ضي القلم

ليه الصحفي علي راسه ريشة ؟

كنت أتمني من الذين ملأوا الفيس بوك تطاولا علي الصحفيين الذين انتفضوا اعتراضا علي اقتحام نقابتهم أن يتعقلوا، ويفرقوا بين الصالح والطالح، ويدركوا أنهم تسببوا في إيذاء مشاعر الصحفيين، فلماذا أقحموا أنفسهم في القضية وشاركوا في تصعيدها عن جهل.
صدعونا بتعليقات سخيفة وادعوا أن الصحفيين علي رأسهم ريشة، مما يجافي الحقيقة، وللذين ظاطوا في الظيطة.. خلينا نتفق أننا زي أي فئة في مصر فينا الحلو وفينا الوحش فينا سلبيات وفينا ايجابيات، الفرق الوحيد أن الصحفيين هما النموذج لحكاية الصيت ولا الغني، ولو في شوية لعب الزهر معاهم فموجود بكل الفئات. والباقي عيب تشتمهم. لأنهم بقالهم سنين بيغطوا مظاهراتك عشان المرتبات والكادر وهما بيكملوا الشهر سلف، وبقالهم 5 سنين بينشروا مطالبك بالتعيين والترقية ومتمرطين بين الجرايد بيحلموا بالتعيين، وبقالهم سنين بتتصل بيهم وتطاردهم عشان ينشروا مطالبك بالنقل لمحافظتك أو يشوفولك واسطة تتنقل لمكان أفضل في شغلك وهما أصلا نصهم متغرب وعايش في شقة علي البلاط وبيصحي الصبح يكتب خبر عن أزمتك انت مش ازمته، الصحفيين هما الفئة الوحيدة اللي عمرهم ما اتظاهروا أو وقفوا شارع، بص علي الخمس سنين اللي فاتوا وقولي مين معملش مظاهرة فئوية؟ مش هتلاقي غيرنا، احنا رضينا نعيش كده صحفي مالي هدومه ودماغه وجيوبه فاضية، احنا اللي رضينا نعيش بالصيت ولا الغني، الصحف والمواقع والقنوات مليانة بمشاكل كل الفئات.. إلا مشاكلنا، بنتفصل ونسكت، بتتخصم مرتباتنا ونسكت، مرتباتنا تتأخر ونسكت، بنستجدي المعاشات والعلاج من الحكومة، لما الداخلية اخترقت القانون واقتحمت نقابتنا وخدت مننا الصيت، بقينا ولا صيت ولا غني، عرفت بقي سر الريشة اللي علي راسنا، الريشة دي احنا رضينا بيها في مقابل انك دورت علي ريشة تانية، وعشان كده دلوقتي بندافع عنها، ومطلبناش منك ولا من حد يساعدنا زي ما طول عمرنا بنساعده، عيب لما تشتمنا لمجرد اننا عمرنا ما اشتكينا من اللي انت طول عمرك بتشتكي لينا منه، وبنحافظ علي ريشة عملناها بالشقي والمرار، اختلف أو اتفق علي المطالب أو الأسماء بس متنساش إن انت كنت شريك بالرضا عن نسج الريشة دي لأنك استخدمتها لمصلحتك وعمرك ما كنت بتسأل انتو ليه علي راسكم ريشة.
احنا ولاد الفلاحين والمطحونين والشقيانين، فرحتنا لما نرجع حق مظلوم، وننصر ضعيف، ونكشف فساد، وننشر حاجة حلوة عن البلد، ساندنا مصر وده دورنا ووقفنا ضد الإرهاب وصمدنا، وعمرنا ما نكون ضد مصر ولا ضد القانون. مستكتر علينا الريشة.