قراءة في كف سي السيد !

- ما تجيب كفك أقرالك الطالع بتاعك في 2019 يا سي السيد؟
- معدتش أصدقك يا أمينة ياما قريتيلي في 2015 و2016 و17 و18 وياما صورتيلي الدنيا وردي وفي النهاية نقبي يطلع علي شونة!
- كذب المنجمون ولو صدقوا يا سي السيد، هو أنا مغسلة وضامنة جنة يا خويا، أنا فعلا باكون شايفة حاجات كويسة لكن ماعرفش ليه بتقلب معاك السنة كلها غم في غم!
- طب خلاص بلاها قراية كف السنة دي يا أمينة ياختي ما هو الجواب بيبان من عنوانه.
- خليك متفائل ياراجل أدينا بنتسلي مين عارف مش يمكن السنة دي تكون أحسن من اللي فاتت؟
- انا عارف نفسي يا أمينة المشكلة فيا أنا مش في السنين.
- طب هات بس وريني كفك وبلاش نبرة التشاؤم دي ياسي السيد
- وبعدهالك يا أمينة
- ياراجل إجمد أومال وجف مي يور هاند وهابي نيو يير ياخويا!
- هههههههه الله يحظك يا أمينة وكمان بترطني إنجليزي طب آدي كفي أهو بس مش عايز أحلف طلاق لو شفتي في السنة الجديدة أي حاجة شمال وقولتيلي عليها لأكون مروحك علي امك.
- ياه ياسي السيد ده كفك متشلفط خالص ياخويا
- يا فتاح يا عليم إيه البداية اللي مش ولابد دي يا ولية ما تشوفي حاجة كويسة الأول.
- ما ينفعش يا سي السيد كفك من النوع الانسيابي!
- معناه إيه الكلام ده يا أمينة؟
- يعني الكف بيوضح الحاجات الوحشة الأول وبعدين ينساب ناحية الحاجات الكويسة!
- يعني فيه حاجة كويسة أصلا في 2019؟
- طبعا فيه يا راجل لا يأس مع الحياة ولا حياة مع اليأس علي رأي مصطفي كامل.
- بس ماتنسيش إنه مفيش فايدة علي رأي سعد زغلول!
- الفايدة جاية بس متأخرة شوية.
- يعني إيه يا أمينة ماتتكلمي دوغري!
- يعني في الكام شهر الأولانيين فيه شوية معاناة يعني حتعاني من كام وعكة صحية علي كام وعكة اقتصادية ويمكن تعاني كمان من أزمة اجتماعية.
- حيلك حيلك هو مفيش أمل أعاني من فرط السعادة مثلا؟
بصراحة في الكام شهر الأولانيين مش باينلك حاجة كويسة.
طب ماتخشي علي النص التاني من السنة يمكن تلاقي حاجة عدلة.
- امممممم لا بلاش ياسي السيد النص التاني مخبيش عليك برضه مهبب شوية!
- طب باقولك إيه أنا عندي حل كويس يمكن يخليكي تشوفي في كفي حاجة كويسة في 2019
- حل إيه ياسي السيد؟
- انا رايح اسهر عند زبيدة وانتي تلمي هدومك وتروحي علي أمك!
- قصدك أقضي عندها ليلة النيويير وأرجع الصبح؟
- لا انا قصدي حاخليكي تقضي عندها النيويير كله يا أمينة!