من الأعماق

الثورة نجحت يا أبو عبدالرحمن

جمال حسين
" كوسة.. واسطة.. محسوبية.. اللي له ضهر ما ينضربش علي بطنه " .. ده الكلام اللي كان ماشي من سنين لان البهوات كانوا عايزين كده.. خدوا كل حاجة وسابونا ع الحديدة.. حتي الحديده اخدها احمد عز عشان يصرف ع الحزب من اجلك انت يللي كانت عليك العين.. التقديم بدأ للكليات اياها الواد قصير مش مهم بكره يطول..الواد نظره ضعيف وماله يأكل جزر و يبقي نظره 6 علي 6 ..ابن الغلبان خد امتياز في كلية السياسة والاقتصاد وماله نعينه مدرس تربية قومية هو يطول ؟..ابن الذوات جاب مقبول يله ع السلك الدبلوماسي طول ما الكهربا ماشيه في السلك.. البت دي جابت امتياز في الاعلام.. بتقول ايه يا اخويا.. معيدة ؟ ياعم دي محجبه تستني ابن الحلال.. بنت الدكتور »قرع كوسة« جايبة جيد مرتفع.. يا سلام طبعاً تنفع معيده دي سنيوره حتي عشان الصورة تطلع حلوه.. الواد ده الاول علي قسم الصحافة.. وماله يعمل له مجلة حائط.. لكن إبن الباشا يتعين فوراً ونديله تعظيم سلام كمان.. لأن ابوه »بيشيش« مع رئيس التحرير.. بتقول ايه.. فيه تعيينات ؟ الكشف ده جاي من الوزير الجامد اوي.. يا مرحبا ع العين والراس المهم الباشا يكون مبسوط.. القايمه دي تبع " هات ودنك " يا سيدي نضرب لهم تعظيم سلام وربنا يجعل كلامنا خفيف عليهم.. الكفاءات مالهاش مكان لان ال »C.V « مش ولا بد واولاد السلك مقبولين لان ابن الوز عوام.
انا اللي مستغرب له وهيجنني الراجل ده اللي اسمه اللواء احمد البدري ده ايه مساعد وزير الداخلية ورئيس اكاديمية الشرطة .. منصبه يخض وابنه يسقط في امتحانات القبول لكلية الشرطة ؟ .. عجايب .. يا راجل تسيب الواد عبدالرحمن اللي جايب 91 ٪ في الثانوية وكان عاوز يدخل الشرطة.. يعني ايه يسقط في الكشف الطبي ؟ الدكتور ده لازم يترفد ده لعب في عداد عمره.. سألت اللواء البدري هو ده معقول ؟.. قال لي هو ليه الصح ما يبقاش معقول ؟ رديت .. لاننا طول عمرنا عايشين في الغلط ..قال نحاول كلنا نبقي صح .. قلت يا ابو عبدالرحمن دلوقت اقدر اقول الثورة نجحت.. انت راجل من دهب وياريت الكل يعمل زيك.. يمكن تكون دي بداية الغيث ..آمين.