وجهة نظر

عبد اللطيف المناوي : السيدات والسادة أهلا بكم من جديد واسمحوا لي أن أظل داخل هذا المكان المهيب بانوراما أكتوبر والذي أقامته قواتنا المسلحة تخليدا ومحاكاة لحرب الشرف وأرحب برجلين من أبطال تلك الحرب هما بالطبع خبيران عسكريان ولكن تظل اكبر صفة هي صفة البطل اللواء محمود خلف واللواء عادل شاهين أهلا بكما واسمح لي أبدا مع اللوا خلف وأسالك إحنا الحرب والنصر بيبدا من لحظة صعوبة لحظة ضيق لحظة مرارة مرينا بيها حرب 67 نكسة 67 كيف تتذكر أنت هذه الأيام أين كنت كيف استقبلتها
ل. د/ محمود خلف – خبير عسكري واستراتيجي: زي ما حضرتك تفضلت بنقطة الدروس والعبر فهنركز كلامنا في خلال الدروس والعبرأيا كانت الدروس بقى سلبية أوايجابية لان دا المهم اللي إحنا عايزين نستخلصه فلما نتحدث عن 67 وأنا خريح 64 احد الأخطاء اللي كانت موجودة ، أنا أتخرجت الى وحدات الصاعقة ثم إلى اليمن فكان اليمنى الوقت دا في الفترة دي فيها حوالي 60 ألف مقاتل مصري وكانوا وقت الحرب موجودين هناك ودا أول درس مصركانت تتصرف في هذا الوقت كدولة عظمى باعتبارإن إحنا في هذا التوقيت كنا بالفعل نملك أقوى جيش في الشرق الأوسط وأقوى من إسرائيل بدون كلام وبدون جدال .. الدرس الأول إن لماذا تدخل الحرب وكيف تدخل الحرب وكيف يتم دفع قوات دولة للدخول في حرب دون مبررودون تخطيط ودي كانت أول غلطة اللي تم عليها تداعيات لما أقولها بقى على نفسي إحنا لما جينا من اليمن ويادوبك بنتجمع مصر لحد يوم 15 مايو 67 عايشه طبيعي جدا في الفن وفي الفرفشة وكان نجم مصرعالي في المنطقة ككل ومكانش فيه أي مشكلة موجودة قواتنا المسلحة في اليمن الجيش القوات المسلحة المصرية في حالة التدريب والأحوال عادية لحد يوم 15 مايو الصبح 67 تم إعلان فجأة إعلان حالة الطوارئ في الجمهورية العربية المتحدة واستدعاء الاحتياطيات نخلي بالنا دا غير جائز يعني بهذه السرعة ودفعه إلى سيناء إحنا أتحركنا إلى سينا لا نعلم لماذا وحتى إلى أين كان فيه أخطاء كتيرة مش هنتعرض لها أنا هتكلم من المنظور بتاعي لان اياميها أنا كنت ملازم أول في وحدات الصاعقة ظابط استطلاع ومخابرات وحدة خاصة فالأول رحنا الإسماعيلية أتحركنا من الإسماعيلية طلعنا في أواخر مايو على العريش الشيخ زويد نلاقي العربيات واللواري جايبة الاحتياطي لابس جلاليب يعني
عبد اللطيف المناوي: غير مؤهل وغير مستعد ؟
ل. د/ محمود خلف: بالجلاليب ومن البيوت وكانت الناس تم استدعائها كانت تتصورالقضية مسالة تدريب معتاد بيحصل لاستدعاء للاحتياط بأعداد ضخمة جدا بتصل طبعا دا كلام غير معقول على الإطلاق إحنا كوحدة خاصة قعدنا ننتقل في سينا وناخد الإشارات لا روحوا المكان دا لما دخلنا غزة في المجموعة الخفيفة لقطاع غزة ومنها مرة تانية إلى إن إحنا لقينا نفسنا في منطقة " ميخل" على الطريق الأوسط اللي هو يروح من السويس لطابا عشان الناس تتذكرها وتواجدنا هناك إذ فجأة وصلنا إلى منطقة طابا المنطقة الجبلية المطلة على ايلات وكان فيه ضغوط سياسي وقع فيه المرحوم الرئيس جمال عبد الناصر في لعبة سياسية ما بين الروس والأمريكان بكلمة ضبط النفس ودي اخطر حاجة اتقالت لان عجلة الحرب إذا دارت تدورفلما أتقال كلمة ضبط النفس وأبناء جيلي لما يسمعوا كلمة ضبط النفس أصابتنا إحنا القوات المسلحة بإحساس غامربالفرحة وإحنا انتصرنا من دون ما نعمل أي حاجة وقالوا إن كل المشاكل الموجودة هتحل طبعا دا كان نوع من الخداع السياسي للرئيس عبد الناصرانسحب على حالتنا حتى المفككة لنكون مفككين اكتر قعدنا لخمسة يونيو الصبح ومحناش عارفين المسالة هتكون إيه خمسة يونيو الصبح شايفين الطيارات
عبد اللطيف المناوي: بتتحرك ؟
ل. د/ محمود خلف: أهLow flying أو طيارات واطية داخلة حتى ما تضربناش
عبد اللطيف المناوي: ما كنتوش انتو الهدف الرئيسي ؟
ل. د/ محمود خلف: لا لا لا ..كنا عند الحد الأمامي ماكنوش قلقانين هما عارفين هيعملوا إيه وبدأت عملية ضرب المطارات الاتصال بينا وبين القيادة كان مش موجود خالص معرفش حاجة متعرفش إحنا فين ولا نعرف قيادتنا فين الى ان حدث ما حدث اليوم التاني اليوم التالت قالو لنا حرس الحدود اللي كانوا موجودين في طابا قالو لنا دا في توجيهات من المشيرعامربأن القوات المسلحة ترجع غرب القناة خلال يوم!! طب إذا كانت القوات المسلحة قعدنا 18 يوم بالتحديد نروح نرجع أزاي !! دي اكبر خطأ رحنا متداخلين فبقت طرق سينا متداخلة ناس بجلاليب على ناس يعني
عبد اللطيف المناوي: حالة فوضى؟
ل. د/ محمود خلف: حالة من الفوضى لما تتداخل الوحدات ودي اخطر حاجة تعرض لها الجيش علشان تفصل بقى الوحدات خاصة إن معظمهم جايين النسبة ألاكبرأكتر منتلتين القوات المسلحة من الاحتياط مش عارفين أصلا هما بيتوهوا عن وحدتهم فبقت المسالة صعبة جدا فرجعنا القناة وبعديها مفيش نهاية يوم عن اليوم الأول والتاني كان العلم الإسرائيلي مرفوع على طول قناة السويس
عبد اللطيف المناوي: طب هاسمع من اللوا عادل اليوم دا تحديدا وهل بتعتقد إن إحنا جيشنا في 67 حارب دخل حرب ؟
ل/ عادل شاهين – خبير عسكري و استراتيجي: بسم الله الرحمن الرحيم أود ان اعبر في بداية اللقاء عن الشعور بالسعادة والبهجة في هذه الذكرى العظيمة في حياة مصر في العصر الحديث وهي ذكرى تحقيق نصر أكتوبر العظيم .. فيما يتعلق بملابسات حرب 67 الجيش المصري بدء ذي بدء الجيش المصري لم يحارب في 67 الجيش المصري كان عائدا للتو من اليمن كما ذكر أخي الفاضل بعد فترة كان مُشتت في اليمن يحقق أهدافا سياسية زعامية اكتر منها أهدافا ويحقق أهدافا استراتيجية لخدمة الفترة الزمنية التي كنا نعيشها في هذا الزمن عاد الجيش المصري ولم يمض وقت قليل إلا واتخذت قرارات بحشده في سينا وفي اعتقادي أن هذه القرارات لم تكن مبنية إلا على تقدير سياسي لموقف كلنا نعلمه في هذه الفترة وهو تخفيف الحشود الإسرائيلية على الجبهة السورية وخلافه فأجمالا لم يحارب الجيش إنما هي كانت مظاهرة عسكرية في اعتقادي ، نفس الجنود ونفس الضباط ونفس القادة ، قادة القوات المسلحة وجنود القوات المسلحة العائدين من اليمن والذين ادخلوا ما يسمى بحرب 67 هم نفسهم الذين خططوا ونفذوا هذه الملحمة الوطنية الكبرى في حب مصر
عبد اللطيف المناوي: سنة 67 حضرتك كنت فين ؟
ل/ عادل شاهين:أنا خريج يوليو 60 كنت في القوات المسلحة حتى بداية 64 ثم انتقلت إلى المخابرات العامة على وجه التحديد 13/10/64 عاصرت هذه الفترة وإرهاصات حرب 67 وكان التقييم العام وقتها - وأنا أستطيع أن أفضي أليك بهذا - أن التقييم العام أن مصر ليست مستعدة للدخول في حرب إلا أن مصر بجيشها وقيادتها السياسية دائما وأبدا في حالة استنفار حتى لو تعثرت في منتهى السرعة يتم إعادة لم الشمل وتوظيف كل القوى والطاقات واستنفار الهمم لاسترجاع ما فقد وهذا ما تحقق
عبد اللطيف المناوي: طيب هنا خليني اللوا خلف اسأل أيضا 73 ليس أبن 6 أكتوبر فقط ولكنه ابن الايام السابقة الشهور السابقة برضه أنت عشت هذه المرحلة في داخل القوات المسلحة عانيت مع كل الضباط من حالات نفسية فيها انزعاج شديد لحالة الهزيمة والرغبة في الانتصار ولكن إذا طلبت منك أن تصف لي هذه المرحلة الآن كيف كانت كيف مررتم بها شكل الاستعداد ليها كان أزاي ؟
ل. د/ محمود خلف: هو لما استكمل من خلال الرؤية الشخصية يمكن تكون ابسط
عبد اللطيف المناوي: أكيد بالظبط هو دا اللي بيحصل ؟
ل. د/ محمود خلف: إحنا أتحركنا من معسكر الجلاء اللي في إسماعيلية من وحدة الصاعقة اللي كنا فيها 550 رجعنا حاجة وتلاتين كان المنظر سيئ بين نلم العساكر من الشوارع في الإسماعيلية لان بدأت القوات الإسرائيلية موجودين تشوفهم بعينيك بالتحديد في منطقة نمرة 6 تشوف قاعدين مرصوصين واللي بيستحمى في المية يعني إحنا قاعدين بقى الناحية التانية ومتصورين ماحناش فيه سلاح في أيدينا غير البنادق اللي إحنا راجعين بيها ومشكلين مجموعات من الطريق والله يرحمه أتذكر الفريق مرتجي كان قائد القوات البرية وكان قائد الجبهة كان بيمر في الشوارع بنلم الناس كما لو كانت المسائل إحنا حاسين مصر ضاعت نعلم جيدا إن الروس حتى السلاح ليس السلاح على مستوى إسرائيل وفي نفس الوقت السلاح اللي موجود معانا محدود وبنصلحه فأصبح لينا يبقى بالفكر ألابتكاري وهنا من أعظم الدروس الكتيرة هنقول بعض منها لان أنا رحت في دورات دراسية في الولايات المتحدة الأمريكية وفي انجلترا وفي الناتو يعني الدبابة اللي بيسموهاA1-M1 رقم واحد دي لما صممت الحرب أول حاجة هاديك مثل عدد الدبابات في حاجة اسمها نسق الدبابات الإسرائيلية دي أول ما تحس إن حاجة هتحصل بيحرك الدبابات من الخلف تحتل مرابض في خط بارليف دبابة ماذا سوف تفعل في هذه الدبابة فأصبح فيه مشكلة إن إحنا مانخليش الدبابات دي في المراحل الحرجة الاولى تصل إلى الشاطئ القريب قدامها لأنها لو وصلت
عبد اللطيف المناوي: دي مدرعة ؟
ل. د/ محمود خلف: مدرعة تخش في الخرسانة يطلع منها الرشاش بيشتغل بالكهربا دا مطر من الذخيرة نص بوصة فظيع جدا وبعيار رئيسي وبزوايا زجزاج ما تعرفش حتى تيجي على موجتها وكانوا مستريحين لهذا النظام الموضوع دا مع الخرسانة إحنا شفنا بعينينا بقى خط سكة حديد كان لنا خط سكة حديد كان يطلع من القاهرة يروح لحد قطاع غزة دا فكوه وخدوا الفلنكات قدام عنينا وتتحط فوق بعضيها لحد ما بقى قدامنا جبل بارتفاع 8 ادوار او عمارة بارتفاع 8 ادوار لان القيادة العامة إحنا واقفين فوق وهما واقفين تحت يعني عايز تعدي وفيه حائط كبير فابتدينا نعمل يعني دشم عالية علشان حتى على الأقل حتى نبقى على الأقل على المستوى اللي إحنا فيه ابتدينا ننسى مشكلة الدبابات ابتدينا نفكر في فكرة قالك الله طب ليه كل الكتب العسكرية تقول ان الدبابة لا يقتلها إلا دبابة أو مدفع مضاد للدبابات جيد طاقم جيد إنما الدبابة دبابة دا العقائد العسكرية استقرت إليه حوار دار بين جيش القائد 17 الأمريكي في ألمانيا بعد كده فرحنا ابتدينا ندرب العساكر أو الجنود كيف الجندي دا يتحول إلى مقاتل للدبابة فابتدينا نجرب بقى حاجات كتير ايه نقط الضعف اللي في الدبابة ..الدبابة قوية بالمواجهة الدبابة قوية لما تقرب عليك دبابة وتضرب نار تتخض منها أزاي الأول تتدرب ما تتخضش منها تترمي والدبابة تعدي في النص أزاي لما تعدي تفكر تضرب من الخلف طب هيضربها من الخلف بايه ابتدينا نفكر والمهندسين المصريين في قنبلة لاصقة دا بعد كده كنا بناسر الدبابة اللي من تحتيها يطلع يفتح البرج لو البرج مفتوح لو شفنا دبابة بعد كده
عبد اللطيف المناوي: برجها مفتوح اللي هو البرج الأعلى دا ؟
ل. د/ محمود خلف: نأسرها في اقل من 30 ثانية بقت صيدة شوف بقى الدبابة اللي بتضرب واحد هينط ينط ينط ينط من ضهرها بقنبلة يدوية بالمنظر دا يعمل قنبلة ويعمل للطقم بأيده كده بيطلع الطقم بعد كده في حوار كنا فيه مناورة للجيش ال17 في ألمانيا الغربية سنة 82 جربوا دبابة جديدة لان هما الأمريكان قالوا ان المصريين خرجوا الدبابة من المعرض كابتكار
عبد اللطيف المناوي عايز اعرف برضه ملامح عن خطط الخداع التي تم استخدامها في تلك المرحلة للوصول إلى سرية بداية الحرب والمفاجأة اللي هو كان احد العناصر المهمة الحقيقة في المعركة ؟
ل/ عادل شاهين:واقع الأمر خطة الخداع الاستراتيجي هذه الخطة بدأت مبكرة وتطورت بهدوء شديد على نحو غير محسوس
عبد اللطيف المناوي : يعني خليني افهم هناك في البداية خطة موضوعة لها ملامحها لها مراحلها ويهتم تنفيذها ؟
ل/ عادل شاهين:جزء من هذه الخطة القوات المسلحة قيادة القوات المسلحة كانت تنفذ هذا الجزء الخاص بها اعتقد أني أستطيع أن أوجز في الحتة دي وأقول إن على سبيل المثال جميع الظباط كانوا بينزلوا أجازاتهم في مواعيدها جميع الظباط اللي كانوا يرغبوا في أداء العمرة أو الحج كانوا بينزلوا طوال فترة إعداد الدولة للحرب كل هذه الأمور كان من شانها أن هي تعطي نوع من التطمين للجانب الإسرائيلي بان المفهوم السائد عندهم ان مصر وجيش مصر جثة هامدة ولن يجرؤ انه يتخذ قرار بالاستعداد أو للحرب ..برضه احد عناصر خطة الدفاع الإسرائيلي كانت تنفذها رياسة الدولة من خلال اتصالاتها ومن خلال لقاءاتها السياسية كان ينفذها الدبلوماسيون من خلال المحافل الدولية ومن خلال العلاقات الدبلوماسية كانت المخابرات العامة في هذه الفترة تنفذ الجزء الخاص بها في خطة الخداع الاستراتيجي من خلال عديد من الأدوات السرية والمهنية والتقنية على سبيل المثال نعلم جيدا في العمل المخابراتي أو التجسسي يوجد ما يسمى بالعملاء المزدوجين هؤلاء العملاء المزدوجين كانوا يزودوا بمعلومات زائفة وأود أن أشير إلى أن المعلومات الزائفة إجمالا إذا استطعنا أن نحدد جملة تعطي معلومة زائفة تبدأ بجزء حقيقي ثم تتوسطها جزء يعطي نوع من الشك ثم تنتقل في الجزء التالت إلى تشتيت الفكر فينتهي من يستقبل هذه المعلومة إلى انه يستقبلها ويحللها فلا ينتهي إلى قرار يقيني بصدق ما ذكر
عبد اللطيف المناوي: هل ممكن حضرتك تديني نماذج لما تم عمله في تلك المرحلة ؟
ل/ عادل شاهين:زي ما قلت لحضرتك بنعطي معلومات مزيفة معلومات تشكك من شانها يعني بنسعى مثلا لان إحنا نجيب سلاح من جهة معينة في الغرب دا يعطي نوع من التشتيت له ودا جزء غير حقيقي ثم في نفس الوقت ننفذ تطوير معين في الأسلحة الموجودة لدينا إذن كنا نشغل فكر وطاقة المخابرات الإسرائيلية في توجهات أخرى غير ما نركز فيه
عبد اللطيف المناوي : يعني خلينا نقول ان هناك كانت معركة أخرى موازية لمرحلة الاستعداد للحرب معركة موازية بين الجهازين ؟
ل/ عادل شاهين:سيدي لابد أن نعلم جيدا أن القوات المسلحة لأي دولة وجه .. الوجه الآخر مخابرات هذه الدولة جهاز مخابرتها المعني بالحصول على المعلومات
عبد اللطيف المناوي : حجم التعاون إيه الي كنتوا بتجدوه من المواطنين المصريين البسطاء العاديين عندما يطلب منهم الدخول في مثل هذه المسألة حتى لو كانت فيه مغامرة بحياتهم ؟
ل/ عادل شاهين:رائع.. حضرتك سألتني سؤال رائع في هذه الفترة بالذات فترة إعداد الدولة لحرب والاستعداد للحرب كان هناك تعاون كامل من المصريين واستطيع إن أنا أؤكد أن الكثير من المصريين سواء كانوا طلبة او غيرهم او إلى أخره كانوا يبادروا بالاتصال بجهاز المخابرات العامة المصرية ويضعوا أمامه المحاولات التي كانت تجريها المخابرات الإسرائيلية للاتصال بهم وتجنيدهم وهنا كان يشكل مجموعات لاستقبال هؤلاء الناس وهؤلاء المصريين وإعادة تصديرهم مرة أخرى للعدو الإسرائيلي بسيطرة كاملة حتى نستطيع من خلالهم دس معلومات من شأنها تشتيت من يستقبل المعلومة ومن يفكر فيها ومن يحللها فلا يستطيع ان يجد وأقول في هذا أن نسبة كبيرة جدا من المعلومات المزيفة بنى عليها القيادة الإسرائيلية سواء كانت سياسية أو عسكرية بنت عليها تقييمها للأحداث ومن ثم كانوا لا يتصورون أن تجرؤ القيادة السياسية في مصر أو تجرؤ قيادة القوات المسلحة أن تقدم على اتخاذ هذا القرار الحقيقة تعتبر خطة الخداع الاستراتيجي بكل مستوياتها وأقول واحدد بكل مستوياتها كانت أعظم خطط الخداع الاستراتيجي في العصر الحديث وتدرس ويستشهد بها وأنزلتمفاجأة قاسمة لما كان يروج في هذه الفترة أن جيش الدفاع الإسرائيلي ذو ذراع طويلة ولا يمكن هزيمته
عبداللطيف المناوي :كانت مفاجأة بالفعل السيد الل. محمود خلف وهنا بارجع للنقطة التي توقفت عندها وهي فكرة انتوا كنتوا بتعملوا دراسات بتعملوا اختبارات مختلفة عشان اختيار التوقيت ؟
ل. د/ محمود خلف: لما جينا قلنا التوقيت ليه التوقيت الساعة أتنين ..؟ اصل يوم السبت يوم "كيبور" فمن يوم الجمعة بالليل ليوم السبت بالليل فيه تعطيل للحياة في إسرائيل لأسباب دينية
عبد اللطيف المناوي : احتفالات دينية خاصة بيهم ؟
ل. د/ محمود خلف: احتفالات دينية ..طيب ..الحروب بتقوم الصبح دا أول ضوء عشان تعرف تاخد أول ضوء فكان عندنا مشكلة إن الساعة أتنين اتنقت على اعتبارات كتير لو بدينا أول النهار ابتدينا نحسب تبدا تركب الكباري وتنجح هيبقى لسه ضوء بقية اليوم هيسمح للقوات الإسرائيلية الجوية إنها تطلع طلعاتها الاستراتيجية تطلع تدمر لي الكباري فانا عايز لما انصب الكباري الكوبري بياخد 3 ل4 ساعات كنا ابقى دخلت في الليل دي النقطة رقم واحد فالليل نقدر نعدي المعدات التقيلة لأن عبور الدبابات عملية مش سهلة وسهل اصطيادها الحاجة التانية إن لما نبص للشرق والغرب الساعة أتنين بتبقى انحرفت زاوية الشمس ناحية الغرب في اتجاه الغروب فالساعة أتنين بيبقى شعاع الشمس أفقي بس قرص الشمس موجود في الغرب يواجه الطيران الإسرائيلي القادم من الشرق وجميع أجهزة الرؤية والمدفعية أول ما هتبدا تصوير ماكنش إلكترونيك في ال system الحالي فضوء الشمس هيعمي الطيار وهما طلعوا قالوا "ذئب في قرص الشمس " يعني الطيار بيطير وقرص الشمس في وشه اللي هي الضربة الاولانية ما يشوفش ولا المعدات البصرية ودا برضه خدناه من معركة اسمها "الكروسيدر" اتعملت في الحرب العالمية التانية من ضمن الأفكار لاستخدام الشمس فدي فكر ابتكاري
عبد اللطيف المناوي : أه يعني أنا الطلعة لما طلعت كانت الشمس بتكون في الخلف؟
ل. د/ محمود خلف: في ضهر الطيار بتاعنا كمقاتل أو عناصر مدفعية أي واحد فينا يعني لما يبقى الكشاف في ضهره هيشوف أحسن إنما الكشاف في وشه مش هيشوف فانا الشمس كشاف بالنسبة لي فبالنسبة لي وأنا باشتغل حتى أجهزة الرؤية بتاعتي وأجهزة التصوير بتاعتي وخصوصا لازم بيبقى عندي وضوح في الرؤية دقيقة لان الدبابة بتظهر على البيروسكوب أو التليسكوب بتظهر سنتي أو اقل وبتطلع وبتنزل فلما تبقى الشمس عليها تخليني أقوم جاي جايبها مظبوطة لو العكس استحالة محال يعني عكس الشمس في وشي الدبابة نفسها مش حتبان
عبد اللطيف المناوي : والتعبير بتاع " ذئب في قرص الشمس دا كان تعبير بتاعهم على الطيران المصري؟
ل. د/ محمود خلف: دا هما اللي قالوه على الطيران المصري وعلينا كلنا ذئب في قرص الشمس ما هو قرص الشمس فيه ذئاب بتطلع منه مش قادر يعمل الساعة أتنين لحد طبعا آخر ضوء نزل بالليل ابتدينا بقى إيه عبور بقى المعدات التقيلة وعناصر الدفاع الجوي الخفيفة وعناصر المهندسين الفكرة التانية اللي كنا خايفين منها الفكر ألابتكاري كلنا نعلم والجميع يعلم أن إسرائيل متفوقة في الحرب الالكترونية وان الولايات المتحدة أعطتها إمكانيات هائلة في الحرب الالكترونية علشان الفكر ألابتكاري أنا عايزه دلوقت ماقولش أنا عايز ماقولناش ساعتها عايزين معدات حرب الكترونية تكشف ما فيه حاجة اسمها ايه ال Electronic measure وبعدين Electronic measure وبعدين Counter Electronic measure ماعنديش بقى لا Counter ولا غيره قعدنا المهندسين المصريين يفكروا في الCounter بأبسط المسائل عشان نشوشلان الكوبري معدني أما بيركب في المية حتى الرادار بالليل رادار الطيارة يجيب رسمة الكوبري يضرب على 35 كيلو يجيب الكوبري معنى ان كوبري ينضرب دي مصيبة بالنسبة لنا لان فيه جدول زمني للعبور فعلشان كده اتعملت افكار اتعملت حاجات معدنية زي عشش الصفيح و بأفكار هندسية مهندسين مصريين فكروا ودرسوا الشعاع اللي طالع و أزاي الشعاع يرد أزاي أزيف له الشعاع باجي جنب الكوبري واعمل شوية حاجات صفيح فتاخد منه لما ترجع له الزاوية ترجعها له منحرفة فكنت تشوف المنظر الصواريخ تنزل جنب الكوبري مفيش صاروخ نزل ع الكوبري دا الابتكار ما هو دا لو هافتح الباب بس الابتكار دا جه منين وازاي ..؟ ماهو دا الشعب المصري الخلاق في تفكيره جه منين فيه حاجات شروط اساسية علشان ناخد الوقت ونقول للناس دلوقت أول حاجة عشان نبتكر كلنا انه يبقى فيه وضوح رؤية للهدف المطلوب زي ما اتقال لنا سينا دي لازم ترجع هدف زي ما تقول لواحد بقولك ايه خلص الموضوع دا بس اديتني وضوح رؤية فتدي للفكر الخلاق ..الفكر الخلاق من القوات المسلحة اللي أنا باحكيهولك دا طبعا مش القيادة العامة اللي فكرت فيه ..القيادة العامة مافكرتش القيادة العامة اديتك المشكلة وتطرح
عبد اللطيف المناوي : والمصريين هما اللي قاموا وفكروا وحلوا؟
ل. د/ محمود خلف: كان بيطلع من العسكري أفكار بس الهدف الكبير موجود معاه اصل مهم جدا ان القوات المسلحة والشعب متحدد له الهدف إذا اشتغلنا من غير هدف هنبتكر على ايه وبعدين مانتاش عارف الصعوبات بتخبي عليا الصعوبات لا ما بتنخبيش لا تستخبى عليك صعوبة ولا تجاملني تقولي الهدف والمشكلة ليه بقى الكلام دا..؟ لو احنا هنشتغل بالفكر الروتيني التقليدي زي ما كنت باتشاور مع حضرتك من شوية المشكلة والحل زي قضيب السكة الحديد هافضل ماتشي جنب المشكلة لو فضلت جنب المشكلة زي مصر دلوقت لو الحكومة بتاعتنا مشيت جنب المشكلة ، المشكلة بتزيد هو هيحاول يقلل من حجم المشكلة يعني دوره مش الهجوم على المشكلة لانه ماشي بالروتين انه يخفف من حجم المشكلة الفكر الابتكاري بيقول إيه لازم نسبق المشكلة أزاي نسبق المشكلة دا ابتكار ..
عبد اللطيف المناوي : وهارجع تاني أقف عند الفكر الابتكاري وقدرة المصريين على التجاوز هنقف على دا لكن فيه نقطة مهمة جدا ينبغي ان احنا نضعها سينا كانت محتلة والمصريين في سينا كانوا تحت الاحتلال الإسرائيلي سؤالي المهم المصريين اللي كانوا في سينا في الوقت دا علاقتنا كانت بيهم أزاي قد إيه كانوا مفيدين لينا قد ايه كان لهم دور في التحضير والاستعداد للحرب ؟
ل/ عادل شاهين:أود أن اطمئن الجميع أن الشعب المصري بكل نسيجه وفئاته على إقليم جمهورية مصر العربية كاملا شعب وطني شعب يحب بلده يضحي من اجلها إذا ما ألقيت الضوء على سكان سينا من بدو سينا هؤلاء كانوا على مسرح العمليات المنتظر
عبد اللطيف المناوي : بالظبط.
ل/ عادل شاهين:كانوا على مرأى ومسمع من الإسرائيليين وجيش الدفاع الإسرائيلي وبالقوات الإسرائيلية وفي نفس الوقت على مرأى ومسمع من قدرات المخابرات العامة المصرية والحربية إحقاقا للحق كانت هناك وسائل اتصال سرية بأدوات مختلفة للتواصل مع هذا الجزء من نسيج الشعب المصري اذكر تدليلا على وطنيتهم ان المحتل الإسرائيلي وهو يسعى للحصول على معلومات تؤكد على وجه يقين ان مصر تستعد كان من جانب آخر يسعى لخلخلة وإفساد وتدمير العلاقة العضوية لسكان سينا من البدو مع بقية الشعب المصري ..سعت القيادات الإسرائيلية إلى التواصل مع قادة القبائل في سينا وهم منتشرون في كل مكان بالتهديد والترغيب حتى أنهم كانوا يرقمون الجمال ووسائل الانتقال بأرقام حتى يشعرون أن هناك سيطرة كاملة عليهم في كل شيء كما ذكرت لحضرتك من خلال التواصل للمخابرات المصرية مع سكان سينا من الشعب المصري تم رصد أن هناك مؤتمر يحضرون له في موقع ما في سينا سيجمع رؤساء القبائل للاعتراف وللمناداة بان سينا جزء يجب ان ينفصل عن مصر وليس له علاقة بمصر لينفصل ويستقر
عبد اللطيف المناوي : دا كان سنة كام يافندم ؟
ل/ عادل شاهين:قبل الحرب حوالي سنة 72 في أول 72 ..هذا كان تمهيد ومحاولة من إسرائيل لإفساد تعاونهم مع الشعب المصري ولإفساد الروح الوطنية تمهيدا وكانوا لا يخطر على بالهم إن مصر هتسترد سينا هم يهيئون المجتمع السيناوي
عبد اللطيف المناوي : انه قدركم أنكم مع دولة إسرائيل؟
ل/ عادل شاهين:بالظبط كده جمع الناس في مكان ما وجاءت قيادة إسرائيلية كبيرة جدا وكان ينتظر حضور موشي ديان لهذا الاجتماع وبدأ الجميع يتحدث من قبائل سينا على إمكانيات سينا وقدراتها وممكن سينا تبقى حاجة عظيمة جدا الى ان جاءت القيادة المنوط بها أن تحضر وتبدأ الاجتماع الرسمي وأحضرت وسائل الاعلام العالمية والى اخره للإعلان عن هذا النبأ الذي من وجهة نظر إسرائيل يعد طعنة خنجرية في القيادة السياسية المصرية بأن هذا الجزء من الشعب المصري يريد أن ينفصل عنكم ووقف الخطباء إلى أن صعد إلىالمكان احد رؤساء القبائل وكان هو أكثرهم ويدعى اسمه الشيخ سالم الهرش وقدم للحديث بأن سينا جزء مهم جدا في خريطة مصر وان سينا جزء من الأمن القومي المصري وان شعب سينا جزء من الشعب المصري ولا يريد أن ينفصل ولا يريد ان يستقل إنماهو خاضع رغم وجود الاحتلال لقيادته السياسية في القاهرة هذا تدليل على ان العنصر المصري أينما كان وأينما وقع عليه من الظلم والغدر وتحديد قدراته وانه يبقى تحت فترة زمنية الا انه في داخله يتمتع بوطنية كافية لانه يحقق نجاح إذا أراد المصري أن يحقق نجاح فانه يحققه هذا إجمالا عن الشعب المصري
عبد اللطيف المناوي: هل يمكن القول بان التعاون المصرين من اهل سينا تعاون المصريين اللي ساكنين في سيناء كانوا احد العناصر المهمة في نجاح القوات المسلحة المصرية في حسم الحرب
ل/ عادل شاهين:بلا جدال كما ذكرت حضرتك كان هناك تواصل من أجهزة المخابرات المصرية سواء المخابرات العامة أو المخابرات الحربية وهي الأجهزة المعنية بهذه الفترة الزمنية والمعنية بالحصول على المعلومات اللي تؤثر على العمل العسكري القادم كان هناك تواصل كامل معاهم كانوا مثال للوطنية وسيظلون وأرجو أن تضع الدولة في حساباتها أن ترد الجميل لهؤلاء و أن تمكنهم من ان يقيموا حياة متطورة في سينا ويعمروا هذه الأرض
عبد اللطيف المناوي: ودا بالفعل احد المطالب المهمة واحد الأهداف المهمة الاستراتيجية لصفات المرحلة ..هنا خليني ارجع للوا محمود خلف الحروب لحظة الحرب لحظة القتال تظهر اصدق ما في داخل نفسية الانسان المعدن الحقيقي للرجال تجد فيهم الشجعان جدا المضحي وبتجد فيهم العنصر الاخر الشكل الآخر لحظة حرب أكتوبر برضه من خلال التجربة الشخصية كيف تذكر أنت تلك الأيام حرب أكتوبر ماذا أظهرت من المصريين من المقاتلين من الجنود على الجبهة ؟
ل. د/ محمود خلف: خلينا نقول قبل أيام من الحرب شكلنا العام أولا إحنا كنا بنشتغل بجد واجتهاد زي ما انا قلت كان عندنا حالة في قلوبنا الحزن يعني بالرغم إحنا بنقول وبنستعد كنا بنشوف العدو كنا بنشوف موشى ديان وكانوا بيركبوا ميكروفونات يشتمونا عشان تبقى عارف ويعملوا حفلات قدامنا وكان فيه بعد وقف إطلاق النار كان فيها مصلحة لينا للحركة إن الحركة بدأت تتحرك ابتدت تتحط وابتدت العجلة تدور فكان السؤال امتى ييجي اليوم يعني امتى ييجي اليوم ماحناش عارفين اول 72 بقينا في سبتمبر في اكتوبر خلص 72 ماحناش عارفين المناورات لا تنقطع ست سنوات من ساعة ماجينا من طابا ما بتنقطعش بالاف موضوع بالليل وموضوع علشان نشوف الكوبري وموضوع عشان نشوف العبور بالأفراد ومش عارف ايه وضرب المدفعية حاجات كتيرة كتيرة كتيرة ابتدينا نشتغل بس ابتدينا ايه المنظر صعب يعني مش قادر أقولك المنظر دا صعب جدا جدا جدا ان ترى يعني انا دايما أقول كان لون السماء دايما اسود مش ازرق وخط بارليف دا لونه رمادي اسود والعلم الإسرائيلي كئيب المنظر صعب جدا انك تعيشه لحد اللحظات أما ابتدينا كان عندنا إحساس ان فيه حاجة قادمة فيه شيئ هيحصل إلى أن فيه يوم السبت ولحد ما كنا بنشتغل قبلها ب 15 يوم من أواخر شهر 9 وبعدين كان المشروع هيخلص يوم 4 اكتوبر يوم خميس وبدأت فعلا وانتهى المشروع أخدنا الأوضاع ما إحنا موجودين حاجة اسمها مناطق تمركز
عبد اللطيف المناوي: المشروع دا اللي هو مشروع تدريب؟
ل. د/ محمود خلف: تطلع بقى ..لا..تاخد الأوضاع الهجومية إحنا عملنا الموضوع دا ييجي 10 مرات هما زهقوا مننا وبقوا يشوفوا الموضوع دا
عبد اللطيف المناوي: زي كل مرة ؟
ل. د/ محمود خلف: زي كل مرة ..وبعدين أتفتحت الأجهزة بحيث الخداع التكتيكي يظهر إن إحنا بنجمع الناس , قطورات السكة الحديد من يوم الخميس بالليل كانت بتتحرك الخط الحربي ييجوا من القنطرة وهما شايفين القطر متعبي عساكر رايح نازل على مصر يفوتوا قطر وفيه قطر تاني يوصل بالليل يعطلوه تنزل العساكر ترجع تاني بس كان فيه انطباع خلاص المشروعخلص يوم الخميس والجمعة القيادة تفضل يعني زي العادي مفيش حاجة غير عادية حصلت لان مثلا المشروع خلص الجيش هينزل اجازات الدفعة أجازات بتبقى نسبة معينة بتنزل اللي هما المتزوجين والي عندهم عيال يعني شوية حاجات كده العادي وطالع في الأجهزة عادي الأجازات فاستريحوا اكتر أقنعناهم نحن مفلسين تماما نازل أجازات والسادات دا الله يرحمه بيقول أي كلام العملاء أي كان رصدوا الكركبة كنا نتعمد في منطقة التل الكبير تلاقي فيها زحمة يشوفوا العساكر نازلة اجازة وبعدين نسبة تانية طب الدفعة اللي بعديها تنزل الحد يقعدوا تلت تيام ويرجعوا يعني وخففوا بس الناس ايه في مكانها لحد يوم السبت الصبح لحد التوقيت دا لا يدعي احد بأي حال من الاحوال لحد يوم السبت الصبح يعلم احد في حاجة اسمها يوم " ي " وساعة " س " دايما الخطط لما بتتعمل علشان ينحط كل واحد دوره بيتقال يوم العمليات دايما يوم "ي" وساعة العمل" س " وبعدين تركيبهم يوم "ي" يطلع ايه السبت الصبح على الساعة 9 الصبح الله يرحمه المشير أحمد إسماعيل وصل قيادة الجيش وقال اليوم "ي" النهاردة 6 اكتوبر يبقى ناقص ساعة" س " الساعة اتنين بلغها قادة الجيوش , قادة الجيوش بداوا عن طريق القيادة مستويات القيادة احنا عرفنا مع مجموعة الصاعقة الموجودة شمال الإسماعيلية عرفنا يمكن حوالي ساعة ونص يعني اتناشر ونص جالنا التوقيت وبعدين المطلوب مننا اللي احنا دربنا عليه هيتنفذ وبدا توقيت اللي هو خط عبور القناة بالقوات الجوية ثم القصف بالمدفعية كان فيه زلزال بيتم في الأرض اول ما بنقول للناس احنا بنقول بالراحة للناس بيحصل كده كلمة الله اكبر في اللحظة دي يعني لحظة العسكري أقوله نزلنا تحت ما حنا عارفين هنعمل ايه اول حصة طيران هنعدي الناس وهي بتحط اللنش علشان ننزل المية الله اكبر دي يمكن صدى الصوت كان في ودني من اول بورسعيد لحد السويس ماحدش لا قالنا نقول ولا إحنا قلنا لهم لدرجة ان كان حتى ترتيب في العبور يعني من ضمن الحاجات على الجندي المصري فيه ترتيب لحاجة اسمها نسق يعني المجموعة الاولانية بتعدي وطبعا لان عرض القناة القوات كتيرة ففي مرحلة مهمة هتطلع وبعدين بعديها هينزل الفاصل اللي حصل لما أتقال للناس حتى الأنساق الخلفية
عبد اللطيف المناوي: عايزين؟
ل. د/ محمود خلف: مش عايزين نزلوا فعلا يعني كان منظر خلاص يعني فيه مرحلة متقدرش تفرملها هو كله نازل بس هيعدي الناحية التانية هيعدي كل واحد هيبقى عارف مهمته بيعمل ايه ودي نقطة مهمة عايزة دلوقت في الفكر مفيش واحد كده ماشي تايه لا هو عارف مش هتكلفه مش هنقول لحد أي حاجة وبعدين القائد من بيبقى عندنا الفكر الابتكاري من كتر ما أتدربنا عليه بقى عندنا التفكير ساعة انت بتحط خطة عالعدو بطريقة معينة اما بتيجي تنفذ ليس بالضرورة ان عقل الجندي او عقل الموقع الإسرائيلي اللي قدام مني هيفكر بالطريقة اللي أنا حطيت عليها وأنا ضامن مش ضامن أنا بابقى حاطط خطة مبدئية بس قدرة التفكير بقى لو هو هاجم عليا بخطة تانية انا عندي من المرونة اتدربت على المرونة هاهاجمك وعارفرد فعلك تعملي رد فعل مفاجئ مع المجموعة توائمنا في رد فعل في نفس التوقيت
عبد اللطيف المناوي: ودا تم التدريب عليه مرات ومرات ومرات ؟
ل. د/ محمود خلف: وبعدين إحنا أصحاب قضية والعسكري الإسرائيلي مش صاحب قضية إحنا أصحاب قضية
عبد اللطيف المناوي: ودا عنصر مهم جدا.
ل. د/ محمود خلف: ودا كان مهم جدا بس أهم حاجة بقى إن القوات المسلحة سواء اللي كانت في الهجوم من تلت تربع الى مليون كل واحد مهما كبر او صغر شانه يعلم جيدا دوره بالظبط لحد الجندي بتاع التعيين اللي هيجيب مية لحد الجندي اللي حتى حيخبز رغيف العيش
عبد اللطيف المناوي: هارجع لدا مرة تانية اللوا عادل إيه رد الفعل اللي كان عندكوا في اللحظات الاولى رد الفعل الإسرائيلي كيف تعامل مع الموقف إيه هو اللي رصدتوه في خلال اليوم الواحد ؟
ل/ عادل شاهين:حضرتك تعلم جيدا ان المخابرات العامة على وجه التحديد دائما وهي بصدد مواكبة عمل تاريخي استراتيجي تقوم بالدراسة المسبقة دراسة دقيقة من كل الجوانب وتضع في حساباتها أسوأ الاحتمالات حتى تكون جاهزة لاتخاذ القرار المناسب في الوقت المناسب كان هناك تفاؤل كبير جدا ولكن لم يكن تفاؤل عشوائي او ضربة حظ إنما كان تفاؤل مبني على تخطيط سليم ومبني على عمل جاد سبقه منذ سنوات واشير في هذه الجزئية إلى أن تعلم حضرتك وكلنا نتذكر بعض من عاصر هذه الفترة إن الرئيس الراحل أنور السادات أطلق حديثه في احد خطبه السياسية احد خطاباته السياسية ان عام الحسم عام 1971 تناولته أجهزة الإعلام العالمية والمحلية على انه للاستهلاك المحلي لأنه كان قد كثر الهمز واللمز داخل مصر وفي العالم العربي عن تراخي مصر أو قدرة مصر وعدم قدرتها هذا الموقف كنا سعداء ان هما قيموه كده انه للاستهلاك المحلي ولكنه في واقع الأمر كان قرارا استقبل بأنه على الجميع أن يستعد ويستنفر كافة قدراته لتوظيفها لانجاز النجاح في الحرب القادمة
عبد اللطيف المناوي: يوم 6 أكتوبر رد الفعل الإسرائيلي وفقا لما تم رصده وقتها؟
ل/ عادل شاهين:كان يرصد في يوم 6 أكتوبر وقبله ساعة بساعة من خلال الادوات السرية للمخابرات العامة المصرية داخل إسرائيل وداخل الدول الغربية التي كانت تؤيد وتناصر إسرائيل زائد رصد لردود الفعل عند كافة أجهزة المخابرات المعنية بهذا الحدث كانت كلها بدءا من أيام حرب الاستنزاف كانت ردود فعل رهيبة داخل إسرائيل اتهامات بالتقصير للقيادات العسكرية والسياسية اتهامات بان إسرائيل لن تتمكن من الحفاظ على سينا وكانوا يعالجوا هذه المواقف بشكل تطميني ويطمئنوا قادتهم السياسيين بأن مصر جثة هامدة ولن تستطيع...
عبداللطيف المناوي: طيب هنا الل. خلف هنا البعض بيحلو له في الواقع أن يتعامل مع حرب أكتوبر باعتبارها بالتشكيك في النصر هل لك ان تقوللي إيه هو مفهوم النصر ما هو النصر وكيف يمكن ان نطبقه على حرب أكتوبر ؟
ل. د/ محمود خلف: كويس قوي النقطة دي الدنيا تايهة فيها شوية والنهاردة لسه بيقولوا الثغرة ..ما تيجي نتكلم على حرب أكتوبر الكلام اللي أنا قلته واللي أنا وصفته لأي مواطن عايز يعرف أي حرب في الدنيا نتيجة الحرب بعيدا عن ارقام الدبابات التي تم تدميرها والطائرات التي تم إسقاطها والصواريخ التي تم اطلاقها والى اخره يسال سؤال ويقارن بين حاجتين اتنين الموقف السياسي قبل الحرب ويقارنه بالموقف السياسي بعد الحرب لما تقولي بقى بعيدا بقى عن إيه الحرب لما تقولي ما هو الموقف السياسي لمصر قبل السادس من أكتوبر العلم الإسرائيلي مرفوع على شبه جزيرة سيناء 61 الف كيلو متر مربع 6.1 % من مساحة مصر دي النقطة رقم واحد موجود زي ما هو موجود في الجولان يعني هو موجود في الجولان من ساعتها نمرة واحد..نمرة اتنين إحنا لا في حالة سلام ولا في حالة حرب مصر ميزانيتها في هذا التوقيت زي ما قالوا الرئيس السادات الله يرحمه وزي ما نشر يوم 6 اكتوبر كان الخزانة المصرية فيها 35 ألف دولار مصر كانت في نظر لا يوجد أي ثقة في مصر في عيون لا العالم العربي ولا العالم كله مفيش أي ثقة في مصر لما مصر قعدنا نقول طيب حالة سلام طب نحل سلام ودي نقطة مهمة جدا نحل سلام وراح حافظ إسماعيل الله يرحمه اللي هو مستشار الامن القومي وراح لكيسنجر قال له سلام مين اللي بتدور عليه انتوا مهزومين اتقالت له كده انتوا مهزومين ..انتوا ناس مهزومين مالكوش انكوا تطلبوا حتى يمكن قبلها بسنة لما الرئيس السادات حرك بس شوية وافتح قناة السويس ونخلي فيها عملية عبور عايزين دخل عايزين فلوس الاسرائيليين ضربوا بالمدفعية في القنال وقالوا لا القنال ما يتفتحش الا باذن مننا ..اما كان بيتقال يكفي موشي ديان بيقول جثة هامدة كل الكلام دا اللي كان بيتقال وبعدين مش انا الي بقوله بقى دا موجود في الكتب لان إحنا ناس مش يتقرا والكتب الإسرائيلية وتحديدا في الكتب الإسرائيلية فيه محللين عسكريين إسرائيليين تكلموا الحقيقة ولجنة " اجرانات" قالت
عبد اللطيف المناوي:لجنة اجرانات هي التي كانت مكلفة بالتحقيق مع القادة العسكريين بعد الحرب ؟
ل. د/ محمود خلف: اسم قاضي القضاة الإسرائيلي.. فعمل تحقيق لماذا هي الهزيمة ونقارن بعد 6 اكتوبرما فيه حاجات كتير مفيش سلام مفيش حرب مفيش مصر مالهاش أي قيمة لا في المنتديات المحلية ولا الإقليمية ولا الدولية خلينا بالبلدي مفيش سعر حتى في نظر الأشقاء العرب ، لما تقول لي 6 أكتوبر ، يوم 6 أكتوبرموشي ديان كان بيبكي ودا حقيقة كان بيبكي وجولدا مائير منعته من انه يطلع في الإعلام قال خراب الهيكل الثاني يعني هيكل سليمان وداود أتهد في التاريخ مرتين ودا التالت أما جولدا مائير قالت أنقذوا إسرائيل حالة الكآبة اللي كانت في الجيش الاسرائيلي وبعدين الكلام دا انكتب واتنشر والاهرام نشرته عشان تبقى عارف اللي هي مذكرات شيموي جيوناي اللي كان قائد الجبهة قدامنا حالة الاكتئاب اللي جاتله جاتلهم حالات الاكتئاب في الجيش الاسرائيلي وان أصبحت القوات المسلحة لان إمكانياتنا كانت محدودة عايزين نعمل تحريك عسكري يسمح بفتح باب السلام فاما نلاقي نفسينا إن إسرائيل انسحبت طب انا عايز حد من الناس المتشككين اللي هما كتير دلوقت يقولك دي كانت تحريك دي كانت ايه دي كانت إيه طيب انا عايز تدوني مثل واحد اللي بيقرا فيهم التوراة وبيقرا العقيدة اليهودية الصهيونية يعرف ان اليهودي ما بينسحبش ما بيسيبش ارض باي حال من الأحوال غير بالقوة لان إسرائيل أصلا لا تتعاطى مع المفردات السياسية ولا في العلاقات الدولية ولا تتعاطى مع القانون الدولي وليس لها حادث واحد تحترم القانون الدولي ولا على أي قرارات قدام عندنا كل القرارات 16 قرار صادرين لصالح الفلسطينيين ولا بتبصلهم اسرائيل هي لما تتحدث من غير تتحدث بلغة القوة النهاردة إسرائيل لو ماكنتش مجبرة ان هناك تمنا باهظا كانت هتدفعه بدءا من ثغرة الاختراق 48 ساعة ماتمشيش
عبد اللطيف المناوي: اذا معايير مصر لو لم تكن هناك حرب أكتوبر ماكنا في هذا الحال ؟
ل. د/ محمود خلف: لو لم تكن حرب أكتوبر زي ما بيقولوا اتهزمنا كانت اسرائيل لسه موجودة اضعف الاحتمالات ايه اضعف الاحتمالات كان نص سينا ماكانش فيه شرم الشيخ ماكانش فيه الكلام دا يقولك السادات راح ال... لا البديل كان موجود إن راجل عسكري وعارف إحنا وصلنا في خط الاشتباك إلى منتصف سينا مش دا خط الاشتباك اللي وصلنا له كان لينا في هذا الوقت إن إحنا كنا هنستمر في حالة حرب الى ماشاء الله يعني كل يوم كده إنما في الصراع الاستراتيجي ما بيقولش كده الصراع الاستراتيجي هو صراع سياسي عسكري انما عشان نفصل ونقول لا الأحوال السياسية من بعد الحرب نشوف نفسينا بنروح سينا الأول مكانش حد يقدر يقرب ..يقرب من قناة السويس والإسماعيلية ..السويس والإسماعيلية وبور سعيد مناطق مهجورة
عبد اللطيف المناوي: لك تعليق أتفضل.
ل/عادل شاهين: إسرائيل كانت تستهدف ان يهتز الأداء العسكري المصري والقيادة السياسية والعسكرية وتأمر بسحب القوات هذا كان مش من رابع المستحيلات لا عاشر المستحيلات ادي أول فشل في استهداف عمل الثغرة والحصار .. اتنين دعنا ناخذ الموضوع بشكل حساب ختامي هذه معركة بدات وكانت المبادأة فيها للجيش المصري وحقق نجاحا وتمسك بهذا النجاح وحصل اختراق في جزءعسكريا هذا الاختراق كان يعطي للجيش المصري الفرصة الذهبية للقضاء على كم كبير وحجم كبير من القوات المسلحة الإسرائيلية لولا التدخل السياسي في هذه الفترة وحكمة الرئيس الراحل أنور السادات
عبد اللطيف المناوي: الوقت بيشارف على الانتهاء ولكن الموضوع اكبر بكتيرفي ان احنا نخلصه في حلقة ولكن هسالك روح أكتوبراللي بنتكلم عنها دي ايه بالنسبة لنا أنت تقيمها ازاي.. تقول ايه عنها النهاردة ؟
ل/ عادل شاهين:نحن في امس الحاجة الان الى استحضار روح أكتوبر يجب علينا ان نفتش ونبحث ونستلهم ونتامل ما حدث في أحداث حرب أكتوبر وما ادت اليه من انتصار للجيش المصري دا يعطينا ما هي المقومات اللي يجب ان نتذكر ونستدعي الذاكرة لنضع الفكر ما هي المقومات التي ادت الى هذا النجاح لابد ان نستلهم هذا ..واحد.. الإعداد الجيد التخطيط الجيد الثقة الكاملة في القيادة السياسية والقيادة العسكرية ثقة الجندي المصري والضابط المصري في شخصه وفي قدراته التيتتاح لاول مرة له بناء عن تخطيط وإعداد سليم أتيح لمصر في هذه الفترة ويجب علينا أن نستلهم كل هذه المقومات ونحاول ان نوظفها في حل مشاكل مصر المعاصرة
عبد اللطيف المناوي: المقاتل محمود خلف عندما يستحضر الآن في الحياة المدنية روح اكتوبر كيف تترجمها أنت من خلال تجربتك الشخصية اللي عشتها ؟
ل. د/ محمود خلف: مصر عايزة حلول ابتكارية 100% دا اول حاجة يعني ايه الكلام دا لسه بنتكلم أول سر نجاحنا في روح أكتوبر فيه هدف كبير إحنا عارفينه انا هادي مثل يعني كهدف استراتيجي الحكومة لازم تقولنا بيان الحكومة أرقام ماحناش عارفين لها لا راس ولا رجلين عارفين السنة اللي قبليها من اللي بعديها الحكومة بتاعتنا تحط هدف استراتيجي الهدف الاستراتيجي زي اللي حاطه محمد علي مرة تانية يمكن كتير ما يعرفش ان مصر وإحنا بنشكو من الزحام قاعدين على 7.5% بس من مساحة 92.5% ارض فاضية نفس المساحة من ايام الفراعنة محشورين طيب ما نقول للحكومة تستعين بمفكرين مصر مش عيب ما هو الوزير مش فاضي يبقى الهدف الاستراتيجي خلال الخمس سنوات القادمة ما هو هنا بقى هنعوز فكر ابتكاري اما تحط هدف ولو صعب وتقول الخمس سنوات القادمة من إن أنا مساحتي 1.3000.300 كيلو متر مربع عندي سواحل بالآلف عالبحر الأحمر وهنا محشور في القاهرة بكثافة سكانية وبنتكلم نوزع يعني الفكر الروتيني طب نعمل بدل الدويقة لا نعمل..لا.. مش دا الحل ممكن يحل لي المشكلة دلوقت إنما أنا النهاردة سنة 2015 هابقى 100 مليون ..سنة 2025 هابقى 125 مليون يبقى لازم الهدف الاستراتيجي تقول الحكومة اتنين ونص من مساحة مصر تزيد نبقى 10% أزاي..؟ كلنا نتربط عليها كل الدولة تتربط بكل مافيها برجال اعمال بكل ابنائها كل واحد يبقى له دور
عبد اللطيف المناوي: احنا المصريين قادرين نعمل دا ؟
ل. د/ محمود خلف: احنا عملنا اهه ما أنا حكيت لك إن إحنا المصريين كويس إن حضرتك بتقولي كده طب ما انا كان العدو العلم الإسرائيلي مرفوع اللي إحنا فيه دا لعلمك ما يجيش قطرة من بحر 67 ولكن الرؤى لما تقولي روح أكتوبر مش نشيد ولا أغنية روح أكتوبر تستحضر من جوايا لان إحنا ساعتها قلنا ايه جمال عبد الناصر اعترف بالخطأ نسمع الخطأ ايه نسمع الحكومة عندنا مش بتسمع كويس الحاجات والانتقادات هي اللي صح وهي بس اللي تفكر حرام تحمل نفسها ان هي تفكر ..لا .. لازم كلنا نفكر القوات المسلحة من اول القائد العام انور السادات لاصغر عسكري نفكر في حلول ابتكاريه لمشاكلنا بس تديني هدف قبلة نتحرك في اتجاهها نتحرك وإيه المشكلة طب محمد علي لما قعد وفكر في نظام الري في مصر كنا مليون كان قلقان كنا مليون بس وقت محمد علي بنفكر في فكر ابتكاري ولما جه السد العالي كان فكر ابتكاري للرئيس جمال عبد الناصر ومديرية التحرير اللي قامت عليها النوبارية إحنا عندنا فكر ابتكاري ناجح بمناسبة النوبارية فيه أفكار مقدرش انكر ولكن احنا عايزين الشعب كله الحكومة مش هتكفي لوحديها ويجب على الحكومة بتاعتنا ألا تحتكر العمل الوطني ما تحتكروش
عبد اللطيف المناوي: العمل الوطني هو ملك لكل الشعب والشعب المصري العظيم كمان .
ل. د/ محمود خلف: وكل وزير وكل مسئول في مصر ما احنا عندنا لسه عالم الناس فوجئت بيه العالم مصطفى السيد اللي كرم في البيت الأبيض من تلت أربع أيام من العلماء المتقدمين في الولايات المتحدة الامريكية مصر يا سيدي فيها مليون مصطفى السيد ومليون زويل فيها..مش مفيهاش
عبد اللطيف المناوي: والدليل على كده اللي حصل بالفعل في حرب اكتوبرلازم نستحضره بشكل مستمراحنا النهاردة جوه بانوراما حرب أكتوبروأنا أعيد لك الفضل في هذه الفكرة الحقيقة اعترافا لك بيها وأنا بدعو الحقيقة كل المصريين ان هما ييجوا يشوفوا ولوفي شكل صورة .
ل. د/ محمود خلف: دا الناحية التانية مكن خط بارليف يعني احنا كنا الناحية دي وجايين نعدي في المصائب اللي هي موجودة تحت
عبد اللطيف المناوي: دا هنا خط بارليف ؟
ل. د/ محمود خلف: اه..وإحنا عبرنا من الناحية التانية يعني نعدي هناك ننزل نلاقي
عبد اللطيف المناوي: دي مش اول مرة تدخل فيها المكان كل مرة تدخل فيه المكان بيبقى احساسك ايه ؟
ل. د/ محمود خلف: دلوقت باسرح بفكري يعني باستحضر لان تقريبا شكل النقط القوية اللي موجودة باسترجع بعض المواقف التي كانت بتتم لان كان فيه هدف إن إحنا مطلوب جدا إن إحنا نخرج أسرى ما نقتلش الناس دول مطلوب نجيبهم اسرى وحصل لان كان مطلوب في المراحل الاولى بالنسبة للقيادات بتاعتنا عايزة معلومات مهمة جدا عن الروح المعنوية فانا استحضرت أشوف النقط القوية لان هي بالظبط تقريبا ال170 كيلو متر كانوا بالشكل دا
عبد اللطيف المناوي: في الحقيقة أنا بستغل الفرصة لدعوة المصريين لدعوة الآباء في الواقع ان يقصوا على ابنائهم 35 عام هناك اجيال اوجيل كامل لم يعش هذه المرحلة لم يعاصرها لا يعرف عنها بدعو هذا الجيل وبدعو الآباء أن هما يأتوا بأبنائهم لاستعادة هذه الروح مرة تانية لك تعليق تفضل؟
ل. د/ محمود خلف: اه..بالنسبة للحاجة التانية اللي بادعو فيها باضم للدعوة بتاعة حضرتك ان ابناء وشباب مصر يروحوا المتحف الحربي في القلعة ليروا تاريخ القوات المسلحة ويشوفوا كل حاجة
عبد اللطيف المناوي: القوات المسلحة المصرية اللي هما ابناء هذا الشعب العظيم كما وصفه الل. عادل وهوالشعب الذي استطاع بالفعل ان يحقق نصر اكتوبر في هذه اللحظات لا املك الا اني اقدم واتصور اني في هذا اقدم نيابة عن كل المشاهدين التحية الى كل ابطال اكتوبرالى كل شهداء اكتوبر الى ابناء هذا الشعب الذي استطاع بالفعل ان يحقق هذه المعجزة ويستطيع بالفعل ان يمر من كل مشاكله ..الل. عادل ..الل. محمود أشكركم شكرا جزيلا السيدات والسادة شكرا لكم والى لقاء في مرات قادمة بإذن الله