د. هشام عبد الصبور شاهين يكتب: قالوا في الثورة

شهيد من شهداء الثورة: البِشر والبُشرى والبشارة يا من لم تلحقوا بنا، لا تخافوا علينا فنحن عند الله لم نمت، ويؤتينا ربنا من نعمه ما لم يخطر لنا على بال، يكفينا أن ننظر إلى وجهه الكريم.
مبارك: يا ريتني ما عدلت الزفت الدستور في 2007، هو ده إللي بوظ كل الترتيب، يا ريتني ما اعتمدت على العادلي والحزب الزفت، يا ريتني عينت نايب من بدري، يا ريتني ما سمعت كلامهم، كلهم ودوني فداهية.
علاء: كل ده عشان تبقى ريس ؟ بلا نيلة.. يا ريت يا أخي ربنا كان خدك قبل ما يتعمل فينا كده، مكنا فل وعايشين فل والدنيا كانت مزهزهة، والبلد كانت قربت تبقى بتاعتنا كلها.
جمال: ده إيه النحس ده، ما أبويه خدها تلاتين سنة، وبشار في سوريا خدها وراثة.. إشمعنى انا ؟ مع إني موهوب ودمي خفيف وعندي كاريزما بنت .....ة.
متفائل: عمرنا ما هنبقى أوحش من اللي كنا فيه، بكرة تروق وتحلوّ لما الفلوس اللي سرقوها ترجع، والسياحة تنشط والمصانع تشتغل ... يا جماعة ربنا حارس الثورة.
متشائم: ما كنا عايشين ومبسوطين، كويس كده اللي احنا فيه ده ؟ آهي خربت، ولا في أمن ولا في شغل ولا فلوس، وحلّني لما ترجع البلد تاني زي ما كانت.
محشش: هي الثورة 25 يناير اللي فات واللا اللي جاي ؟ هجري واللا ميلادي ؟
مؤدب: يا ناس.. إحترام الكبير واجب حتى لو كان حرامي، والستات تتحاسب أولا، ولو اتحكم على حد فيهم يتقال في الحكم: على سيادته، وإتفضل معاليك على السجن يا باشا.
أبناء المرحوم: كل اللي خدته من الناس يابا هيطلع على جتتنا، يا فرحة أهل الباجور فينا.
يوسف بطرس غالي: إحنا ناخد من كل واحد يدخل ميدان التحرير 10 جنيه رسوم تظاهر.
محيي الدين: يا ريتني بعت ميدان التحرير وميدان القائد والسويس والقناة .. هي غلطتي.
والي: مكانش زفت عبد الرحمن وزفتة الشامي زودوا شوية في جرعات السرطان في المبيدات، مش كنا خلصنا منهم من زمان؟
بلطجي: إحنا الوحيدين اللي متأثرناش بالثورة أوي، إحنا بس شغلنا قلّ شوية لما اتحل الحزب الوطني، لكن الأشيا معدن لإن المباحث لسة بتطلب مننا شغل.
إخوانجي: أخيرا جماعتنا مبقتش محظورة، دلوقتي بأه نسيب الدعوة شوية وندخل على السياسة.
رفعت السعيد: دي ثورة إرهابية سلفية متأسلمة هتأسس لدولة دينية، مش تقدمية ولا وحدوية ولا اشتراكية.
فؤاد علام: هذه الثورة وثورة تونس وثورة اليمن وثورة أوكرانيا والثورة البلشفية والثورة الفرنسية؛ كلها خرجت من عباءة الإخوان المسلمين، وكلها تعتمد على كتاب سيد قطب معالم في الطريق.
الجبلي: أشرف يا حاتم.. نشيد الوزارة الجديد لازم يبقى: بلادي بلادي بلادي .. التأمين الصحي في دار فؤادي.
حواس: أوعد الثوار إللي خلصونا من لصوص الآثار.. لما المتحف المصري الكبير يخلص كمان خمسين سنة أعمل متحف للثورة.
طلعت زكريا: الميدان كله لب وسوداني وترمس ودرة وولاد وبنات وعلاقات جنسية كاملة وإخوان وشواذ جنسيا.
الوزير السابق: بجد ؟ يا ريتني كنت معاهم .. يا ريتني كنت معاهم.
عمرو أديب: أنا أصلا مولود في ميدان التحرير، حتى بصوا ..حتى شوفوا..أنا اشجع من عتريس هاهاهاها.
عمتو عفاف:الثورة دي خلتنا منهارين..كنا كل يوم بنجيب عشا من برة وكده، وبنتغدى مرتين كباب وكفتة، وزبالتنا مليانة لحمة وعكاوي وكيوي، دلوقتي ابن اختي عنده سنتين خس النص بقى وزنه 50 كيلو، أطفال دول حرام عليكو.
تامر: أنا ضحكوا عليا هئ هئ هئ .. وطردوني من الميدان مع إني هربت من الجيش عشان ماتجندش في الأمن المركزي وأضرب حد فيهم بشومة، يا جماعة أنا وطني جدا من يوم ما نزل علي الشعاع في الفصل.
إبراهيم حسن: إقفلوا عليهم الميدان وإمنعوا عنهم المية والأكل والدوا.. وهيسلموا نفسهم، دي عيال صيع معندهمش ولاء للبلد، خليهم يتعلموا مني ومن أخوية الولاء، أهلي شغال زمالك شغال ،إرد شغال عفريت شغال، المهم الأبيج ومصلحتك.
محمد أبو سويلم: خلعناه .. عشان كنا رجالة ووقفنا وقفة رجالة.
الدهاشنة كلها في صوت واحد رج أركان العالم العربي: جواز عتريس من فؤادة باطل.