس هى اعراض يبقى اهمال الشخص اللى بينجح فى الانتخابات و يدخل البرلمان بسلطة ماله وبدون المعايير الاخرى سليمة لانتخابه سلطة شريرة جدا وهى تمكين سلطة المال من انها تدمر الوطن
مفيد فوزى: فيها رجل اعمال؟
مرسى عرب : هو فيه نماذج عظيمة جدا من اساتذة الجامعات
مفيد فوزى: انا بقول يستطيع انه يدخل فى منافسة مع رجل اعمال ينفق بالملايين وحضرتك هتنفق بالملاليم
مرسى عرب: لا اذا كان السلاح ده الوحيد قطعا
مفيد فوزى: يكون فيه سلاح اخر فى تقديرك؟
مرسى عرب: سلاح اخر الفدائية والتقديم وان يكون استاذ جامعى عنده الcharisma وعنده الشعبية وعنده القدرة على اقناع الناس الافاضل المستنيرين انهم يصوتوا للشخص الواعى وعارف واجبات النائب و بالتالى يكتسح صاحب المال
مفيد فوزى: مصطفى الفقى على سبيل المثال كرجل مفكر ينجح اكثر ام ينجح الذى يذهب عشان يطلع ابن الناخب من القسم ؟
مرسى عرب: اذا كان حد فى حجم مصطفى الفقى بفكره وبتصميمه وبعزمه ودخل ضده واحد صاحب اموال قارون هعتقد مع عملية تنوير للمجتمع برده المثقف المتمكن الواعى يكسب متفائل يعنى
مفيد فوزى: اقدر اقول خليك واقعى , هل الذى يخدم الدائرة ام صاحب الفكر؟
مرسى عرب: هو حضرتك برده لمست نقطة مهمة جدا فى المعايير الذى ينتخب بيها او عن طريقها الناخب المستنير والناخب الغير مستنير الناخب الغير مستنير يروح ينتخب نائب عن الدائرة يمشيله اموره ويدخله مش عارف ايه ويجيبله ايه والكلام اللى احنا عارفينه ده الناخب المستنير بيروح ينتخب نائب عن الدائرة مثلا بروح انتخب عن دائرة سيدى جابر
مفيد فوزى: مش عايز ادخل فى تفصيلات
مرسى عرب : انا بديك مثال انا بقول اهوه بمثال انا بنتخب نائب عن الدائرة التى اصوت فيها انا اعلم تماما كشخص مستنير انى انا بنتخب نائب هيدخل بعد كده البرلمان ليراقب الحكومة ويصدر تشريعات تخدم الامة والدولة كلها يبقى مش بنى ادم مقفول على الدايرة وله شعبية فى الدايرة انما لابد ان يكون عندى معايير ان انا اختار انسان على مستوى يعنى يعرف مشاكل بلده يعرف يتخذ القرارات السليمة
مفيد فوزى: تقصد يخدم مصر لا الدائرة , او اذا كان يخدم مصر اولا ثم الدائرة
مرسى عرب: ثم الدائرة و اخيرا نفسه يعنى انه يكون النائب ده اللى هيدخل من الخلق انه يحط نفسه اخر حاجة
مفيد فوزى: هل نحن لدينا هذه النظرة الثاقبة ان الذى يخدم مصر اولا ثم الدائرة ثانيا اولى بالصوت
مرسى عرب: الحقيقية الثقافة ديه متخلفة يعنى دعنى اعترف ان هذه الثقافة متخلفة وهذا دورنا فى عملية التنوير لابد ان ننور المواطن المصرى الى انه الانتخابات لابد ان تأتى بنائب عن الوطن ويؤدى عمله على مستوى وطنى وليس على مستوى الدولة وليس داخل عشان ياخد حصانة يكتسب بها مصلحة ولا حاجة زى كده
***
مفيد فوزى: لما بيكون عندك بلدياتك داخل الانتخابات من الجدعنة انك تنتخبه ؟
مواطن: اكيد اه لازم انتخبه
مفيد فوزى: عشان انه بلدياتك؟
مواطن: طبعا عشان ابن بلدى لازم نقف جنبه بيقدم لنا خدمات ومبيتأخرش عننا فى اى حاجة
مفيد فوزى: ايه قول بعض الخدمات اللى بيقدمها لك ؟
مواطن : لو طلبنا منه مثلا بلدنا عايزة اى حاجة صرف صحى حد تعبان علاج على حساب الدولة بنلجأ له وهو بيقوم بالواجب ده وبيساعدنا
مفيد فوزى: لكن ما دام بلدياتك يبقى لازم تنتخبه؟
مواطن : ما هو مش يعنى مافيش حد من بلدياتى ننتخبه جار منا يعنى من بلد تانية
مفيد فوزى: افرض جدلا انه فيه واحد مرشح نفسه لكن مش بلدياتك ؟
مواطن : لازم اروح انتخبه
مفيد فوزى: يعنى انت هنا متعصب لبلدياتك؟
مواطن : اكيد يعنى ابن بلدى اولى
مفيد فوزى: ابن بلدك اولى
مواطن : اه
مفيد فوزى: لانه بيخدمك ؟
مواطن : اكيد
مفيد فوزى: لانه عارفك لانه يقدر طبعا يطلع ابنك من القسم ؟
مواطن : اكيد اه
مفيد فوزى: ما هو عشان كده مصر ورا , عشان العصبية ديه
مواطن : لا مش عصبية مش لازم يكون هو يعنى
مفيد فوزى: امال مين يا راجل ؟
مواطن : اى واحد
مفيد فوزى: يعنى انت هتنتخب واحد مش من قرايبينك
مواطن : مش مقربلوش لازم اكون عارفه
مفيد فوزى: اللى هو من بلدياتك ؟
مواطن : اه
***
مفيد فوزى: بالنسبة لك البنات فى مصر
مواطنة : عموما انا عمرى ما انتخبت و لا كان لي بطاقة انتخابية اصلا خالص يعنى
مفيد فوزى: ليه انتى عندك كام سنة؟
مواطنة : عندى 25
مفيد فوزى: ليه معندكيش بطاقة انتخابية ؟
مواطنة : عمرى ما فكرت انى انا اعمل
مفيد فوزى: تسمحى لى اعرف ليه كده بهدوء ؟
مواطنة : اولا يعنى النتيجة بتبقى معروفة , الناس اللى مرشحة نفسها انا معرفش حاجة عنهم , مبيعرفوناش علي نفسهم خالص بس ديه كل الحكاية
مفيد فوزى: دايما بيقولوا ايه يقولك كده فى الكلام يقولك ايه المفروض ان الشخص اللى بيدى صوته ده يكون قرأ وعرف ان ايه المنهج وايه اللى بيفكر فيه النائب وايه برنامجه هل عندك فكرة بالكلام ده؟
مواطنة : لا بصراحة عمرى ما قرأت عن اى مرشح و لا عرفت عنهم اى حاجة يعنى
مفيد فوزى: بالتالى عمرك ما فكرتى تكتبى بطاقة انتخابية ؟
مواطنة : لا
مفيد فوزى: انت دورك فى الانتخابات انك تتفرجى من بره
مواطنة : بالظبط كده بس
مفيد فوزى: متفرجة سعيدة ؟
مواطنة : اصل النتيجة هتفيد بأيه يعنى ما النتيجة معروفة المرشح بيبقى معروف مين اللى هيكتسح
مفيد فوزى: طيب بتخافى تروحى هناك يضايقوكى ؟
مواطنة : اه و خصوصا فى حتة الماديات ديه
مفيد فوزى: ازاى ؟
مواطنة : يعنى انى انا ادى صوتى لحد يدينى مقابلها فلوس مثلا انا بدايق طبعا
مفيد فوزى: طب تقدرى تقفى فى طابور الانتخابات وتخشى ولا يضايقك اشياء اخرى ؟
مواطنة: لا هو الموضوع ده يضايق وبعدين انا زى ما قلت لحضرتك انا مجربتش ان انا انتخب او يبقى عندى بطاقة انتخابية
مفيد فوزى: انتى بتشتغلى ايه ؟
مواطنة : ممرضة
مفيد فوزى: بالمناسبة هو زهرة و ازواجها الخامسة , هى زهرة كانت نموذج للمرضة ؟
مواطنة : لا طبعا الكلام ده مبالغ فيه جدا , لا انا مشفتش بس سمعت اللى هى عاملاه طبعا , الكلام ده هى مبالغة اوى فى موضوع التمريض
مفيد فوزى: حسدتى زهرة ؟
مواطن: لا طبعا
مفيد فوزى: ليه , متمنتيش تبقى زى زهرة ؟
مواطن : لا طبعا
مفيد فوزى: يا منال شفت كده على الفيس بوك احد السيدات مرشحة رشحت نفسها و بعدين طلع على الفيس بوك كلام عنها مفزع وسخيف وغير انسانى واتكتب واتقال يبدو انه علاقاتها بالرجال هى اللى وصلتها لهذا المكان , هذه الصورة من المرمطة من الهلهلة من السوء , انتى كنت لو انتى فى مكان مع ستات وحصل على الفيس بوك هذا الكلام تتصرفى ازاى ؟
سيدة : هعمل comment على الfacebook ومعروف ان الحاجات ديه كلها لما بتبقى مرتبطة بالسياسة بيبقى ليها خلفيات سياسية مبتكنش حقيقية ,الناس برده عندها الوعى ده ان هى عارفة ان القصص المتفبركة ديه يعنى الناس بقى عندها الوعى دلوقتى ان بالذات حد له فكر معين او كاريزما معينة او شخصية معينة بيخلق قصص وحكايات , ده بيتعرف طبعا من كلامهم ومن تاريخهم السياسى , تاريخهم فى العمل الاجتماعى اذا كان..
مفيد فوزى: محدش من البنات بيحط اسمه فى الفيس بوك , الفيس بوك ده عالم افتراضى بيتقال اى كلام و انتى عارفة فى مصر فيه حاجة يقولك العيار اللى ميصبش يدوش
سيدة : اه طبعا بيدوش بس اعتقد دلوقتى بقى فيه نت من كتر الخبرات ومن كتر السوابق اللى قبل كده الناس بقت عارفة ان مش كل حاجة بتتكتب فى الفيس بوك او فى الجرايد او بتتنشر بتكون حقيقية
مفيد فوزى: فى مجال الانتخابات ؟
سيدة : فى الانتخابات وفى المجالات الاخري طبعا كمان
مفيد فوزى: يعنى ايه مجالات اخرى ؟
سيدة : حضرتك طبعا عارف انه فيه حكاوى كتير بتتقال مش حقيقية , حكاوى كتيرة بتتفبرك عشان خصوم , لأغراض ما الناس فى الفن فى السياسة حتى على مستوى الصحف , الصحفيين مع بعضهم فيه مشاكل
مفيد فوزى: ازاى تغربلى ؟
سيدة : و الله الغربلة ديه مبتمش الا لما بيكون عندى يعنى قراءات كتيرة وخبرات كتيرة بالاشخاص ديه وكمان ال sense بتاع البنى ادم نفسه ومعرفته طبعا القليلة بالشخص ده
مفيد فوزى: هل اللى عامل ده فى تقديرك ستات اللى عملوا الهلهلة ديه على الفيس بوك عن المرشحة ستات ولا رجالة؟
سيدة : يعنى انا شايفة انهم ممكن يكونوا رجالة وممكن تكون نسبة مشتراه من الستات كمان
مايه رأيك ان انا شايف انهم ستات ؟ اعتقد انهم ستات والله ستات لو كان لهم مصلحة
مفيد فوزى: تفتكرى الرجالة فى منافسة مع ست بالعقل , انما اكيد ستات غيرانات صح كده
سيدة : غيورات , لا فيه رجالة مصلحتهم ان ميكنش ان فيه ست تلمع , تلمع سياسيا , مثلا لو قلنا فى مجال الانتخابات
مفيد فوزى: النمط ده من الرجالة موجود كتير
سيدة : انا شايفة انه بقى موجود كتير دلوقتى , كنت الاول العكس , كان الاول زمان كنت بحس ان الراجل بيقف جنب الست , دلوقتى الراجل عمل الست عدو له فى حاجات كتيرة
مفيد فوزى: منافسة ؟
سيدة : اه , حتى فى مجال الزوج و الزوجة , مش الانتخابات , الراجل بقى دلوقتى بيغير من تفوق الست
مفيد فوزى: بيغير من نجاح الست؟
سيدة : لأن الست دلوقتى بتعمل دورها كأم زى زمان و كمان دورها فى المجتمع بمختلف صوره وبقت لامعة ومفيدة وفعالة
مفيد فوزى: انتى كست , و فيه مرشح كست لكن اكتشفتى انه الراجل عنده تفكير اكثر وعيا , بشعورك هتنتخبى مين ؟
سيدة : هنتخب الراجل طبعا مش الست
مفيد فوزى: ليه ؟
سيدة : هنتخب اللى يفيد بلدى اكتر , اللى حاسة انه فعلا هيفيدنا كمجتمع اكتر
مفيد فوزى: فيه فى المجتمع بتاعنا عملية التعارف على الناس , فهمينى
سيدة : الحقيقة لا
مفيد فوزى: انتى اتنهدتى كده ليه ؟
سيدة : عشان
مفيد فوزى: مفيش جلسات الناس مبتعدش مع بعض
سيدة : خالص
مفيد فوزى: يعنى انتى مبتعرفيش الحى اللى انتى فيه مين اللى مرشح نفسه
سيدة : وحتى يا استاذ مفيد مش بسهولة تتعرف على الناس حتى لو قعدت واتكلمت معاهم مش بسهولة تقدر تعرف داخلهم ايه لأن غالبا اغلب الناس دلوقتى بقت بترتدى اقنعة متقدرش تعرف ايه اللى جواها
مفيد فوزى: بتدى افضل ما لديها
سيدة : بالظبط
مفيد فوزى: خصوصا فى الانتخابات , يعنى مش عايز اقولك فى الجواز انما فى الانتخابات
سيدة : فى الجواز ايضا طبعا
مفيد فوزى: لأنه متعرفيش اوله من اخره
سيدة : بالظبط وبعدين تكتشف بعد كده الحقائق
مفيد فوزى: بس فى السياسة خطر ان تكتشفى فيما بعد , يعنى فى حياة الست لما انت تكتشفى ان الراجل ده لم يكن هو الراجل الذى تحلمين به فيه 100 راجل تانى , انما الوطن لما بيقع لما بينطب , لما بينزل فى حفرة تبقى مصيبة ولما سقوط مدوى , فاذا مكناش احنا شعب وانا مش عايز احول نفسى لواعظ , انا لست سوى اننى انقل افكار للناس واراءها عشان احطها على شاشة للاحترام و الوعى لااكتر ولا اقل , حضرتك قلتى دلوقتى انك انتى لما بتنتخبى الراجل امتى الوقت اللى بتنتخبى فيه الست سياسيا
سيدة: لما اقتنع فعلا بيها وبمقدرتها السياسية
مفيد فوزى: تقتنعى بيها امتى , لما فجأة تظهر ولا لما تكون لها اداء عام ؟
سيدة: لما يكون لها اداء عام بعيد كل البعد يكون ترشيحها لمجلس الشعب او مجلس الشورى فى مجال سياسى جه نتيجة خبرات و خدمات طويلة فى المجتمع ككل , مش فى الدايرة بتاعتها , انا عايزة اقول لحضرتك لو كنت سألتنى مبتنتخبيش , هقولك مبنتخبش , هنتخب مين يا استاذ مفيد , عاينى انتخب مين , انتخب حد بيشتم بيشتموا بعض , علنا وعلى الهواء ولا نائب بيأزأز لب ولاحاضر الجلسة علشان يمضى وزير, الحقيقة انا مش لاقية , انا لو لقيت الناخب اللى احترمه و اقدره فى مصداقيته انا هنتخبه , لو حتى انا اتعرضت لبلطجة فى الدايرة ولو حتى تعرضت لايذاءات و مضتيقات انا فعلا هنتخبه , هنتخبه مش عشانى انا بس , هنتخبه عشان ولادى الصغيرين , انا دلوقتى حزينة على حالهم
مفيد فوزى: دكتورة هند حنفى رئيسة جامعة الاسكندرية , مهم فى البرنامج اللى انا بقيس بيه درجة حرارة الوعى فى مجتمع ان انا اقابل حضرتك كقيادة فكرية وحريص ايضا ان انا اعرف رؤاك بشكل عام فى قضية نحن على وشك الدخول فيها وهى قضية انتخابات مجلس الشعب خلينى افهم منك على المستوى الفكرى و الذهنى امام الناس الى اى مدى انتى مؤمنة ان وجود برلمان مهم فى حياة امة؟
هند حنفى : طبعا ده شئ مهم جدا لأنه لما يكون البرلمان قوى المكان اللى بيتخذ فيه القرار قوى هو ده اللى يقوى الامة كلها , فوجود برلمان قوى , مسؤوليتنا لأن احنا اللى بنختار فلازم نختاره على احسن الاسس والمعايير لأن مينفعش الاختيار يبقى كده بالمصادفة او بالتزكية لازم يكون فيه اختيار جاد و اختيار وقناعة وعن وعى ان الناس اللى هتمثلنا تمثلنا بجدية و باقتناع لأن بلدنا المفروض تبقى من احسن بلاد العالم , فيعنى احنا لازم نساعد الحكومة فى انها تؤدى واجبها من خلال برلمان قوى
مفيد فوزى: هل تعتقدى انه مجلس الشعب الذى كان الذى هو مازال يعنى كان يروق لكى؟
هند حنفى : بالنسبة للاعضاء ولا بالنسبة للكيان ككل ؟
مفيد فوزى: بالنسبة للاعضاء
هند حنفى : بالنسبة للاعضاء طبعا فيه ناس افاضل وعلى مستوى عالى جدا وفيهم ناس محبش انهم يمثلونى ده موجود وده موجود
مفيد فوزى: نعم , هل تعتقدى انه من الافضل فى بلد زى بلدنا تعيين ناس عقلاء يديروا عقل الامة رأى من ضمن الاراء المطروحة ؟
هند حنفى : مفيش كلام وجود نسبة صغيرة مش كبيرة
مفيد فوزى: ليه؟
هند حنفى : لأن لازم اللى يمثل الشعب يكون مختار من الشعب
مفيد فوزى: حضرتك مؤمنة انه كل الناس اللى دخلت البرلمان ممثلة من الشعب بأمانة بالغة
هند حنفى : لا , ما هو مش لازم بأمانة بالغة و لازم يكون غير انه بأمانة لازم يكون الشعب واعى , فلو الشعب مش واعى معندهوش فكر و معندهوش خبرة , لازم احنا نساعده وننوره
مفيد فوزى: ننوره ازاى انتى وصلتى للمهم ؟
هند حنفى : ننوروه ان احنا يبقى فيه برامج تثقيفية برامج تنويرية من خلال الاذاعة والتليفزيون والندوات والجامعة ومدارس يعنى
مفيد فوزى: ايه دور الجامعة فى هذه القضية
هند حنفى: دور الجمعة احنا كجامعة اسكندرية احنا عندنا حوالى 200,000 طالب ده عدد مهول
مفيد فوزى: هو انا حبيت اجى اسكندرية لسبب شديد الاهمية ومحدد , وهو ان الاعلام كما هو متهم قاهرى دائما , كل حاجة اعملها فى مصر كل حاجة فى شوارع مصر , كل حاجة فى جامعات مصر , حبيت اخرج الى الاسكندرية , والاسكندرية رافد مهم فى حياة مصر, فمن هنا اسأل ما هو دور الجامعات فى التنوير اللى ممكن يتحول الى حالة عامة تخلينا و احنا بننتخب بننتخب صح ؟
هند حنفى : انا هقول لحضرتك حاجة بس , الشعار بتاع جامعة اسكندرية الفنار , الفنار ده انارة والانارة معناها ان ممكن جامعة اسكندرية طبعا كل الجامعات المصرية انها تكون المكان اللى بينير و بيشع و بيبقى منارة للفكر و للثقافة والتعليم فى كل مصر
مفيد فوزى: حولى ده لسلوك يبقى ازاى ؟
هند حنفى : احنا الطالب بيجيلنا بعد ما يخلص مرحلة المدارس والثانوية العامة وخلص كل المرحلة الاولى وبيجيلنا كطالب جامعى ماهواش برده مؤهل انه يكون بالمستوى اللى احنا عايزينه
مفيد فوزى: هل ده تسمحين لطلبة جامعة الاسكندرية بالتفكير السياسى داخل الجامعة؟
هند حنفى : تفكير سياسى ممكن لأنه هو ممكن
مفيد فوزى: نشاط سياسى ؟
هند حنفى : لا ابدا
مفيد فوزى: امال امتى يتربى سياسيا , دكتورة هند حنفى وانتى اول رئيس جامعة انا بتعدلك عشان اسألك شئ مهم جدا امتى الطلبة يفهموا يعنى ايه معنى سياسة؟
هند حنفى : الطالب محتاج اللى يقعد معاه ويكلمه ويسمعه اكتر من اللى بس يديله محاضرة
مفيد فوزى: مين اللى يديله الكلام ده يا دكتورة الدكاترة ؟
هند حنفى : اساتذة الجامعة
مفيد فوزى: اساتذة الجامعة مشغولين بحاجات تانية
هند حنفى : حضرتك احنا عاملين برنامج ثقافى مكثف السنة دى بناء برنامج فيه مفكرين من كل الفئات , احنا بنعتز جدا فى مصر ان احنا عندنا ناس على مستوى عالى جدا من الفكر و الثقافة بس مبنستغلهمش فى الجامعة كفاية , فاحنا فى المرحلة اللى جاية سندعوهم , و فعلا ابتدينا نحط الاسماء , هنبتدى ندعو مفكرينا , انهم يقعدوا مع طلابنا وتملى كنت بقول ان احنا عايزين لقاء نص ساعة فى فكرة معينة , الندوة يبقى لها هدف , لها معانى توصل للطالب بس المهم بقى ان الطالب يناقش فالفكرة ديه والندوة اللى المحاضر هيقولها تبقى فى خلال نص ساعة ونسيب الطالب ساعتين يتحاور مع صاحب الندوة
مفيد فوزى: ردى عليا سألت ولد قال لى معايا بطاقة فى جيبى لكن مرحتش انتخب , حضرتك كرئيسة جامعة تردى تقولى ايه ؟
هند حنفى : ارد اقولك صوتك مهم , و كل واحد هيقول زيك صوتى مش مهم انه هو معندوش ثقة فى البلد معندوش ثقة فى الحكومة معندوش ثقة فى حد
مفيد فوزى: طيب سألت واحدة قلت لها على النت والفيس بوك بيطلع عملية هلهلة لبعض المرشحات وقلت لها ازاى تغربلى قالت لى المسألة عايزة وعى عشان اغربل او اصدق , تقولى لها ايه ؟
هند حنفى : معها حق المسألة عايزة وعى يعنى للأسف ان الصحافة , الاعلام بوسائله المختلفة , الفيس بوك دلوقتى له فائدة كبيرة جدا احنا لازم نقف قصاد الممارسات اللى هى ماتمشيش مع الاعراف والتقاليد المصرية فلازم نقف قصادها مينفعش ان احنا الناس تتجاوز
مفيد فوزى: بيقولوا لى ان الشباب مغيب ولا هو هنا خالص , بيقولوا بيتفرج على الافلام وبيقعد على النت , و لا هو دريان بحاجة اسمها سياسة ولا انتخابات جاية ولا حاجة
طالب : وبيذاكر وبيخش كلية هندسة و بيتفوق وبيطلع من الاوائل هو ده وضع الشباب لازم الجمع بين الاتنين , عمر ما هيكون فيه حاجة لا علم فقط و لا دين فقط ولا تسلية فقط ولا متعة فقط
مفيد فوزى: انت مقولتش ابدا كلمة سياسة؟
طالب: الوضع السياسى فى مصر اشبه بالحرية الغامضة
مفيد فوزى: الحرية الغامضة؟
طالب: اه , تقدر تقول بس مانتش عارف بتقول ايه , سامحين لك تتكلم بس مش سامحين لك تتكلم فى ايه , هى ديه الحرية الغامضة , ده الوضع فى مصر , ناسها مغيبين ولكن الوضع السياسى نحن بمنأى عنه
مفيد فوزى: كشباب؟
طالب: وكمجتمع بصفة عامة , يعنى لسنا بصدد الحديث عنه , الامور السياسية تجعلنا نكتئب
مفيد فوزى: يعنى انت من الناس الرايقة مالكش دعوة بالحكاية ديه؟
طالب: لا طبعا شاغلنى طبعا , امال لو ماكنش ده اللى هيشغلنى امال ايه الى هيشغلنى
مفيد فوزى: قلت لى انك فى كلية الهندسة فى سنة ايه ؟
طالب : فى تانية قسم كهرباء طبعا
مفيد فوزى: بترسم مستقبل لحياتك ؟
طالب : طبعا لازم المستقبل ده يتكون من حياة سياسية حياة اجتماعية
مفيد فوزى: انت غير مسموح لك تشتغل بالسياسة فى الكلية؟
طالب : هنعمل ايه
مفيد فوزى: طب ايه الحل؟
طالب : فيه مؤتمرات سياسية بييعقدها الاخوان المسلمون مثلا
مفيد فوزى: فى الجامعة ؟
طالب : اتحاد الطلبة , يعقدها المسؤولون عن
مفيد فوزى: و بعدين ؟
طالب : و لكن بردو مفيش اى رد فعل , و دون استجابة , تعقد المؤتمرات , تعقد الندوات , يحدوثوننا عن الامور السياسية المهمة ولكن الوضع صعب الوضع السياسى صعب
مفيد فوزى: حرية ايه ؟
طالب: غامضة
فاصل
مفيد فوزى: هل اعود مرة اخرى لهذا النقاش الجاد حول الوعى لمستقبل مصر القادم ام اعود ايضا لفلسفة الواوا فى منهم الانوثة وسعد الصغير فى علاقته بالغناء وعلم البساتين والعنب العنب العنب ارجو ان اعود الى شئ جاد لا يغيب العقول ابدا.