طريق النور

الطلاق علي النور الشاهينية!

يا مثبت العقل والدين.. يا رب يا معين..
يا تري يا أهل مصر إحنا رايحين فين..
ع الحرية والكرامة الانسانية واللا راجعين لورا عشرات السنين.. قمنا بثورة آه.. علشان يعود عقلنا ورشدنا ويعود كمان الدين.. لكننا لقينا روحنا بعد شهور وسنين لسه ماسكين في جلاليب أهل الفتوي والفتة ولا غين عقلنا وحطناه في الطين.. مع إن نبينا المصطفي قالنا أطلبوا العلم ولو في للصين.. وأيامنا تجر فينا ونجرها لا علام نفع ويانا ولا عرفنا معني الدين.. مسلمين باسم في شهادة الميلاد وفي دفتر التموين.. وكل ساعة نكدب ونسرق ونحرق وكله باسم الدين.. يا رب طهر قلبنا ونور عقلنا علشان نمشي في طريق المؤمنين المخلصين.. ثورتنا الينايرية دخلتنا في عتمة وضلمة أخوانية وخلتنا نجري علي صندوق الجنة والنار وكله باسم الشرعية.. حتي اسألوا الشيخ محمد حسين يعقوب صاحب الفتاوي النارية.. يا تري هو فين دلوقت لسه بيشخط وينطر في الخلق واللا خايف من الايام اللي جاية.. وفين فتاوي النكاح وبول الحمير والابل واللي نزلت ميدان التحرير من غير حجاب أو نقاب أو حتي جلابية.. ومرت علينا السنة شوفنا فيها الويل والذل علي إيدين تجار الفتاوي والدين والمعونات القطرية والتركية والامريكية والجماعات الجهادية والحمارية والايرانية وكلها بتعلن الجهاد علي كل المسلمين وأحبابهم اليهود صبحوا جوه العين وفي الحتة الجوانية.. أما ثورتنا اليونياوية قلبت الدفة ورجعتنا للحقبة الناصرية.. وملعون يا للي ما تصلي علي النبي وتقول معانا تسلم الايادي للعيش والحرية والكرامة الانسانية.. وتحضر نفسك بعد الاستفتاء لانتخاباتنا الرئاسية علشان إحنا غيرنا المسار والخريطة وعملناها علي الطريقة المصرية.. وإن الرئيس أولا وثانيا وباسم الغلابة ح نغني من تاني ونفتي ونلغي العقل ونمشي في عرض البحر ونقول إحنا أصحاب الحضارة والشطارة والفهلوة وإحنا أجدع مراكبية.. ويطلع علينا تجار الفتاوي الشاهينية وبدل اليعقوبية وتقولنا لازم وحتما ولا بد كل راجل جدع بيحب ربنا يطلق مراته الاخوانية أو حتي يقتلها ويدفنها علشان تراب الوطن ينضف من كل الخلايا النايمة والصاحية والمستخبية.. والدنيا بقت أوكازيون ومظهرية شاهينية وشوبش مين يفتي ويزود في خراب البيوت باسم الدين والعلم ندفنه بالحيا لانه رجس من عمل الشيطان والعقل نمسحه بأستيكة ونمشي ورا أهل الفتوي والمطبلاتية والزفة مصرية في الربيع والشتا والكاكي يكسب وسلملي علي أهل الخطوة والحظوة وقادة النور السلفية والمخيونية والبرهامية والبكارية أصحاب فتاوي حقن الدماء والولاء لكل راكب كرسي الرياسة والترزية يا رب ارحمنا من نفسنا الامارة بالسوء ومن نفوس الآلاتية وضيوف قنواتنا الفضائية ونعرف طريقنا للعلم ونعلم ولادنا الحب والتسامح وننزع من قلوبنا الحقد والكراهية.. ونصحح خطأنا وكل واحد مننا يطهر قلبه وعقله من كل الفتن ونلم شمل بعضنا ونمشي علي الطريقة الماليزية.. وكمان الهندية واليابانية والصينية ونفسي الطريقة الامريكانية اللي دمرت حياتنا سنين وخلتنا نقتل بعضنا بفتوي كنتاكية.. معجونة بيتزا هات وماكدونالزية.. يا ريت نفوق شوية ونعرف إن ربنا خلق الخلايق وعارف نواياها ومصيرها ونهايتها وبداياتها وميز بني الانسان بالعقل والمفهومية مش باللحية والجلابية والفتاوي المجانية اللي نازلة ترف علينا في الصبح والعصرية وقبل الفجرية بشوية..