منال الإتربى : مشاهدينا السلام عليكم وأهلا بكم ولقاء يتجدد فى مساحة للرأى المشهد العام فى مصر فى بداية العام الثالث للثورة مليئ بالصور منها ما هو أصيل ومنها ما يشبه الفقاقيع التى تطفو على السطح إما أن تتطاير فى الهواء وتبتعد عن سماء مصر أو تنفجر وتشوه الصورة الأصيل فى المشهد شعور المصريين بغضب لعدم تحقيق العدالة الاجتماعية والعيش والكرامة على مدى عامين من الثورة لذلك خرج الجميع إلى ميادين التحرير بلا إخوان أو سلفيين أما الفقاقيع فكثيرة أخطرها غياب القانون وأخذ الحق بالأيدى وحين تسأل ليه ده تأتى الإجابة قاطعة ما تلوموش علينا فرموز الدولة والقدوة أولى باحترام القانون طبعا ، من الفقاقيع التى تلوث المشهد العام للدولة أيضا الإعلان صراحة عن تشكيل ما يسمى بين قوسين الحرس المسلح وحين تسأل تأتى أيضا الإجابة قاطعة إنها رد فعل لمواجهة ميليشيات تيار الإسلام السياسى هذا هو الخطر الحقيقى الذى يهدد مصر الوطن والشعب إن يغيب القانون والنظام الأمنى والأخطر أن يشعر المواطن إنه مهدد فى قوته وقطر العدالة الاجتماعية فاته على رصيف الإهمال هذه رسالة ضمن رسائل عديدة أرسلها المتظاهرون لمن بيدهم الأمر هذه الرسائل نتوقف أمامها فى حوار مساحة للرأى اليوم مع الأستاذ الكاتب الصحفى محمد زكى نائب رئيس تحرير جريدة الوفد أهلا بك يا أستاذ محمد ، ودعنا نتوقف فى البداية عند الرسائل التى أرسلت من خلال تظاهرات الاحتفال بثورة الخامس والعشرين من يناير أ.محمد زكى : أنا عايز أقول أنا بعتبر احنا بنحتفى يعنى نحتفل بالذكرى الثانية لثورة مصر ثورة 25 يناير بعد ما عانينا من الفساد والظلم عانى شعبنا من الفساد والظلم أعتقد القوى الثورية الشبابية عايزين يوصلوا رسائل للقائمين على هذا الوطن وتحديدا القيادة السياسية متمثلة فى الرئيس محمد مرسى منال الإتربى : مفاد هذه الرسائل أ.محمد زكى : هذه الرسائل أولا عايز أقول أولا الثورة قامت أو اندلعت شرارتها منذ عامين النهاردة هذه الثورة قامت على شعار لا نختلف عليه كمصريين هذا الشعار عيش ، حرية ، عدالة اجتماعية هذا الشعار لم يتحقق على أرض الواقع هناك أيضا انفلات أمنى وقوة متصارعة هناك القوة الميليشيات الفرقة 95 إخوان 100 % لابد إن الشباب يكونوا جبهة أخرى مسلحة أيضا وده يوصلنا لمرحلة خطيرة احنا خايفين منها يبقى قوة قصاد قوة منال الإتربى : من يقول هذا يا أستاذ محمد أ.محمد زكى : هذا الكلام فى الشارع يعنى النهاردة لما تيجى منال الإتربى : ومن يدعو إليه أ.محمد زكى : الشباب النهاردة يعنى النهاردة فى شوارع مصر وفى حوائط مصر مكتوب كلمتين مش هقولها ألتراس أهلاوى قال وتحديدا وقوى سياسية خفية وبتطلق على أسمائها مسميات مختلفة قالوا إيه الدم بالدم القصاص هو يقصده قضية مذبحة بورسعيد يساوى الاستقرار هذه القضية القضاء قال كلمته النهاردة منال الإتربى : هل نسكب الزيت على النار أ.محمد زكى : لا احنا مش عايزين نصل إلى مرحلة الحرب الأهلية النهاردة للأسف الشديد فى بورسعيد وأيضا فى السويس وبعض محافظات مصر بقت هناك زى ما سيادتك قلتى هناك يعنى سكب زيت على النار مصر مش مستحملة الشباب شبابنا عايز ينتفض أنا بعتبر الموجة الثانية من الثورة هى انتفاضة شبابية شعبية على إيه احنا النهاردة طلعنا أو أصدرنا دستور مصر هذا الدستور لم يتوافق عليه المجتمع المصرى أو الأطياف السياسية فى مصر وبالتالى هناك نقاط خلافية فى بعض بنود الدستور منال الإتربى : أستاذ محمد اسمح لى قد أختلف مع أمى ولكن أبدا لا أستطيع أن أحرقها من يحرق أمه أ.محمد زكى : مصر أمنا ومصر دى أمنا وعشنا فيها أعتقد هى فيه صراعات أنا عايز أقول حاجة للأسف الشديد هناك صراعات ما بين الأطراف المختلفة أنا بقول طرفين طرف قوة سياسية – سياسية مدنية وطرف آخر هى قوة السياسية الإسلامية للأسف أن أحد القيادات أحد القيادات الدينية خفت جدا بعت رسالة لمورديه مش هقول اسمه هم أعتقد السادة المشاهدين يعنى هيفتكروا هيفهموا ما أقصد هذا الشخص قال لهم أنا عايزكم والكلام ده كان امبارح قال أنا عايزكم تصلوا الجمعة وتبقوا مرابدين فى بيوتكم وانتظروا منى تعليمات ولما آخد التعليمات من الرئيس محمد مرسى أنا منتظر منه التعليمات هذه الشخصية الدينية هذه الشخصية اللى هى المنتمية للتيار الإسلامى يعنى ده كده بدايات حرب أهلية وأنا بطبعى متفائل ولكن هناك فصائل متصارعة منال الإتربى : وهل الفوضى هى الطريقة المثلى الآن لإنقاذ ما يمكن إنقاذه أ.محمد زكى : هقول لحضرتك حاجة يعنى احنا لو رجعنا للثورة من هو قائد الثورة أنا بقول القائد الحقيقى للثورة هو الشعب ولكن مفيش قائد على أرض الواقع مفيش قائد محدد وبالتالى هناك صراعات بين كافة القوى لإثبات وجودها على أرض الواقع وبالتالى ما يحدث من التناحر السياسى النهاردة هو نتيجة كل فصيل عايز يثبت وجوده يستحوذ على جزء من مصر منال الإتربى : طب على الجانب الآخر هل القتل والحرق والهدم يعيد حق الشهيد أ.محمد زكى : لا أنا بقول مش معقول واحد يقتل أمه أمنا مصر منال الإتربى : ولا يحرقها أ.محمد زكى : ولا يحرقها يقتلها ده القتل يعنى الفتنة أشد من القتل واحنا فى الفتنة دلوقتى احنا بنعيش فى فتنة يعنى احنا النهاردة شائعات يقول لك موجود وده مش موجود ده هيحصل حاجات متوقعة للأسف الشديد أحيانا التكنولوجيا بتحولنا إلى إن احنا يعنى أنا النهاردة كل العلاقات من خلال الشبكة العنقودية الفيس بوك من خلال الشباب يعنى عايزين الشباب يتحرك ازاى دلوقتى بدأت الحرب حرب شبابية اللى هى بقت الحرب أدهون لدرجة إن إحدى الجماعات أطلقت على أنفسها يعنى ألفاظ جديدة علينا متعودين بيرتدوا ملابس احنا مش متعودين عليها يعنى حاجات أوروبية تقليد أعمى وبينفذوها وهددوا بعض المناطق والمنشآت الحيوية فى خلال الساعات الماضية واحنا عانينا منهم احنا لحد الآن احنا خايفين كل قوى تطلع من تحت الجحور وتطلق على نفسها اسم ومسميات مختلفة احنا عايزين كل هذه القوى فى كيان واحد شبابى واحد ورئيس الجمهورية يحتوى هذا الشباب ويلتقى بهم بالإضافة إلى القوة السياسية الأخرى على أرض الواقع احنا مش عايزين نتجاهل كافة الأطياف فى المجتمع والقوى الشبابية والقوى السياسية الأخرى الرئيس لابد أن يتدخل ويحتوى كل هؤلاء قبل أن تتحول مصر إلى حرب أهلية احنا ما يحدث النهاردة فى بعض المحافظات هى مقدمات ما قبل الحرب الأهلية منال الإتربى : طب لو أن الحوار الآن صعب ومؤلم ما بديل الحوار الآن أ.محمد زكى : الحوار ، الحوار ، الحوار ، الحوار نتفهم نتوصل إلى نتائج بس هى فيه مشكلة إن فصيل عايز يفرض سيطرته على الفصيل الآخر لابد أن أحترم رأى الآخر وبالتالى لنا كلنا إيه المصريين كلنا شركاء فى الوطن كل المصريين بمختلف انتماءاتهم وطوائفهم شركاء فى هذا الوطن سواء حاكم أو محكوم احنا مش عايزينه يقول أنا حاكم بالشرعية أنا أحترم الشرعية أحترم الصندوق لابد أن يحترمنى أنا لكى نتحرك بعجلة الديمقراطية ومسار الديمقراطية إلى آفاق جديدة منال الإتربى : أستاذ محمد اسمح لى لماذا لم تتحقق العدالة الاجتماعية حتى الآن بعد مرور عامين أ.محمد زكى : هقول لحضرتك حاجة يعنى النهاردة لما آجى شعار الثورة العظيم اللى هو احنا ما شفناش منه ما نفذش منه 10 % عيش ، حرية ، عدالة اجتماعية منال الإتربى : معنى كده إن احنا ما حققناش أى شئ بالمرة وكأننا لسه فى نقطة الصفر أ.محمد زكى : أنا خايف إن الأحداث اللى احنا بنمر بها النهاردة وامبارح وهتبقى بكرة الأحداث تقودنا إلى نقطة الصفر مربع رقم واحد وده اللى شخصيا بيخوفنى منال الإتربى : احنا فعلا ما حققناش أى شئ فى العامين دول أ.محمد زكى : حققنا حاجة واحدة التناحر السياسى هو ده اللى احنا حققناه وحققنا أكثر لمين إن كل مواطن موضوع العدالة بقى 3 أرغفة كل يوم وأنا بتتريق وبقول المواطن هييجى الصبح يشترى 3 أرغفة وآخر النهار هيرجعهم ثانى للحكومة وياخد الراحة يعنى مش هياكل حاجة أنا بقول لابد أن نحترم المواطن والغلابة فى مصر احنا وصلنا حد الفقر يعنى معدل نص منال الإتربى : يعنى عايز تقول إنهم 3 أرغفة فقط وإنتاج سيئ كمان لأنه مش هياكله لا ما هو أ.محمد زكى : طبيعى بصى مفيش دولة فى العالم احنا رحناها وشفنا رغيف بمستوى الرغيف فى مصر فيه هناك مافيا الاستيلاء على الدقيق المتاجرة به فى السوق السوداء احنا عايزين هو موجود رقابة صارمة من جانب الحكومة أنا مستشعر إن الحكومة حكومة الدكتور هشام قنديل من أضعف الحكومات اللى مرت على مصر منال الإتربى : هل هى تحتاج إلى قرارات ثورية فى هذا الملف بالذات أ.محمد زكى : طبعا هذا الملف ملف رغيف الخبز طبيعى ثورية فى حاجات كثيرة جدا حضرتك منال الإتربى : فى العدالة الاجتماعية ككل أ.محمد زكى : العدالة الاجتماعية منقوصة مفيش عدالة اجتماعية فى مصر الأغنياء يزدادون غنى والفقراء يزدادون فقرا لازال موجود الكلام ده كنا بنقوله أيام النظام السابق لما كان تزاوج قلناه وهذا خطأ دور الحكومة تعمل التوازن فى توصيل الدعم لمستحقيه التوازن فى كل طوائف المجتمع وبالتالى أنا بقول الحكومة غائبة أنا عايز أقول حاجة بسيطة جدا لما رئيس حكومة مصر وأحداث الساخنة اللى احنا مرينا بها خلال الساعات الماضية يدير مصر بالتليفون وهو بيحضر مؤتمر دافوس ده يعنى مش عايز أقول الكلام ده الكلام ده ترك أثر سيئ لدى المواطن لما رئيس حكومتى يدير مصر بالتليفون من خلال المسئولين انتوا عاملين إيه يا ولاد بيدير مصر 90 مليون وهو قاعد فى مؤتمر كان ممكن يبعت أحد ممثلى الحكومة فى هذا المؤتمر ولا يترك مصر زى ما النهاردة الدكتور محمد مرسى أجل أو ألغى زيارته منال الإتربى : لا بس كان تواجده فى المؤتمر مهم برضه أ.محمد زكى : النهاردة أنا فى بيتى ، بيتى الكبير أنا النهاردة بتحول بيتى الكبير بيتحرق لازم أتحرك وأطفى لإن هو المسئول التنفيذى فى الدولة رئيس الحكومة من رئيس الحكومة هو الرجل التنفيذى فى الدولة وبالتالى لابد أن يكون منال الإتربى : يعنى أتفهم حضرتك لإن الظروف صعبة أ.محمد زكى : صعبة جدا ما اتركش أولادى يقودهم إلى دموية تقودهم إلى إن تتحرق البلد وهو قاعد ويدير مصر بالتليفون لا احنا نتمنى إن رئيس حكومتنا موجود بيننا موجود فى غرفة عمليات يدير الأزمة احنا فى أزمة ولازلنا فى أزمة وبالتالى لابد أن تتحرك الحكومة فى موجبات أى خروج على الشرعية والقانون منال الإتربى : طب أستاذ محمد أستأذن حضرتك فى أن نتوقف قليلا لمشاهدة هذا التقرير ثم نعود مع حضراتكم مرة أخرى ومساحة للرأى انتظرونا تقرير فى سطور جريئة يقول رفعت فياض كنا نتمنى أن تحتفل مصر بذكرى مرور عامين على أعظم ثورة فى تاريخها والكل سعيد ببدء تحقيق نتائجها التى ثارت من أجلها الملايين ضد نظام فاسد ، بكرة وبعده تقول وفاء الغزالى بعد عامين من ثورة شعب مصر هل حان الوقت لتنظيم ما حصل أم أننا ما زلنا فى بداية الطريق ، دنيا الكاريكاتور ماهر بدر يصور مصر وهى تقول سامحينى أنا بريئة جماهيرى محترمين عمرهم ما كانوا مخربين ، عبد العظيم درويش يقول مصر ليست غنيمة للعشيرة أو إرثا للنخبة أو كرة تركلها أرجل الأولتراس ، على مدى الشوف يؤكد عمرو خفاجة عندنا تقوم ثورة هذا يعنى أن هناك من يشعر بالظلم وبعد قيام الثورة لا معنى أن نرفع الظلم عن البعض ليوقع ظلما جديدا على آخرين ، نقطة مرور عمر حسانين الحرق والقتل والهدم لا يمكن أن يعيد حقا مسلوبا ولا تسترد حق الشهيد فالحقوق تأتى بالمطالبة والتمسك بها إلى آخر نفس ، بهدوء عماد الدين أديب لا بديل عن الحوار مهما كان صعبا أو مؤلما ومهما كان مكلفا لأن البديل هو الفوضى المفروشة بالدماء ، ومع بدء العام الثالث للثورة يتساءل حازم منير ماذا يريد قادة جبهة الإنقاذ الوطنى ؟ وما هو هدفهم ؟ وكيف سيحققونه ؟ لأن تعدد وتبدل الشعارات صبغ مسيرة الجبهة بظلال تحتاج إلى تفسير ، وتحت عنوان أنين الوطن يقول مدبولى عثمان نتطلع لمبادرات إعادة بناء مصر حتى ننجز أهداف الثورة وتحصل على العيش والحرية والعدالة الاجتماعية ، كاريكاتور مصطفى حسين بدون كلمات ينقل صورة لمصر وحولها كافة الفئات والأعمار منال الإتربى : مشاهدينا عدنا إليكم مرة أخرى ومساحة جديدة للرأى والأستاذ الكاتب الصحفى محمد زكى نائب رئيس تحرير الوفد مشاهدينا قبل متابعة التقرير وفى الجزء الأول من البرنامج دار النقاش حول رسائل تظاهرات يناير ولماذا لم نحقق العدالة الاجتماعية بعد عامين فى الجزء الثانى من البرنامج نناقش الجوانب السلبية التى ظهرت على السطح وهى غياب دولة القانون ودعوات لتسليح أفراد وجماعات أهلا بك مرة أخرى أستاذ محمد كيف نعيد دولة القانون أ.محمد زكى : أن يبدأ تطبيق القانون من رأس النظام إذا كان رأس النظام بيخالف القانون رأس النظام أقسم بحماية واحترام القانون وعلى الجانب الآخر نكتشف ونرى بأعيننا إنه مخالف للقانون منال الإتربى : وإذا هدمنا القانون هدمنا الدولة أ.محمد زكى : ما أنا النهاردة عايز نتكلم إذا كان رأس النظام يخالف القانون ويتناقض مع قرارات وأحكام القانون ده بيؤكد إن مفيش دولة قانون القدوة بتاعت المصريين هو رأس النظام ورأس النظام هناك قرارات بيخالف القانون فيها كثير جدا وبيقول يعنى النهاردة على سبيل المثال الدستور كان بيقول أو الدستور بيؤكد على إن رئيس الدولة مسئول عن حماية المواطنين فرئيس الدولة هو مسئول عن 90 مليون مواطن وبالتالى ما حدث بالأمس وأمس وأمس الأول وسيحدث خلال الساعات القادمة هو مسئولية رأس النظام هو الحفاظ على حماية المواطنين سواء من الشرطة أو الجيش أو الأفراد العاديين المدنيين احنا فى الأول لابد أن يتم احتواء هذه الشرارة شرارة ما بين الشعب اللى بيحصل دلوقتى يبقى دولة القانون لابد أن يحترم لكل أفراد المجتمع احنا كان هناك خروقات للقانون منال الإتربى : يعنى يطبق القانون على الكل أ.محمد زكى : على الكل احنا فى الأول وفى الآخر نبقى قدوة ويطبق على الكل لا فقير ولا غنى احنا كلنا صاحب سلطة أو سلطان لا كلنا أمام القانون سواسية ده بداية دولة القانون دولة القانون بتبدأ من رأس النظام وتصل إلى القاعدة الشعبية أو المواطن العادى النهاردة بقى المواطن ياخد حقه بإيده تحولت إلى بقى قانون الغابة قانون غابة كإننا فى غابة وحتى العلاقات الاجتماعية النهاردة خلافات بين جارين أو خلافات ما بين مواطن ومواطن ما بيلجأش للشرطة يقول لك لا أنا هاخد حقى بإيدى منال الإتربى : إلى أن وصلت هذه الفوضى إلى جماهير الكرة أ.محمد زكى : وصلنا يعنى ما حدث العلاقات يعنى حتى فى الملاعب الرياضية ده حتى على سبيل المثال بشجع النادى بتاعى بقى بالعنف عايز أقول له أنا أفضل ممكن يلعبوا فى الملعب اللعيبة أو اللاعبين جوه الملعب بيتشاجروا على اللى يثبت إنه دخل جون هنا ودخل جون هنا لا منال الإتربى : وهم الآن يركلون مصر بأرجلهم كالكرة أ.محمد زكى : آه اللى بيحصل ده دلوقتى لإن غياب القانون هو بيوصلنا يعنى لما مواطن منال الإتربى : يعنى هل أصبحت مصر كالكرة بين أرجلنا من يقول هذا أ.محمد زكى : السلطة التنفيذية أو السلطة التى تستطيع أن تحمى أنا النهاردة ضعيف مين يحمينى من القوى السلطة اللى هى ممثلة فى وزارة الداخلية والقانون هى الداخلية أو وزارة الداخلية أو أى جهة تابعة للدولة تعمل وفقا لقانون إذا استشعرت إن أنا هاخد حقى بالقانون مش هلجأ إليها إلا لها بينما النهاردة لما واحد يحصل على حقه بالذراع وباستخدام القوة المفرطة فى التعامل مع الطرف الآخر كى ينتزع منه حقه كثير من القضايا الاجتماعية منال الإتربى : ويصبح كل شئ ممكننا فى غياب القانون أ.محمد زكى : طبيعى فى غياب القانون كل شئ بيعمل اللى انت عايزه شوارع مصر يعنى لو بصينا أنا بقول بصراحة أنا بنزل بعض شوارع وسط المدينة بحزن على مصر تحولت إلى بوتيكات حتى الإنسان اللى بييجى يحط عربيته هناك من بيأجر لك المكان يبقى فين القانون إذا كان أنا بقول لوزير الداخلية من يومين أنا مبسوط اللواء محمد إبراهيم وزير الداخلية فرحنا يومين ونزل ماذا حدث معلش احنا عايزين دولة القانون على أرض الواقع وليس بالشو الإعلامى أنا ما آجيش النهاردة وزير الداخلية ينزل برجالته منال الإتربى : ممكن نكون احنا ما ادينالوش فرصة أ.محمد زكى : لا هو حضرتك القانون صارم القانون إذا طبقناه هاخد حقى والحكومة تاخد حقها أو الجهة التنفيذية النهاردة بنعمل ازاى نظام الدفع ثم التراجع الدفع ثم التراجع ما ينفعش أنا النهاردة وصلت حملات فى الشارع المصرى لإعادة الانضباط أستمر فيها ما بقولش النهاردة تبقى موسمية أعملها يوم يومين وتصل أنا عايز أقول حاجة أنا عايز كمان أكشف حاجة يعنى إذا كانت الحملات اللى بتقوم بها ضباط الشرطة بيحصلوا على مكافآت عايز أقول حاجة فى أحد ميادين القاهرة أنا مش هقوله فى ميادين القاهرة الكبرى قاموا بحملة عارفة عدد المكافآت الذين حصلوا عليها أد إيه السادة الضباط 175 ألف جنيه نقدا وعدا فى صورة مكافآت يعنى بينزلوا لمجرد إنهم يحصلون ده واجبهم الضابط أو الجهة التنفيذية متمثلة فى الإدارة المحلية وأيضا يعنى وزارة الداخلية ما ينتظروش المكافآت هم أهم حاجة ياخدوا المكافآت وهذا الكلام منال الإتربى : وهم أيضا يؤدون واجبهم وحياتهم على أيديهم أ.محمد زكى : احنا معاهم منال الإتربى : لكى نكون منصفين أ.محمد زكى : أنا النهاردة حتى طالبت السيد وزير الداخلية وهطالب إن احنا شعارنا الجديد اللى يتحط أمام مراكز الشرطة وأقسام الشرطة الشعب والشرطة إيد واحدة هذا الشعار أنا لن أتنازل عنه لإن هو لازم يكون على أرض الواقع أنا كمواطن شعار الشعب والشرطة فى خدمة الوطن والشرطة فى خدمة المواطن خلاص انتهى أنا بقول إيدنا مع بعض شعب وشرطة لمجابهة الخروج على الشرعية احنا المواطن كم من المواطنين يساهمون فى القبض على متهمين منال الإتربى : كيف نحول هذه الدعوات من دعوات تجميلية إلى دعوات حقيقية على أرض الواقع أ.محمد زكى : لابد بصى حضرتك المواطن عنده استعداد يتظافر جهوده مع الجهة التنفيذية أى جهة سواء شرطة أو جيش أو أى جهة بس ادى له حقه مش حقه المادي حقه إن هو مواطن تستشعر إنك مواطن كثير من المواطنين ما بيلجئوش للشرطة على سبيل المثال أو أقسام الشرطة ليحصلوا على حقوقهم لإنه عنده استشعار إن هو سيهان حتى بعد الثورة عايز أقول رجعنا ثانى الثورة رجعت ثانى أنا بقول هى فى طريقها للرجوع لنقطة الصفر أو المربع رقم 1 من الناحية الأمنية والانفلات الأمنى خير دليل ما أقوله لسيادتك وللسادة المشاهدين منال الإتربى : أستاذ محمد ظهرت بالأمس دعوات فى بعض القنوات الفضائية لتشكيل ميليشيات مسلحة ماذا تريد هذه الفضائيات وهى تعلم أن هذا خطر حقيقى وماذا وراءه أ.محمد زكى : عندما أعلن أن هناك ميليشيات شبابية تابعة لجماعة الإخوان المسلمين وتحديدا حزب الحرية والعدالة وهى الفرقة 95 إخوان كما أطلق عليها واللى قالها مش أنا وزير حالى فى حكومة الدكتور قنديل وهو وزير الشباب أيام ما كان ماسك منصبه منال الإتربى : لماذا شكلت ولمواجهة من أ.محمد زكى : لا يعنى عايز أقول حتى كمان امبارح قالوا إن احنا عندنا شبابنا يحموا مقراتنا ده دور الشرطة منال الإتربى : كانوا بيشكلوها ليه أ.محمد زكى : بيشكلوها لمجابهة يعنى هم قاموا بدور فى الثورة قد يكون إيجابى قد يكون سلبى ولكن أنا مش هدخل فى تفاصيل دلوقتى ودى جهات خاصة هى تحقق فى هذه الجزئية فيه حاجة اسمها الفعل ورد الفعل واحد عامل ميليشيات ويملك سلاح 100 % أدامه ميليشيات مسلحة أخرى ليه عشان أنا أستشرى أعيش ما هو لازم السلاح بالسلاح القوة بالقوة الدم بالدم ده احنا ده غياب القانون دولة القانون وغياب الرقابة على تنفيذ القانون لما النهاردة الفضائيات أو فى أى جهات إعلامية بتقول أن هناك ميليشيات مسلحة لمجابهة مين احنا مصريين فى الأول والآخر إذا استشعرت كمواطن إن احنا فى دولة قانون وتطبيق القانون هنا بيؤكد هتختفى منال الإتربى : هل ما وراء هذه الدعوات هم يريدون أن تكون مصر عراق جديد أ.محمد زكى : ما أنا فى أول الكلام قلت لحضرتك أنا خايف اللى بيحصل ده يحولنا إلى حرب أهلية وأنا لا قدر الله مش عايزين لإن الحرب الأهلية بحور دمائها كثير ونتمنى لمصر السلامة منال الإتربى : وليس الانقسام منا ببعيد ولا ما يحدث فى العراق أو فى لبنان منا ببعيد أ.محمد زكى : العراق غيرنا يعنى احنا عندنا فصيلين تيار إسلامى وإخواتنا الأقباط يعنى مفيش مشاكل احنا فى الأول والآخر عايشين على أرض مصر وبالتالى أنا أستبعد قصة تتحول مصر إلى عراق جديد بقول لا احنا فى ظروف صعبة شوية بس إن شاء الله نمر مرور الكرام من هذا النفق اللى احنا موجودين به بس يا أنا بطلب من القيادة السياسية ألا تكون بمعزل عن الشارع المصرى منال الإتربى : اسمح لى يعنى أنا الآن أحتاج أن تمد إلى يد الأمل وتقول لى من أين تأتى هذه الثقة أ.محمد زكى : الثقة فى العلاقات ما بين الشعب المصرى منال الإتربى : فى أن مصر ستظل متحدة ولن ينفرط عقدها أ.محمد زكى : الشعب المصرى من عهود متحد اللى بيحصل الفرقة دى ، دى فتنة أو بوادر الفتنة ، الفتنة تولد فتن واللى بيحدث دلوقتى ده فتنة صغيرة هتكبر الفتنة والشائعات احنا عايشين على حرب الشائعات يعنى أنا جاى النهاردة التليفزيون على سبيل المثال وقالوا لى ده فيه مظاهرة ومتظاهرين أدام ماسبيرو وما تروحش الناس العاديين قلت لهم لا منال الإتربى : إذن هناك أحد وراء الفتنة أ.محمد زكى : آه الشائعات ، الشائعات رصاصات فى قلب مصر الشائعات بتجى ازاى إعلامنا الحكومى وأنا بقول بصراحة فى هذه المائدة المستديرة بقول براحتى وده أفضل حاجة أنا بستشعر بها وبقول اللى أنا عايزه وأعتقد يعنى لى تجارب فى هذا المكان احنا عايزين إعلامنا يبقى عنده صاحى هو ليه بيحصل الشائعات أو الفتن دى الإعلام بيبقى بعيد الإعلام الحكومى تحديدا بيبقى بعيد عن المواطن والحدث المفروض الإعلام الحكومى هو إعلام سيادة الوزير قال احنا هنحول من إعلام سلطة إلى إعلان شعب أنا بقول لسيادة الوزير يا ريت يكون ده على أرض الواقع حتى يكون هناك تلاحم ما بين الشعب والإعلام ليه المواطن بيدور على القنوات الأخرى دون القنوات الحكومية لأن الحقيقة لابد أن تصدر أولا من التليفزيون الحكومى التليفزيون المصرى الذى نكن له كل احترام وكل تقدير ونأمل أن ينهض بمصر بعد ثورة عظيمة ثورتنا ثورة 25 يناير منال الإتربى : الفتنة نائمة لعن الله من أيقظها شكرا كل الشكر للكاتب الصحفى محمد زكى نائب رئيس تحرير الوفد وغدا إن شاء الله مشاهدينا الكرام مساحة جديدة للرأى شكرا لكم والسلام عليكم
