الوجه الآخر

النجم الصاعد عمرو عبدالعزيز : لعبت كورة مع الزعيم .. وأتمشي جنب الحصان !

عمروعبد العزيز بينه وبين الحصان عشق ومودة ورشوة بقطعة سكر
أول مرة يلعب كورة جاب جون في فريقه ، «بلاها هواية الكورة ، شاطر في التقليد يبقي اخش فريق التمثيل «، ده اللي قاله لنفسه النجم الشاب عمرو عبد العزيز ، لكنه اتحط في ورطة لما طلبوا منه يشوط الكورة في الجون الفاضي تماما في فيلم « مرجان أحمد مرجان « ، مرة يشوطها يمين الشبكة ، مرة شمال الشبكة ، ما بتدخلش الجون ، المخرج علي ادريس شد في شعره وهو بيصرخ « استوب ..يا عمرو ركز ..خلصنا»، اقترب منه الزعيم عادل إمام وقال له : « واضح انك ما اتفرجتش علي ماتش في حياتك .. ركزيا عمرو .. ركز يا حبيبي » ، كلمات الزعيم شعللت فيه الحماس ، بعزم ما فيه شاط الكورة اللي شالت الكاميرا ومعاها « وش» المخرج !
ملامح أي انسان بتظهر في الأشياء اللي بيحبها ، واللي بيكرهها ، واللي بيتفائل بيها ، واللي بيتشائم منها ، وحاجات كتير بسيطة بترسم بورتريه الشخصية بالكلمات ، عمرو عبد العزيز قال لي إنه مش عاطفي ، ومش عقلاني ، ومش قدري ، واهم شيء في حياته انه بيحب والدته ، وبيكره الظلم والافترا ، وبيفرح لما يلاقي حد بيقول من قلبه «الحمد لله»، بيحس برضا والدته عنه في محبة الناس اللي بيقابلهم في أي مكان .
........................................ ؟
- كنت طفل شقي بس مش مخرب ،مش مؤذي ، فشلت في لعب الكورة لما جبت جون في نفسي ، واتشتمت واتبهدلت من زمايلي فاعتزلت بعد أول مباراة ، حبيت بعد كده هواية الخيل .
.............................................. ؟
- زوج اختي يهوي الخيل و حاولت اقتبس منه الهواية، بذل معايا مجهودا كبيرا جدا انتهي بأني اتمشي جنب الحصان زي اي اتنين صحاب ، قبل ما اتهور وافكر اركب الحصان اديله رشوة بحتة سكر ، وفجأة اتراجع ،اصلي وانا جنب الحصان بحس اني « احمد السقا » ، لو ركبت الحصان بحس اني بقيت « أحمد رزق » !
................................................... ؟
- خالي هو اللي حببني في هواية الرماية وضرب النار ، أول مرة روحت معاه نصطاد بط ، وصلنا الفيوم 4 الفجر ، في عز الشتا والجو تلج ، « انزل يا عمرو من العربية ، حاضر يا خالي «، خالي نزل من هنا وانا روحت في النوم ، صحيت مفزوع علي ضرب النار ، كان يوم بط صحيح، لا منها نمت ، ولا منها عرفت اصطاد بطة !
.................................................... ؟
- علاقتي بالمطبخ جامدة جدا ، بعشق محشي ورق العنب ، لما بسافر بره لوما جابوليش ورق عنب يتقلب المزاج ،الاكلة الوحيدة اللي بتجيب لي ازمة نفسية .. « الكوارع « !
........................................................ ؟
- انا عامل يوم في نهاية السنة مسميه « كشف حساب» ، بقفل تليفوناتي واختفي من علي الفيس وتويتر واهرب لمكان محدش يعرفه غير أمي، اقعد اراجع ،غلطت في مين ، زعلت مين ، مين لازم اعمل له « delete » من حياتي ، يعني بعمل «format » للسنة اللي عدت ، عشان الجديدة تبقي جديدة ونضيفه .