السيسي يتفقد الأعمال الإنشائية لطريق النفق - شرم الشيخ

تفقد الرئيس عبدالفتاح السيسي صباح أمس الأعمال الإنشائية لطريق النفق/ شرم الشيخ وصرح السفير بسام راضي المتحدث الرسمي باسم رئاسة الجمهورية أن الطريق بطول 342 كم باتجاهين كل اتجاه يحتوي علي عدد 3 حارة مرورية»‬.
من ناحية أخري وجه الرئيس عبدالفتاح السيسي التحية لشباب مصر وإفريقيا والعالم .. مؤكدا أن الشباب هو الأمل الشباب وهو المستقبل و هو القدرة وبالتالي الحياة أمام كل الشباب ولابد من ان يدرك ذلك ويعمل من أجل هذا.
وقال السيسي: إحنا في مصر لينا قصة بنسميها »حكاية وطن».. الحكاية هنا في مصر مش حكاية قيادة وحكومة.. الحكاية في مصر حكاية شعب.. الشعب ده أصر علي أنه يغير الواقع بتاعه لواقع أفضل.. المهم وهو بيتحرك في ده كان مستعد أنه يدفع ثمن التطوير والتقدم ويتحمل المشاق اللي هتترتب علي كده.. الشعب ده رفض الفاشية ورفض التمييز علي أساس ديني ورفض التطرف ورفض الغلو وأتحرك بالملايين علشان يقول إننا لا يمكن أبداً أننا نكون دولة غير دولة محبة لنفسها وشعبها والعالم كله».
جاء ذلك خلال الحوار الذي أجراه الرئيس مع الإعلامية الشابة زوريال إدوالي، علي هامش فعاليات منتدي شباب العالم.
وأضاف الرئيس: »‬المؤتمر اللي بندعو فيه شباب العالم ده هي رسالة سلام من كل المصريين وشباب مصر للعالم كله وشباب العالم كله علي أن الشعب المصري شعب سلام وأمان واستقرار وشعب محب للآخرين لكل الآخرين.
وقال الرئيس اللي أنا عاوز أقوله أن المصريين هما الحكاية الكبيرة مش أي حد تاني.. البرنامج كله عملوه المصريين وتحملوا ويتحملوا.. النهارده إحنا بنتكلم علي إجراءات اتعملت خلال 4 سنين وشوية.. لكن خلال ال4 سنين دول المصريين عملوا جهد جبار في كل المجالات.. في مواجهة التطرف والغلو والإرهاب في إعادة بناء الوطن في التنمية في حل المشاكل اللي بقالها سنين طويلة في مصر.. وقعدت فترة كبيرة ومكنش فيه فرصة لحلها نجح بنسبة كبيرة جداً.. والاختبار الكبير في ده وأكد ده أن مجموعة الإجراءات الاقتصادية.. الخطة بتاعتنا في الإصلاح الاقتصادي لم تكن أبداً ليتم مرورها أو النجاح فيها إلا بأن المصريين يتحملوا كل المصاعب الناتجة عنها».
واضاف السيسي: مخرجش حد يقول أو يعترض علي الصعوبات المعيشية الكبيرة اللي صادفت الناس في هذه الإجراءات.. الكلام اللي أنا عاوز أقوله في هذه النقطة السؤال في ده وإجابته أن المصريين إرادتهم هي اللي نجحت المسار الذي نسير فيه.. تحملهم والتمن اللي بيدفعوه هو اللي نجحنا.. أو مازل نجاحنا مبني علي إرادة المصريين بالمناسبة عدد الشباب أو من هم دون سن ال40 كتير.. إحنا تقريباً عددنا 100 مليون منهم 65 تحت سن ال40 شباب كتير مصر علي أنه يغير وبيدفع تكاليف هذا التغيير للأفضل.. التفاصيل كتير ومش عاوز اشغلكم واللي بيسمع مني.. لكن أقدر أقول أن الحكاية كلها في كافة مناحي حياتنا في مصر اتحركنا والشعب المصري ساند هذا التحرك.. وبذل ويبذل وسيبذل جهودًا ضخمة من أجل تغيير الواقع.. والواقع ده بالمناسبة محل تقدير من شعوب العالم المتابعين للشأن المصري بشكل عام عندهم تقدير وإحساس بالجهد اللي اتعمل ومدي الإنجاز اللي حققه المصريين.. علشان كدا منقدرش نختزل النجاح اللي حصل خلال ال4 سنوات اللي فاتة دول في حد.. لا.. هي أمة كاملة.. أمة تتحرك وصامدة ومصرة علي العبور لآفاق رائعة للمستقبل إن شاء الله»
ودعا السيسي الشباب الا يفقد الأمل في نفسه مهما كان فيه مصاعب أو عراقيل وأنه قادر علي أنه ينجز ويعمل الأفضل.. و هناك شباب في مصر لديه اصرار علي أنه يغير وينجح ويبذل جهد ويحلم ويحقق حلمه.
وقال: اللي أنا عاوز أقوله لكل شبابنا في إفريقيا ومصر الأمل فيكم وليكم.. فيكم وليكم.. أوعو أبداً تفقدوا ثقتكم بأنفسكم ولا بالمستقبل اللي أنتم ممكن تحققوه بس دائماً الأمر محتاج جهد وصبر.. جهد وصبر.. وأتمني الناس تفتكرني بأيه.. تفتكرني أنني قدمت عمل صالح عمل طيب لشعبي والبشرية كلها ده اللي أنا بتمني يتذكروني بيه».