يحدث في مصر

ريهام إبراهيم : أهلا بكم مشاهدينا .. حلقه جديده من برنامج يحدث فى مصر هنتكلم النهارده عن مشروع ضخم جدا يمكن شعر به العديد من المصريين وهو إحياء القاهرة الفاطمية اللى تحمل عبقا دينيا ومعماريا وثقافيا نادرا بكل ما تحمله هذه الكلمة من معنى .
محمد المغربى :الجدير بالإهتمام والرد هنا أن مشروع القاهرة الفاطمية هو المشروع الذى يتصدى لما يُعرف بسيطرة المدنية الحديثه بما فيها من آلات ومعدات ووسائل تكنولوجية تمحو فى كثير من الأحيان ملامح التاريخ .
ريهام إبراهيم :لذلك تم وضع خطة كبيرة محكمة لإنقاذ القاهرة التاريخية أو القاهرة وتم الإنتهاء من 57 مشروع أثرى وجارى كمان العمل فى 25 مشروع أثرى آخر بيجرى إحيائها على أربع مراحل .
محمد المغربى :مشاهدينا الكثير والكثير عن الجهة المسؤولة عن تنفيذ هذا المشروع الضخم وهو جهاز إحياء القاهرة الفاطمية والإسلامية وأهم المشروعات التى قامت بتنفيذها سنتعرف عليه من م محمد شحاته رئيس جهاز إحياء القاهرة الإسلامية والفاطمية بوزارة الإسكان .. مساء الخير يا فندم .
م / محمد شحاته : أهلا بكم .
ريهام إبراهيم : مساء الخير يا فندم وقبل ما نبتدى فى طرح أسئلتنا بندعوا حضرتك لمشاهدة هذا التقرير مع الساده المشاهدين ونبدأ مع حضرتك حلقتنا .
م / محمد شحاته : إتفضلى يا فندم .
فاصل " تقرير"
يسعى الجهاز التنفيذى لتجديد احياء القاهرة الإسلامية الى إعادة القاهرة التاريخية الى رونقها ومكانتها العريقة كإحدى أهم المزارات الثقافية والإسلامية فى العالم وتحويلها الى متحف مفتوح ومزارٍ سياحى من طرازٍ رفيع خلال السنوات القادمة يستمتع به من يزور القاهرة وذلك عبر مشروعات الترميم التى تتم على مراحل متعاقبة بأساليب علمية متطورة .
الجهود الحديثة تتعاون فيها مختلف الوزراء مع المنظمات الدولية للتربية والعلوم والثقافة وذلك لإنقاذ الآثار الإسلامية فى منطقة القاهرة القديمة بتوفير كافة الإمكانية وإحداث تنمية إجتماعية وثقافية وإقتصادية لتعود القاهرة التاريخية فى أزهى عصورها .
فاصل
محمد المغربى :باشمهندس محمد يعنى أعتقد إن البداية الصحيحة فى هذا الحوار هو جهاز إحياء القاهرة الفاطمية كلمنا عن هذا الجهاز تاريخه نشأته عدد العاملين به عدد كوادره أهم مشروعاته حتى الآن ؟
م / محمد شحاته : طبعا الجهاز أنشئ سنة 92 أو أواخر 91 بالظبط يعنى كان الهدف من الجهاز هو تجديد أحياء القاهرة الإسلامية والفاطمية الموجودة ومرحلة الزلزال بتاع سنة 1992 يمكن كلنا فاكرينه فكان الجهاز دا فى التأكد من العناصر الإسلامية والأثرية داخل القاهرة اللى هى بصورة فنية ما إتأثرتش من الزلزال اللى موجود وعشان كده إحنا بدأنا ببعض العناصر المهمه اللى موجودة فى القاهره بالإهتمام بها معماريا وإنشائيا واثريا وتوسيع كمان فيها زى ما إن عارف حضرتك إن إحنا وزارة إسكان يهمنا فى المقام الأول برضه التأكد من سلامة المنشأ من الناحية المعمارية والإنشائية الخاصه به والموقع دا برضه إذا كان فيه نعمل له توسعه أو نعمل له تطوير للمنطقة المحيطة الخاصه به دا بيكون دور الجهاز .
ريهام إبراهيم : يعنى توسعة فقط .. يعنى مثلا مافيش ترميم أو تحديث الأماكن التاريخية اللى هى بتتماشى مع أصالة وحضارة هذا المكان وتحديد متحف إسلامى مفتوح .
م / محمد شحاته : الآثار طبعا هى القاهرة تعتبر كلها متحف إسلامى يعنى متحف إسلامى دا القاهره كلها طبعا القاهره كلها يعنى عايزه من الناحية المادية ومن ناحية الوقت ومن ناحية الجهد يعنى عايزه جهد كبير جدا لكن إحنا بنشوف العناصر المهمة اللى داخل القاهره وصورناها يعنى أدى مثالا مثلا مسجد السيده زينب – مسجد السيده زينت إتصور على ثلاث مراحل من أيام الملك فاروق وبعدين عهد جمال عبد الناصر وبعدين عهد السيد الرئيس حسنى مبارك التوسعة إللى إتعملت فى مسجد السيده زينت يمكن ضعف اللى إتعمل قبل كده بالإضافة الى تطوير المنطقة المحيطة يعنى الميدان بتاع مسجد السيدة زينب أتطور برضه بواسطة الجهاز المبانى اللى حوالين مسجد السيده زينت برضه بتتطور الناس بيبقى ليها سلوكيات مختلفه جدا لما يلاقى منشأ إتعمل له أصاله وله روح تاريخية أو مكانه عندهم بيبتدوا يحافظوا عليه الى حدٍ ما ولكن جهاز القاهره الفاطمية بيلبى رغبات السكان .
محمد المغربى :ليه فيه كتير من الأنماط الناس بيقول إن الجهاز بيتبع وزارة الثقافة وبما إنه يتبع وزارة الثقافه فله أن يتعامل الأثر .؟
م / محمد شحاته : هو طبعا أنا هأقول لحضرتك اللى بيشتغل داخل القاهره وزارة الثقافة وزارة الإسكان بعض الجمعيات الخاصه اللى هى جمعيات بتقوم زى مثلا مؤسسة أغاخان أو بعض الجمعيات الثانية بتقول بجهد برضه فى القاهره ولكن إحنا محتاجين الجهد من كل فرد المفروض يبقى فيه تنسيق بين الوزارات أو الهيئات المختلفة اللى بتقوم بترميم أو المساهمة فى الحفاظ على القاهره والعناصر بتاعتها الموجودة وطبعا كان فيه حتى أنا فاكر كان فيه لجنه مشكله لمحافظة القاهره بتضم بجانبها اللى هى العناصر اللى شغّاله فى وزارة الإسكان او الثقافه أو جمعيات أهلية أو للمساعدة فى المحافظة على العناصر الأثرية فى القاهره طبعا حتى لما بنشتغل فى منشأ أثرى من الناحية الإنشائية والمعمارية والأثرية بإشراف وزارة الثقافة والمجلس الأعلى للآثار بيبقوا موجودين معانا الإثريين اللى موجوديه للحفاظ على المنشأ الموجود .
ريهام إبراهيم : يعنى كده الجهاز له دور آخر أيضا فى خدمات مقدمه أخرى فى المجتمع بشكلٍ عام ممكن نتعرف مثلا على الشباب إيه دور الجهاز للشباب ؟
م / محمد شحاته : طبعا نكلف ببعض الأعمال من وزارة الثقافة مثلا مشروع الإسكان وزارة الإسكان إحنا نعتبر جزء منها فطبعا إحنا بنساهم فى مشروع إسكان الشباب يعنى عندنا حوالى 2448 وحده سكنية فى إسكان الشباب فى مدينة 6 اكتوبر وجارى إنشاء اللى موجود حاليا دلوقت طبعا ده مساهمة من الجهاز فى الخدمات بتقدمها وزارة الإسكان بتدى للشباب فرصة للسكن والإقامه .
محمد المغربى :يعنى عمل الجهاز زى ما تقول كده بروحين روح فى المجال االأثرى والفاطمى ورح آخر فى مجال التنمية يمن الآن مش تعارف عليه قوى يمكن إسم الجهاز نفسه هو إحياء القاهره الفاطمية غالب على العمليات ديه حضرت تقول لنا إيه هى الخطة الموضوعة الآن لإحياء القاهرة الفاطمية خاصة بعد ما تم إفتتاح شارع المُعز يعنى فيه خطوات جرت على الطريق ؟
م / محمد شحاته : آه طبعا خطة بتوضع أو تحت الدراسة لسنوات قدام كتير أعتقد الى 2050 للقاهره اللى موجودة وطبعا أتمنى إن الجهاز عندى يكون جزء منها يعنى كوزارة إسكان أتمنى .
ريهام إبراهيم: هو ممكن الجهاز بحجمه وثقله دا ما يبقاش جزء فاعل ؟
م / محمد شحاته : هأقول لحضرتك حاجه طبعا مسؤلية الحفاظ على الآثار والعناصر الأثرية ديه بتتبع وزارة الثقافة وإحنا إذا كُلفنا من وزارة الثقافة بأى شغل تبع الثقافه أو تبع وزارة الأوقاف إحنا ما بنتأخرش عنه تماما .. طبعا أتمنى يكون فيه تنسيق بيننا وبين المحافظة أو بين وزارة الأوقاف وبين وزارة الثقافة بحيث إن إحنا نساهم فى المشروع ده إن شاء الله .
محمد المغربى :هل إنت راضى يا باشمهندس عن إسم الجهاز ولا شايف إن إسم الجهاز محتاج الى تعديل طبعا الجهاز برضه بيشارك فى إتجاهين الحفاظ على القاهرة وفى نفس الوقت بيساهم برضه فى مشروعات الإسكان .
م / محمد شحاته : هو طبعا أى تكليف بيتم من الجهاز الواحد بيبقى فخور به .
ريهام إبراهيم : المشروعات الخاصه بالتنمية وهى فيها كده بعض المعانى منها عنوان إسم الجهاز ترميم المساجد الإسلامية بشكلٍ عام فيه مساجد ثانيه شارك فيها هذا الجهاز فى إحيائها وإعادة ملامحها الجميلة مرة أخرى ليها ؟
م / محمد شحاته : آه طبعا إحنا عندنا بدأن من مسجد الإزهر – مسجد السيده زينب – مسجد سيدنا الحسين حاليا دلوقت المسجد الأحنفى فى طنطا أو بما يسمى مسجد السيد البدوى إحنا إن شاء الله بإذن الله هيتم إفتتاحه قريبا بعد إسبوعين إن شاء الله هيكون إنتهى تماما وهيتم افتتاحه إن شاء الله .
ريهام إبراهيم : دا أخذ وقت قد إيه يا فندم ؟
م / محمد شحاته : أخذ فى حدود 4 سنوات .
ريهام إبراهيم : إعاد كان فيه مثلا أجزاء مهدوده وكان فيه آثار لملامحها مفقوده ؟
م / محمد شحاته : طبعا فيه أجزاء أثرية داخل المسجد اللى هى مثلا القبه بتاعة المسجد المقصورات أو المقصورة الخاصة بالسيد أحمد البدوى اللى موجودة هناك لكن دا إحنا بنهتم برضه بالناحية الإنشائية يعنى جميع الأساسات بتاعة المسجد تم تدعيمها الأعمده وبطرق حديثه يعنى حضرتك قلت التكنولوجيا الحديثه بتطغى على الملامح .
يعنى فى نفس الشغل اللى موجود أو داخل القاهره طلب مننا أو من المحافظة إن إحنا نساهم فى ترميم المسجد الأحمدى اللى هو كان موجود وطبعا أى حاجه بتُطلَب من وزارة الإسكان ما نقدرش نتأخر عنها.
ريهام إبراهيم: يعنى هنستكمل هذه المشروعات وهنتعرف أكتر على دور الجهاز مع حضرتك ولكن فاصل ونواصل هذه الحلقه من برنامج يحدث فى مصر .
فاصل
محمد المغربى :عدنا اليكم مرة أخرى مشاهدينا الكرام والحديث متواصل مع م محمد شحاته رئيس جهاز تجديد أحياء القاهرة الإسلامية والفاطمية باشمهندس محمد يمكن الحديث أيضا يتعاظم عن بعض الجهات بالتعاون مع هيئة الأبنية التعليمية فى تجديد إنشاء المبانى التعليمية هل فى هذه الحالة مثلا بتكون المدارس بشكل طراز إسلامى طراز فاطمى ولا أيضا فقط متخصص بالعمران ؟
م / محمد شحاته : لأ طبعا زى ما قلت لحضرتك طبعا إنشاء مبانى سكنية لإسكان الشباب فى المناطق والمجتمعات العمرانية الجديدة بيتطلب بعض الخدمات اللى موجودة زى مثلا المدارس زى حضانات للأطفال زى مراكز إجتماعية كل ما يمكن لمجتمع متكامل مش هأعمل مساكن ومافين مدارس للأطفال اللى هى موجودة أو حتى للمرحلة الإعداديه والثانوية فطبعا إحنا أخذنا برضه ضمن الشغل بتاعنا بعض المدارس اللى هى النماذج بتاعة الأبنية التعليمية أو مطورة يعنى أنا بأقول برضه إحنا .
ريهام إبراهيم : مطوره بمعنى إيه إنها بيتم تطويرها فبمثلا الجهاز بيشارك فى هذا التطوير ؟
م / محمد شحاته : هو طبعا فيه نماذج مطورة تم الإتفاق مع وزارة التربية أو هيئة الأبنية التعليمية على إننا ننزل بعض النماذج الجديدة يمكن إحنا متعودين على الشكل بتاع المدرسة من زمان لأ المدارس مطورة معماريا بحيث إن تبقى حاجه كويسه يعنى .
ريهام إبراهيم : يعنى فقط الشكل الخارجى ؟
م / محمد شحاته : والداخلى من جهة المساحة برضه ومن جهة الفصول ومن جهة الخدمات اللى هى موجودة
ريهام إبراهيم : عددها قد إيه يا فندم ؟
م / محمد شحاته : طبعا المدارس حسب النموذج اللى هو موجود يعنى إحنا عندنا فى منطقة هرم ستى فى اكتوبر حوالى 3 مدارس 2 منهم تعليم أساسى وواحده تعليم ثانوى فيه 2 فى الشيخ زايد فيه واحد فى المنطقة الثانية فى منطقة اكتوبر مع معظم المدارس اللى هى موجودة لأداء خدمة متكاملة للإسكان اللى هو موجود .
محمد المغربى :واضح الجهاز له باع فيما يتعلق بمشروعات الظهير الصحراوى .
ريهام إبراهيم : نشرح الأول إيه الظهير الصحراوى قبل ما نتكلم على دور الجهاز ؟
م / محمد شحاته :هو طبعا بعد البرنامج الإنتخابى لسيادة الرئيس بالنسبة لطلب الظهير الصحراوى مشروع واعد ومشروع كويس جدا طبعا الطهير الصحراوى المفهوم بتاعها إن أنا القرية اللى موجودة الأم فى منطقة خاصة مناطق الصعيد اللى هى موجودة بيتم عمل إمتداد ليها أو قرية مكملة ليها يعنى مثلا عندنا منطقة حلوان قريتين قرية أفصيح والقلادات بيتم عمل القرية -قرية أفصيح الجديدة هى تتبع القرية الأم اللى هى موجودة .. بعض القرى زادت التعداد بتاعها أو ما فيش مجال إن إنت فى زراعه فى القرية أو المساحات المزروعة بجانب القرية ما تقدريش تبنى عليها ما فيش مجال للناس اللى موجودين من الخدمات اللى موجودة.
محمد المغربى :زى قرية البهنسة مثلا ؟
م / محمد شحاته : قرية البهنسة بيتم برضه عمل القريه الجديده البهنسة الجديدة وبيبقى فى حالة تنوب يعنى ما يبقاش مثلا مبانى تقوم بعمل النواه نواة الصرف من المحافظة اللى هى مختصة وبيتم التوقيعات.
محمد المغربى :بأتكلم عن قرية البهنسة تحديدا هل تم المراعاه بشكل أو بآخر الجانب السياحى فى البهنسة يعنى البهنسة لك يوم بتختلف حالها يعنى بنى مازار بحوالى 60 كيلو وكل يوم بتبقى قريه تانيه ويوم السبت الصبح ترجع قرية البهنسة كما كانت هل تم مراعاة دا مثلا ؟
م / محمد شحاته : قرية البهنسة مش تبع الجهاز عندى لكن برضه يعنى كمفهوم لقرى الظهير الصحراوى إن إحنا بنجد مثلا مكان سكنى ومكان تنموى من أهل القرية الأم اللى هى موجودة أما الشباب اللى طالع من القرية اللى غيرموجودة لكن من الناحية الإجتماعية ومن الناحية الأسرية ديه مسؤلية المحافظة .
ريهام إبراهيم : هو الجهاز يافندم له فروع أخرى مختلفة مثلا بتتابع ترميم مساجد أخرى أو بتقدم خدمات أخرى فى المحافظات أو القوى .
م / محمد شحاته : فى القرى لأ الجهاز موجود فى القاهرة إذا طُلب مننا مشروع خارج القاهرة او داخل القاهرة ما بنتأخرش .
ريهام إبراهيم : يعنى فقط الجهاز مسؤل عن ترجمة هذا المشروع للواقع لكن ما فيش مبادرة ما فيش خطة موضوعة لمكان ممكن يكون الجهاز شايف إنه محتاج لترميم ؟
م / محمد شحاته : طبعا فيه مشروعات إحنا فى دراسات بالنسبة لها دا طبعا بالنسبة للمشروعات اللى داخل القاهره ديه بتتطلب من خلال السلطه أو التنسيق مع الوزارات المختلفة للموضوع .
محمد المغربى :هل ممكن نقول إن مشروع القاهرة الفاطمية هو المشروع الأبرز الخاص بالجهاز رغم تعدد المشروعات اللى حضرتك ذكرتها ما بين إسم الجهاز مؤثر على ذهننا وعلى إهتمامنا بمشروع القاهره الفاطمية ممكن يكون فيه موعد محدد نقدر نقول فيه إن إنتهت فعلا تطوير أو إنجاز مشروع القاهره الفاطمية ؟
م / محمد شحاته : أولا زى ما قلت لحضرتك فى الأول القاهره متحف كبير جدا والعناصر الأثريه والإسلامية وعددها غير محدود فطبعا عشان ادى ميعاد أقول إن إحنا خلصنا على جميع العناصر اللى موجودة داخل القاهره دا صعب جدا .
محمد المغربى : يعنى ما فيش خطة حتى لكده ؟
ريهام إبراهيم : وتبع توقيت معين ؟
م / محمد شحاته : أنا أتمنى .
ريهام إبراهيم : حضرتك اللى بتتمنى بس هى فى فعلا أكبر عملية ترميم الآثار .
م / محمد شحاته : طبعا وزارة الثقافة مشكوره جدا فى مجهود ما نقدرش ننكره فى ترميم الأثر وترميم العناصر الأثريه اللى موجودة طبعا بدليل خطه لترميم العناصر الأثر يه الله موجودة وإذا كُلفنا بأى فقره بالنسبة للخطه ديه إحنا موجودين .
ريهام إبراهيم : بدليل إنها بتسمى إنها أكبر عملية ترميم آثار هل دا مثل لما فيها من مجموعة أثريه عدد آثار كبيرة وإختلاف الآثار من ناحية الأديان فيها ؟
م / محمد شحاته : لأ هى مش بالظبط يمكن فيه فتره كبيره جدا كان الإهتمام بالعناصر داخل القاهره ويمكن بدأت العمليه ديه يمكن من التسعينات ودخلت فى ال2000 وإستمرت يعنى .
محمد المغربى :ليه ياباشمهندس المشاهد العادى ما يعرفش يحدد العمل اللى يقال اليه فى شارع واحد من شوارع القاهرة الفاطميه يعنى دا بيعتبر مشروع حتى دا جزء من مشروع لو قلنا مثل شارع المعز لدين الله اللى افتتح مثلا قريبا دا إستغرق العمل فيه 7 سنوات هو طوله 1300متر تقريبا إنما عشان يستغرق العمل فيه 7 سنوات دا حاجه شاقه جدا .
م / محمد شحاته : آه طبعا أولا مرافق متهالكه جد من داخل القاهره إعادة المرافق ديه اللى موجودة لحالتها البيوم اللى هى محاطه الشبكات بتاعة الكهرباء كل المرافق اللى موجودة دا بصرف النظر عن أعمال الترميم المشروع بيبقى بتدرس كل كبيره وصغيره فيه لإن طبعا مانتش عارف إيه اللى حصل خلال السنوات اللى هى مرت عليه ففى بعض الأحيان ما تعرفش إنت بتدخل على الأثر اللى موجود كأنك بتفتح بمشرح جراح كده وبتحاول تشوف ايه اللى موجود داخل المنشأ اللى موجود وبتواجه حاجات يمعن ممكن تلاقى يعنى مثلا أحكى لك من الناحية الإنشائية تلاقى معظم الأساسات مش موجودة أو إختلاف أنواع الأساسات فى المنشأ يعنى حاجات كتير الأعمدة مثلا اللى هى موجودة فى المنشأ التقنيات الى هى إتعملت بها قبل كده يعنى كل المبانى الإسلاميه بالحجر يعنى القاهره القديمة كلها مبانى حجر عايز برضه تطور فى الموضوع دا عاوز تقنيات حديثه وتقنيات متريده للتعاون مع الأثر اللى هو موجود .
ريهام إبراهيم : طيب والتعامل مع الناس اللى هى بتقطن المكان بتروح وتيجى عليه بيتم إغلاق المكان ده مثلا لمدة ساعات كبيرة مع توقف الأنشطه فيه مثلا لحين الترميم ما يتم ؟.
م / محمد شحاته : اولا الناس بتكون فرحانه جدا لعلمك حضرتك يعنى .
ريهام إبراهيم : فيه تعاون منهم .
م / محمد شحاته : تعاون جدا يعنى للحق يعنى بتبقى فرحانه جدا لإن هتتطور المنطقه اللى هى موجودة فيها أو العنصر اللى هو الأثرى أو الإسلامى اللى هوموجود.. مثلا مسجد الأحمدى لا تتوقف الصلاة فيه فى الفترة اللى إحنا تم الترميم فيها أو الإنشاء يعنى كان فيه خطة إن إحنا لا يتوقف الصلاة فى المسجد تماما لا ليل ولا نهار ويمكن المسجد الأحمدى بيرتاده كمية كبيره جدا من الناس اللى هم موجودين .
محمد المغربى :واضح على فكرة المساجد كان الجهاز كان له دور محمود جدا فيما يتعلق بمساجد آل البيت رغم إنه هو حتى وصل الى مساجد نائيه حتى المشاهد ما يعرفش مشاهد أهل الدول ما يعرفهاش مثلا مسجد السيده سكينه ومسجد السيده رقيه مسجد السيده فاطمه النبوية الشارع اللى فيه مسجد السيده سكينه شارع صعب للغاية لو عربيه دخلت فيه إستحاله تطلع .
م / محمد شحاته : آه هو عرضه يمكن ما لا يزيد عن 5 – 6 متر الشارع وصعب جدا المرور فيه وإحنا طورنا فيه مسجد السيده سكينه وعمل توسعة فيه وهو من المساجد المهمة فى المنطقة طبعا مازار البيت بيشمل من أول مسجد السيده نفيسه السيده رقيه السيده سكينه وبيدخل بعد كده بعض المساجد الثانيه اللى هى موجودة ودا إحنا بنختار بعض العناصر المهمة اللى موجودة أو يكون فيها خطر إنشائى أو خطر معمارى بنحب إن إحنا نبتدى بيها .
ريهام إبراهيم : يعنى هو دا الأساس فقط اللى بيتم عليه الإختيار ؟
م / محمد شحاته : لأ مش الأساس دا اللى بيتم عليه الإختيار برضه إحنا بنختار يعنى بنبص على الحالة الإنشائية برضه زى ما حضرتك قلتى وبنبص على قيمة الأثر اللى موجود يعنى مسجد الحسين أو مسجد السيده زينب أو الجامع الأزهر الشريف ديه معالم ما نقدرش ننكرها إن هى من أهم الحاجات اللى موجودة فى مصر فإحنا بأهمية الإثر اللى موجود وحالته برضه مش مهم الجهاز خلص المشروع سلمه سيان ممكن يسلمه وزارة الأوقاف أو وزارة الثقافة إذا كان أثر 100% .
محمد المغربى :هل هناك أى نوع من أنواع الصيانة مش هنقول المراقبة ولكن الفحص الدورى مثلا ؟
م / محمد شحاته : لأ هو طبعا مهم جدا بالنسبة لأى منشأ مش ضرورى حتى داخل القاهرة بعد ما يتعمل منشأ لازم أعمال الصيانة والمعالجة إستمرارية أعمال الصيانة اللى موجودة أحنا يمكن للأسف جزء الصيانة أو المتابعة الدورية أو كده مش موجود عندنا تماما أو موجود أتمنى إن هو يستمر – إستثمارات دوله برضه إتدفع فيها وتم تسليمها لوزارات والمتابعه المساجد مسؤلية وزارة الأوقاف حتى لو أثر على طول بيتم تسليمه لوزارة الأوقاف وهى بتقوم بمتابعته وإقامة الشعائر فيه وكل حاجه وديه بتبقى مسؤولية وزارة الأوقاف طبعا أتمنى إنه يتم برنامج تبع الوزارات المختلفة لعمل الصيانة وأعمال الترميم لإن مش عايز أرجع بالمنشأ بعد ما إندفع فيه إستثمارات إن هو يتهالك ثانى.
ريهام إبراهيم : الجهاز وقع إختياره على إيه فى الفترة القادمة لإعادة إحيائه ؟
م / محمد شحاته : إحنا منتظرين الخطه الجديده إن شاء الله ونشوف ننسق برضه مع .
ريهام إبراهيم: فيه مجموعة من المساجد برضه ؟
م / محمد شحاته : أتمنى طبعا الخطة اللى هنشوفها مع الوزارة إن شاء الله نحاول إن إحنا نعمل اجزاء كبيره إن شاء الله .
ريهام إبراهيم : نتمنى لكم التوفيق فى الخطط كلها لإعادة ترميم حضارة وواجهة تاريخية للقاهره وشكرا لحضرتك وبنشكر كمان الساده المشاهدين .
محمد المغربى :م محمد شحاته رئيس جهاز إحياء القاهرة الإسلامية والفاطمية بوزارة الإسكان شكرا لك شكرا جزيلا .
م / محمد شحاته : شكرا .. شكرا .
محمد المغربى :شكرا لكم مشاهدينا الكرام والوعد يتجدد بحلقات قادمة من يحدث فى مصر