ملفات خاصة

عبد اللطيف المناوي: السيدات والسادة اهلا بكم من مقرقاعة المؤتمرات حيث ينعقد المؤتمر السنوي السادس للحزب الوطني نقدم لكم الليلة حلقة خاصة حول اهم القضايا حول اهم الموضوعات المطروحة امام المؤتمر هذا العام. يسعدني ان يكون معي دكتور يوسف بطرس غالي وزير المالية اهلا وسهلا بيك يافندم.. واظن ان معظم الموضوعات المطروحة على المؤتمر بشكل اوبآخرهناك ارتباط بشكل اوبآخرايضا بالمالية وخليني ابدا في البداية بما طرحه السيد الرئيس بالامس من ان هناك 10 مليارات سوف يتم ضخها في المرحلة المقبلة من اجل تحريك الاقتصاد، بث حياة اكبرفي الاقتصاد المصري السؤال هو الى أي مدى هذا المبلغ متوفر؟
د/يوسف بطرس غالي-وزير المالية : مش متوفر
عبد اللطيف المناوي: طب ازاي هيتوفر وازاي هندبر المبلغ دا ؟
د/يوسف بطرس غالي : هنستلف من السوق المحلي هنطلع سندات والناس هتكتتب فيها وهنستلف
عبد اللطيف المناوي: هذا المبلغ اللي هنستلفه هل هناك القدرة لدى الاقتصاد المصري لاستيعاب الاثر السلبي بتاع هذا القرض؟
د/يوسف بطرس غالي : جوابين على الاجل القصيرلا معندناش القدرة ان احنا نستوعب هذا القرض وما سيترتب عليه من خدمات.. في الاجل المتوسط.. آه.. العبرة ان انا هستخدم الفلوس دي في اني هوسع قدرة الاقتصاد المصري على انه ينمو انا دلوقت اقصى معدل نمو اعرف اجيبه لما الاحوال تبقى كويسة 7.5%، الفلوس دي هتيجي جنب فلوس تانية صرفناها السنة اللي فاتت 15 مليار ثم 8 موجودة في ميزانية السنادي وفوقيها ال10 دول كلها هدفها اننا نزود من القدرة التنموية لدى الاقتصاد المصري يعني كانك بتجيب عربية مشيلها حمل والموتور بتاعها شايل الحمل هتجيب حمل اضافي لكن في نفس الوقت بتوسع الموتور يوم ماهتيجي تدور الحمل صحيح اتقل لكن الموتور اكبر وبالتالي هتقدر تشيله برضه لما بوسع طرق بوسع مواني ازود البنية الاساسية المطلوبة احط مناطق للتجارة الداخلية مناطق لوجستية كل دا بيزود من قدرتي على النمو احنا كنا وصلنا على 7.5 وخلاص كانت كل المواني مخنوقة مش عارف اصدر لان المركب مش عارف يخش لانه مش عارف يركن فالمركب يستنى 10 ايام ، ال10 ايام دي معناته انه البضاعة بتاعتي قاعدة 10 ايام معناته ان عندي طاقة بس مش عارف استخدمه مش قادر اصرف البضاعة وسعت المينا وبالتالي البضاعة بدل ما تستنى 10 ايام هتستنى يومين ويمكن ماتستناش وبالتالي قدرتي على النمو هتبقى اعلى بدال ما بنمو 7.5 هنمو 8.5 هنمو 9 الفرق ال1.5 دول هيسمحوا لي ان انا اولّد دخل اضافي هولّد ضرايب اضافية هولّد ايرادات اضافية للموازنة هتسمح لي انى انا اخدم على ال10 مليار اللي انا خدتها زي واحد بيستلف فلوس يقسط يبيع اكتر يكسب اكتر يسدد الدين
عبد اللطيف المناوي: طب سؤالي هو هل هناك دراسات لدى الحكومة قامت بها حول هذا الموضوع تحديدا يعني هذه الدراسات لدينا معروفة ؟
د/يوسف بطرس غالي : مش محتاجة دراسات، معروف ان عندي اختناقات في المواني اوسعها .. معروف ان عندي اختناقات في الطرق .. هدي سعادتك مثال الاراضي المتاحة في العاشر من رمضان المدينة الصناعية خلصت عشان اقدر اتوسع محتاج احط بنية اساسية احط فلوس في حين انه الاراضي المتاحة وعندها بنية اساسية في بني سويف موجودة ناقصها طريق مزدوج اول ما ازدوج الطريق لقينا 7 مصانع راحت داخلة على طول عملت ايه شغلت ناس في بني سويف كان لازم تسافر لحد العاشر عشان تلاقي شغل او برج العرب او السادات دلوقت لما حطيت الطريق الناس راحت لاقطة فلقينا 7 مصانع داخلة معندوش مشاكل يبعت بضاعته اسكندرية لان الطريق مزدوج وواسع وواصل لحد اسكندرية هيوصل اسكندرية وسعنا الارصفة هيلاقي مكان يقدر يقدر يطلعها على المركب فكل دا بيزود القدرة على النمو قبل كده قبل المرحلة دي كنا وصلنا ل 7.5 المصانع بتدور مش لاقية ارض لما كانت بتنشا وتفتح ولاقية ارض مش لاقية عمالة ، العمالة في بني سويف يافي حتت تانية مش موجودة لازم تتحرك ونحط مواصلات دلوقت بنحط مواصلات بنحط خط بيربط العاشر مع مدينة القاهرة ..القاهرة مكتظة بالناس لكن العاشر مفيش حد هجيبهم منين هجيبهم من المنوفية هجيبهم من الاسماعيلية يعني كل دا زود قدرتي على اني اشيل الاقتصاد
عبد اللطيف المناوي: طيب في الحقيقة دكتور بطرس الحاجات المهمة والمعروف انت بيها شخصيا هي مسالة الوضوح والصراحة ومواجهة المسائل كما هي احد الاسئلة المطروحة او احد التخوفات المطروحة في الشارع ان يلجا او ان تلجا الحكومة الى فرض اشكال جديدة من الضرائب حتى توفر الموارد الجديدة المطلوبة هل اذا كانت هناك ضرائب جديدة هتكون على اي اساس ؟
د/يوسف بطرس غالي : مش دلوقت احنا محتاجين نطور ضريبة المبيعات لان ضريبة المبيعات دلوقت مش راكبة صح محتاجين نولد ايرادات اضافية عشان التامين الصحي هنجيب فلوس منين للتامين الصحي ، التامين الصحي هيتكلف بالاضافة الى اللي احنا بنصرفه 12 مليار جنيه هدخل 30 مليون مصري النهاردة ملهمش اي علاج ما بيتعالجوش.. اللي بعيا منهم بيلاقيله قرشين ، مالاقاش قرشين بيموت دول لازم يخشوا في النظام التاميني و معندوش فلوس يدفع قسط التامين العملية دي هتكلفني 12 مليار فلازم اجيبها من حتة واحنا بنكبر ودخولنا بتزيد بنطور الضرايب، ضريبة الدخل مش هتتحرك حطيناها بتجيب فلوسها بتشجع الاستثمار وهو دا الشكل الامثل للضريبة بنصلح شوية حاجات حاجة بتنفد هنا حاجة بتفلت هنا .. العقارية اتصلحت .. التنفيذ هياخد 3 او 4 سنين ..ضريبة المبيعات لسه قاعدة معوجة طلعت سنة 92 قعدنا نلصم فيها حتة هنا حتة هنا غير عادلة فيه ناس بتدفع 25 وناس بتدفعه 5 وناس مفروض ما تدفعش بتدفع ، لازم تتظبط اولا سعر واحد 25 وفيه ناس بتدفع 40 مفيش حاجة اسمها 25 و40 دي كلدا لازم ينزل لسعر واحد ، ال25 دي لازم تنزل لسعر قريب من اللي هو معروف في العالم ، ضريبة المبيعات في العالم تتراوح بين 14 ل17 او 18 ما بتجيش على المواد الغذائية ، ما بتجيش على الادوية ، ما بتجيش على الخدمات المصرفية عشان ما تخنقش الاقتصاد لكن بتيجي بالتساوي على الجميع ابو 25 دا تلاقي القطاع بتاعه مخنوق لو فكيت عنه هيكبر ، التاني تلاقيه بيكسب وفيه اقبال عليه لكن مش شايل حمله من الضريبة لما نظبطها بحيث انها ماتعوقش الانتاج ما تجيش بطريقة عشوائية دلوقت فيها جوانب عشوائية كده مانتاش عارف اذا كنت خاضع ولا مش خاضع يوم يقولك خاضع يوم تاني ينساك فاللي كان موجود في ضريبة الدخل مازال موجود في ضريبة المبيعات
عبد اللطيف المناوي:اصلاح الدخل في تقديركم اصلاح دا زي ما حصل في ضريبة الدخل قبل كده ؟
د/يوسف بطرس غالي : طبعا طبعا
عبد اللطيف المناوي: اذن زي ماذكرت حضرتك لن يتم الاقتراب باضافة ضرائب جديدة تمثل عبء على المواطن لكن هناك اصلاحات ضريبية في بعض المناطق ؟
د/يوسف بطرس غالي : بحيث اما دخله يزيد الضريبة تزيد
عبد اللطيف المناوي: طيب هنا السيد الرئيس اتكلم امبارح في كلمته اتكلم عن نقطة اود ان انا استوضحها منك استطعنا ان نمتص صدمة ارتفاع اسعار الغذاء الاولى واستطعنا ان نمتص صدمة الازمة المالية نسبيا التانية دون ان نلجا الى الخارج ازاي دا حصل التجربة دي تمت ازاي ؟
د/يوسف بطرس غالي : الصدمات دي انا امتصتها بان انا اقترضت من الداخل لو مكانش فيه دخل كبر في ال5 سنين اللي فاتوا مكانش بقى فيه اي حاجة اقترضها يعني انت عندك دخل صاحبك جالك قالك سلفني 100 جنيه قلت له خد جالك بعد شوية قالك سلفني 200 كمان قلت له خد جالك بعد شوية قالك سلفني 1000 هتقوله معنديش يعني انا معنديش اللي حصل خلانا لجانا الى الخارج ليه لان مكانش فيه جوة فاستلفت مرة واتنين وتلاتة ..الرابعة مفيش هستلف منين فاضطريت اروح برة ..برة بقى ما بيرحمش برة لو اتاخرت ثانية يندار عليك ويجيبلك صندوق النقد والدنيا تتقلب عليك زي ما اتقلبت في اوائل التسعينات وليه احنا وصلنا للدرجة دي لان قعدنا في اواخر السبعينات واوائل التمانينات نقترض علشان نحط بنية اساسية ليه اقترضنا من برة مفيش جوة انت فاكر لسه كنا قايمين من حرب سنة حروب فمكانش فيه هتروح تقترض من الداخل معندوش، فاقترضت من برة ، اقترضت اقترضت اقترضت المشكلة بقى لما بتقترض من برة عندك مشكلتين واحد لازم يبقى عندك موارد عشان تخدم على الدين لكن الموارد دي لازم تبقى بالدولار احنا الموارد موجودة الجنيه نطبعه فعايز جنيه تاني اطبعلك كمان واديلك لكن الدولار ما بطبعوش فالجنيهات موجودة ومفيش دولار، البترول نزل كان وقتها صادراتنا اي كلام مفيش قلنا له معندناش دولارات قالك خلاص مش هديك وابتدينا بقى نخش فغي حلقة مفرغة البلد تقف الحاجات اللي كنا بنصدرها وقفت يعني "عكّ"
عبد اللطيف المناوي: واضح انه بيقول مصروسداد ديون مصروالامور دي .
د/يوسف بطرس غالي : اللي عمله الرئيس مبارك في 26 مايو1991 انا كنت موجود وانا اللي اتفاوضت على الاتفاق تخفيض الديون 50% لولا دي كان زمانا معكوكين النهاردة زي ماكنا سنة 91 وفيه دول قعدت بال30 سنة في الاحوال دي
عبد اللطيف المناوي: طب احنا ايه اللي اختلف المرة دي ؟
د/يوسف بطرس غالي : ان عندنا فلوس وعندي فلوس ليه لانه نضفت، الناس ابتدت تستثمر والاهم المستثمر اللي برة جالي، في 4 سنين دخلنا استثمارات مباشرة يعني واحد دخل بنى مصنع 40 مليار دولار دخلوا وبنوا مصانع وعملوا دخل اصل المصنع لما تبنيه وانت بتبنيه بيولد دخل انك بتجيب مقاول والمقاول بيجيب عامل والعامل بيجيب فاعل والفاعل بيشتغل دا بيقبض ودا بيقبض الى اخره لما يتنشئ المصنع يشغل ناس تاني وينتج منتج المنتج دا دخل فلوس بتصدره وبيجيبلك دخل ، فكل دا القاعدة اللي بقف عليها اوسع اصلا لما اقوله سلفني 10 مليار هيقولي خد هات 10 كمان خد ، لان عندي الدخل اللي يسمح لي ان انا اسلفك زي بالظبط صاحبك اللي جالك في 100 و200 جالك فاحنا عندنا براح
عبد اللطيف المناوي: طب البراح دا قد ايه ؟
د/يوسف بطرس غالي : يعني قربنا ال10 دي قربت لو الاقتصاد العالمي لسه نايم شوية فيه لسه براح شوية لكن قربنا خلاص لكن بعد كده تقلب ....
عبد اللطيف المناوي: طب خليني اسال حضرتك حاجة احنا بنتكلم في المؤتمر وفي الاحاديث العامة والخاصة ان فرص العمل كذا .. احنا قاعدتنا الاقتصادية اصبحت قوية .. نسبة النمو 7% او 7.8 % كل الامور دي بنتكلم عليها لكن هنا السؤال هل دا كله لو مكانش موجود السيناريو الاخر كان هيبقى ايه احنا مازال الناس بيشتكوا مازال هناك معاناة مازال قدر من المعاناة .. ايه الوضع اللي كان هيكون ؟
د/يوسف بطرس غالي : الوضع سنة 2004 كنا بننمو تقريبا 3% كان معدل التضخم واصل ل15 او 17، سعر الدولار كان مولع كان 6 و6,5 وقاعدين قلقانين كل ما واحد يعطس كان ينط .. بمعدل نمو 3% كان بيزيد على البطالة كل سنة احنا بيخش سوق العمل 800 الف واحد التلاتة دي تشغل نصهم ، كل سنة البطالة بتزيد 400 الف ، افرض ان احنا كنا استمرينا على الحال اللي احنا فيه دا .. النهاردة فات 5 سنين كنا بقينا 5في 4 ب2 مليون عاطل فوق ال2.5 اللي كانوا موجودين كان عندنا 2.5 فبقوا 4.5 مليون الناس دي مش هتقعد ساكتة ،اتنين النظام الضريبي كان ضارب الممول كان بينصب على المصلحة والمصلحة بتنصب على الممول لا دا بيجيب فلوس ولا دا بيجيب فلوس وناس بكسب ما بشوفهمش وبيخسر باخدهم منه غصب عنه يعني العملية واقفة .. خدمة الدين وقتها الدين اللي شايله من زمان كان نسبته لدخلي 107% يعني قد دخلي كل سنة دين خدمته كانت بتاخد تقريبا نص مصروفاتي
عبد اللطيف المناوي: خدمته يعني الفوايد اللي بدفعها مش اصل الدين ؟
د/يوسف بطرس غالي : لا اصل الدين سليم اصل الدين بنجدده يعني لما ييجي يستحق اقوم استلف منك
عبد اللطيف المناوي: يعني اصل الدين بيدور ؟
د/يوسف بطرس غالي : ايوة استلف منك عشان اسدد لمحمد يوم ما ييجي وقت محمد ياخد فلوسه اقوم مستلف من يوسف عشان ادفع لمحمد ونقعد نلف كده.. الاصل ما جبناش سيرة الاصل انا بتكلم عن الفايدة ، الفايدة لازم تدفعها كل سنة فا دفعها منين من ايراداتي، الفايدة كانت بتمثل نص المصروفات اللي لسه لازم اصرف على التعليم والصحة والامن القومي والدعم واجور الموظفين والمعاشات كل دا ونص الفلوس راحت لو كنت استلفت بقى كنا عملنا هنا كنا استلفنا 10 من هنا و10 من هنا النص دا كان بقى تلت اربع فلوسي رايحة خدمة دين لسه فاضل التعليم والصحة فاللي كنت بستلف النص التاني هستلف قده مرة ونص السنة اللي بعديها هستلف السلفة دي تروح واكلة برضه تاني لان فوايد الضريبة بتزيد ، السنة اللي بعديها هتلاقي 95% من مواردي رايحة خدمة دين مضطر استلف كل اللي بصرفه بعد شوية تلاقي نفسك بتستلف عشان تدفع فايدة الدين وبتستلف عشان تصرف باقي المصروفات ، بعد شوية بتضرب منك خالص ودا في بحر سنتين تلاتة
عبد اللطيف المناوي: احنا حجم البطالة تقريبا عندنا قد ايه في مصر؟
د/يوسف بطرس غالي : لا العدد معرفش انا عارف انه النسبة زادت نتيجة لانه حصل تباطؤ في الاقتصاد كنا نزلناها ل8.3 ، 8.4 هي كانت 9 وشوية رجعت طلعت 9 تاني بس ان شاء الله لما الاقتصاد العالمي يقوم هنقوم معاه وهتفك ........
عبد اللطيف المناوي: فيما يتعلق باولويات الصرف من ال10 مليار ايه هي المخططات على اي اساس هيتم تحديد الاولويات ؟
د/يوسف بطرس غالي : اكتر حاجة بتوسع شرايين البلد الطريق هياخد اولوية ، المينا هتاخد اولوية ال10 دول هيروحوا صرف صحي ليه لانه اولا بيرفع من مستوى معيشة المواطنين الناس بتشتكي اتنين التغطية بتاعته ضعيفة زي ماقال الوزير المغربي التغطية بين 50 و60% فيه 40 ماشافوش صرف صحي فلازم يخش ، اربعة الصرف الصحي بيساعد على العملية الا نتاجية لانه بيقلل من الامراض الناس بتعيا طول النهار، المصانع معندهاش صرف بالتالي مش عارفة تشتغل العامل قاعد في منطقة فيها صرف صحي مش عارف يوصل المصنع بيعيا كل شويتين فدي بتزود من قدرة الاقتصاد على انه ينمو بيجيب دخل اكبر الدخل الاكبر بيجيب ضرايب اكبر من غير ما اغير سعر الضريبة
عبد اللطيف المناوي: طيب فيما يتعلق بمسالة مكافحة الفقروالالف قرية اين في المشروعات المقبلة من هذه ؟
د/يوسف بطرس غالي : لا دا ماشي وعنده فلوسه دا الالف قرية تكلفته قليلة قوي انا اللي عملته ايه ، احنا منعرفش الفقرا فين يعني عمالين نقول فقرا فقرا فقرا فين الفقرا دول محدش عارف النظام الامثل انك تبقى عارف بالاسم يوسف ومحمد وحسين دول فقرا هديهم معرفهمش بالاسم ولا اعرف قاعدين فين ولو نزلت في الشارع قلت لاي واحد انت دخلك كام هيقولك ولا حاجة ويبقى قاعد على ملايين فابتدينا نتجه الى مناطق جغرافية حطينا مجموعة من المعايير 14 معيار و6 تانيين للبيئة اللي انت عايش فيها هل رب الاسرة بيقرا وبيكتب ولا لا الارجح انه لو ما بيقراش ولا بيكتب الارجح انه فقير عنده كام عيل بيته شكله ايه بالطوب اللبن ، عشة ، مبني بالطوب قاعد في عمارة قاعد في ارض الى اخره عنده صرف صحي ولا معندوش عنده كهربا ولا معندوش عنده تامين صحي ولا معندوش فيه طريق بيوصل لبيته ولا لا انت بتندهش فيه بيوت في اماكن فقيرة مالهاش طريق بيوصل لها تقعد تتشعبط وتنط، مسجل ولا لا لو توافرت كل المعايير دي وكل واحد له درجات لو تحققت بتاخد الدرجة ، الفقير خالص بياخد 100 الغني خالص بياخد 0، كل ماقربنا من ال100 كل ما القرية قربت من ال100 يعني نسبة الفقرا فيها اعلى ونحسب مين اللي بينطبق عليه الارقام ونشوف نسبته من المجموع اللي الناس بتوع القرية فيه قرى 90% منهم فقرا ينطبق عليهم معايير الفقر ، هابتدي بدي هسيب القرية اللي 50% منهم فقرا هبتدي من ام 90 يعني ضمنت اللي هيستفيد عن غير حق 10
عبد اللطيف المناوي: طب وطريقة المعالجة هل بتتعاملوا مع ال14 عنصر بشكل عكسي في هذه الحالة بمعنى 14 عنصر بتقيسوا بيها اذا كانت القرية فقيرة ولا لا الارتقاء بمستواها ازاي بيتم ؟
د/يوسف بطرس غالي : دا اللي بيخلي انها ما بتكلفنيش لان انا بعمل مساكن بعمل صرف صحي وبدخل كهربا وببني مدارس وببني وحدة صحية احنا قلنا ايه بقى انا هخش على القرية دي 90% منهم فقرا معندهمش وحدة صحية معندهمش مدرسة معندهمش طريق ومفيش انارة ومفيش كهربا بدال ما احط الكهربا في قرية 70% منهم مش فقرا هحط الانارة هنا هشيلها من هنا هحطها هنا
عبد اللطيف المناوي: اعادة ترتيب اولويات الانفاق ؟
د/يوسف بطرس غالي : فا نا كده ولا كده كنت هاصرفهم لكن صرفتها كلها في حتة واحدة غيرت من حياة الناس اللي جوه، الفقر مش بعد واحد الفقر مش قلة دخل ، قلة دخل وصحتك وحشة ومش عارف توصل البيت ولما بتوصل البيت عندك بنت ولا بتاع بتخاف عليها بالليل لازم تجيب تحرس احنا دخلنا في بيوت بيصرفوا فلوس عشان يمنعوا الكلاب الضالة من انها تخش بالليل تعض العيال الصغيرة فانا لو اديته فلوس هيصرفها عشان يمنع الكلب فلو اديته فلوس واديته مسكن حليت حل اكبر لو اديته مسكن واديته تامين صحي حطيت له وحدة صحية يروح لما يجيله برد مش هيرقد شهر
عبد اللطيف المناوي: المشروع دا عناصره متكاملة امامكم ميزانيته موجودة لن يتاثر باي حاجة في المرحلة الجاية ؟
د/يوسف بطرس غالي : لانه بقولك ما بياخدش فلوس اكتر هي الفلوس كانت موجودة احنا بس ظبطناها بحيث انها تخدم كلها مرة واحدة ، المجموع بيبقى اكبر من مجموع الاجزاء، الكل اكبر من مجموع الاجزاء لو جبت له كهربا وسكنته في بيت نضيف بدل ما الكلاب الضالة تخش عليه وكده منعت عنه الصرف الصحي اللي كان داخل ومعيي الولد الصغير الولد الصغير عيان فاي فلوس بتجيله بيصرفها دوا على الولد جبت له تامين صحي مابقاش يصرف ، حسنت الصرف والتهوية وغيره الولد ما بيعياش وبعدين في الاخر خالص اقوم مدخل الصندوق الاجتماعي يديله قرض عشان يشتغل يبقى خلصنا من الفقر ..الميزة ايه بقى الحاجات دي كانت بتتعمل كده ولا كده نوجهها في حتة كلها مع بعض فبنغير من حجم المستفيدين ، دخلت الصرف الصحي في قرية 90 % منهم فقرا خلاص ال10 التانيين مسلك نفسه عامل طرنش عامل فيه عربية كسح بتيجي بتشيل معندوش مشكلة لكن خدمت عليه وبالتالي بقى اللي احسن حالا هييجي دوره بس هنبتدي باللي هيموت وبعدين اللي بعديه، النقطة التانية انه بعد شوية بيطلع من الفقر ما بخلقش مدمن معونة ، حسنت له الدين لقيت له وظيفة او لقيت له شغلانة او اديت له قرض منشاة صغيرة بعد شوية هتلاقي الدخل ارتفع اللي عملته عنده اشيله احطه في حتة تانية ، مش هيحتاج دعم بقى خلاص مش هيحتاج ضمان.. هيحتاج بطاقات اه.. لكن بخفف من اللي باديهوله اروح اديله اللي جنبيه
عبد اللطيف المناوي: طيب احد الموضوعات المهمة اللي مطروحة على المؤتمرهذا العام هو المسالة الخاصة بالزراعة والفلاحين في مصر بنلاحظ ان الدول الكبرى صناعيا واقتصاديا بتتجه الى ما يسمى دعم الفلاح اودعم المزارعين لديها ودعم زراعات معينة ، لاي مدى هذا الشكل او هذا الاسلوب هيتم اتباعه في المرحلة القادمة ؟
د/يوسف بطرس غالي : لسه بندرس الاساليب اللي تخدم على هذه ربحية الفلاح النهاردة من غير ما تؤذيه بكره.. ماهو لو خدمت على الفلاح وخليته يزرع حاجة ما بتتباعش بكرة الصبح مش هيعرف يبيعها فبنحط نظام بحيث نحميه من التقلبات العنيفة قوي في الاسعار اصبح دلوقت فيه تقلبات عنيفة ، من سنتين الفلاح كان هايص الاسعار مرتفعة ، السنادي لا فهنحاول نشوف له طريقة بحيث نوجهه للحتة اللي فيها تقلبات اقل ونوجهه للحتة اللي فيها ربحية اكتر وتخدم على احتياجاتنا من الزراعة احتياجاتنا من الاكتفاء الذاتي واحتياجاتنا من المية
عبد اللطيف المناوي: امتى هتدخل الدولة كطرف داعم لبعض الزراعات
د/يوسف بطرس غالي : الحتة دي انا مش عايز اخش نرجع تاني للدورة الزراعية و دا عاوز يزرع لا دا مش عاوز يزرع فبنحطها بان احنا نستخدم اليات السوق بحيث ان احنا نوجه الفلاح طواعية يعني لون دعمت الية معينة هيتجه طبيعي نحو سلعة ، مثلا عاوز ادعم الدرة ..الدرة مشكلتها ان تكاليفها عالية وسعرها واطي لو جبت له تقاوي من التقاوي اللي بتتداول في الخارج انتاجية الفدان بتزيد 70% على طول قمت مزود 70% من الانتاج بنفس التكاليف ساعدته لو قلت له انه على كل فدان لو زرعته بالطريقة الفلانية ورويته بالطريقة الفلانية هديك 100جنيه 200 جنيه ى500 جنيه فبخلق منظومة تخدم على الزراعة، تخدم على نفسها يعني بعد سنتين تلاتة يطلع من الدعم ما يقعدش بقى مدمن دعم وتجيب فلوسها بنفسها حليت المشكلة ..
عبد اللطيف المناوي: امتى ملامح الموضوع دا في خلال قد ايه ؟
د/يوسف بطرس غالي : في خلال اسابيع
عبد اللطيف المناوي: هل دا بيحتاج الى تعديلات قانونية ؟
د/يوسف بطرس غالي : غالبا ما بيحتاجش
عبد اللطيف المناوي: طيب الجزءالاخير اللي عايز اتناقش معاك فيه دكتورغالي هوالازمة الاقتصادية العالمية هل بتعتقد ان احنا في طريق الخروج منها ولا الامور لسه مطولة معانا شوية ؟
د/يوسف بطرس غالي : احنا ولا هما
عبد اللطيف المناوي: هما واحنا
د/يوسف بطرس غالي : اصل لما هما هيخرجوا احنا هنخرج ..شوف فيه شواهد بتقول ان بعضهم خرج الولايات المتحدة لاول مرة من سنتين معدل النمو3.6 بالموجب الدخل بتاعهم زاد لكن الشواهد ما بتطمنش لا التوظيف زاد ولا الانفاق زاد والبورصة نازلة
عبد اللطيف المناوي: نتيجة تحفظ ؟
د/يوسف بطرس غالي : نتيجة قلق عند المستهلكين قلق عند المصانع بقى بيشتغل اكتر وبينتج اكتر لكن في نفس الوقت نفس العمال لانه مش مطمن لانه لو كان مطمن كان عين ناس فقالهم معلش اشتغلواوردية تانية ،هو من سنتين رفد العمال رفد نصهم بدال ما يجيبهم تاني مخلي النص يشتغل سنة اكبر فانتج اكتر فالدخل زاد لكن معينش حد يبقى هذا دليل على انه مش مطمن ، احتمال كبير احنا شايفين 3.6 في اللربع دا احتما لتفقوم نازلة تاني ، فيه دول ماطلعتش لسه انجلترا كل سنة وانت طيب، فرنسا نفس الحكاية، المانيا مازالت، فمفيش عدد كافي بحيث يقولك طلعوا اقولك خلاص طلعت ، واحد بس اللي طلع فالواحد دا ممكن يتكعبل تاني نرجع ننزل
عبد اللطيف المناوي: بس الواحد دا هو الواحد هو اللي نزل بيهم
د/يوسف بطرس غالي : هو اللي نزل بيهم بس حد تاني لازم يطلعه واللي هيطلعه الصين ، الصين لازم تتخذ مجموعة من الاجراءات والسياسات الاقتصادية عشان تعرف تساعده ما بتاخدهاش لسه فالعملية متشبكة في بعضها والدلائل اه احنا شكلنا طلعنا لكن احتمال نتنكس
عبد اللطيف المناوي: طيب احنا ...؟
د/يوسف بطرس غالي : احنا معاه.. طلع هنطلع معاه هيتنكس هنتنكس معاه
عبد اللطيف المناوي: طيب احنا السنة الاخيرة كنا حوالي 6% تقريبا نسبة النمو.
د/يوسف بطرس غالي : 7.2 والسنة اللي فاتت 4.7 اللي خلصت في يولية دي
عبد اللطيف المناوي: واحنا شكلنا ايه السنة اللي جاية ؟
د/يوسف بطرس غالي : الله اعلم انا املي ان احنا نبقى 5 وكسر، بس كله متوقف على اللي هيحصل ايه برة
عبد اللطيف المناوي: طيب حجم الديون المصرية للخارج ؟
د/يوسف بطرس غالي : لا لا كلام فارغ بيمثل 14% من الناتج المحلي
عبد اللطيف المناوي: خدمة الدين ؟
د/يوسف بطرس غالي : لا الدين نفسه
عبد اللطيف المناوي: طيب السؤال الاخير هل تعتقد ان لدينا من الاسباب والمبررات ما يدعونا الى التفاؤل في المستقبل القريب ؟
د/يوسف بطرس غالي : اه طبعا عندنا اقتصاد قوي عندنا ادوات بتجيب نتيجة عندنا سياسات سليمة العالم كله بيشيد بالسياسات اللي طرحت في مصر فمعندناش حاجة تخوفنا العالم شاف الويل في ال18 شهر اللي فاتوا وطلع وعشنا احنا في الويل دا مش هيشوفوا الويل تاني يمكن ما يطلعوش بالسرعة اللي احنا عايزينها لكن الاسوا شفناه خلاص، وفتنا فيه وزي ما بيقولوا الانجليز اللي ما بيموتكش بيقويك ما متناش فاكيد قوينا
عبد اللطيف المناوي: ودا اللي كلنا بنتمناه دكتور يوسف بطرس غالي وزير المالية شكرا جزيلا لك وكل سنة وانت طيب ,السيدات والسادة الى اللقاء في مرات قادمة باذن الله