أحمد عفيفي يكتب: النائب العام « الجوكر » .. إيييه كلكوا عليا ولا إيييهأ!!

خلاص يا جماعة الخير مبقاش فيه بلد على إيد الإخوان المسلمين .. اللي نفسه يعمل حاجة يعملها .. اى حاجة ,.. اللي زهقان من مراته يقتلها .. واللي قرفان من اخوه يحطه له حتة حشيش في جيب البنطلون .. واللي مديره مطلع عينه يقلع له عينيه الاتنين .. وانا اضمن للتلاتة البراءة وبدون كفالة .. وبالنسبة للي قتل مراته حيخرج بضمان المحل اللي اشترى منه السكينة .. واللي حط حشيش لاخوه حيخرج بضمان تاجر الحشيش ذات نفسه .. واللي قلع عين مديره حيخرج بضمان الدكتور اللي عالج له صباعه بعد ما " خزأه " في عين المدير.

خلاص يا جماعة .. مفيش قانون في البلد والبركة في مرسي والإخوان المسلمين .. وسيادة النائب العام.. نائب الرئيس مرسي وولي نعمته واللي حيفضل يسبح بحمده لحد ما ربنا يفتكره انه خلاه نائب عام على جثة واحد زميله .. واحد ايه ؟ .. ده على جثة القضاء المصري كله .. جابه مرسي تحت جزمته - اقصد القضاء المصري - عشان بعد كده ميرفعش عينه فيه ولا في اى واحد من الإخوان المسلمين .

النائب العام محامي الشعب بقى محامي مرسي والجماعة ضد الشعب .. كده خبط لزق .. وعلى المتضرر اللجوء إلى القضاء .. قضاء إيه بقى .. هو فيه قضاء .. ولا فيه عدل في البلد .. والبلد أساسا مفيهاش وزير عدل .. طبعا مفيهاش وزير عدل .. هو انت عايز تقنعني ان المستشار احمد مكي وزير العدل في مصر .. كل الخراب اللي بيحصل ده في الهيئة القضائية المبجلة وتقوللي هناك وزير عدل .. المحكمة الدستورية العليا محاصرة بقالها اسبوعين بشوية بلطجية وتقوللي فيه وزير عدل! .. انصار حازم ابو اسماعيل ابن الأمريكية دخلوا وحاصروا محكمة مدينة نصر عشان يخرجوا واحد بلطجي زيّهم ممسوك وفي ايده سلاح وهباب ازرق وتقوللي فيه وزير عدل! .. العدالة ضاعت في البلد بعد ما قمنا بثورة عظيمة ، وتقوللي عندنا وزير عدل .. رئيس الجمهورية قاعد يخبط في قراراته وحاطط القانون تحت جزمته وتقوللي عندنا وزير عدل! .. النائب العام عبد المجيد محمود شالوه بقرار وبإعلان دستوري باطل وتقوللي عندنا وزير عدل .. ده مش وزير عدل .. ده وزير " ... " .. مفيش وزير عدل يشوف الظلم ويسكت عنه .. مفيش وزير عدل يقعد يتفرج على مسخرة من رئيس الجمهورية ويقول لنا : انا واثق في صدق نواياه .. مفيش وزير عدل يحصل في عهده ان نائب عام يُقال بقرار جمهوري ويجي واحد غيره بقرار جمهوري برضه .. ده مش وزير عدل .. ده وزير " ... " .. ايوه زي ماقلت انت بالضبط.

اروح بقى لسيادة النائب العام اللي جابه مرسي .. واللي استقال بعد ضغوط وكلاء نيابة رجالة.. راحوا له لحد مكتبه: لازم تمشي.. عشان نفضل احنا واقفين .. راسنا في السما .. انت جيت غلط وبطريقة غلط وقبلتها على نفسك .. بس انت مش بتمثل نفسك .. انت بتمثل القانون وهيبة القضاء .. عشان كده لازم تمشي برضاك او غصب عنك.

وتحت الضغط اضطر الراجل انه يرضخ لإرادة الشباب الرجالة وكتب استقالته وشكروه .. وبعد يومين رجع فيها تاني .. كأنه وقت ما كتبها كان شارب حاجة أصفرة وصحي من النوم لقى نفسه " ... " .. لأ مش اللي جات في بالك .. لقى نفسه مستقيل .. و الراجل خاف .. حيقول لمرسي ايه .. انت اللي أمرت بتعيني نائبا عاما ، وشوية عيال أجبروني على كسر كلمتك وقرارك وخلّوني امشي .. طيب والله ما انا ماشي .. واللي حيجي تاني مكتبي يهددني حاقول للريس مرسي يشوف شغله معاه .. وحاقول لوزير العدل يشوف له صِرفة في العيال بتوع النيابة دول اللي فاكرين نفسهم ثوريين .. وبعد مرسي ومكي حاقول لماما عليكوا يا وحشين .. ياللي مش بتحترموا الأكبر منكم .. عيب عليكوا ابقى راجل كُبارة وفي المنصب ده وتعملوا عليا " صيع " ... ايييه اييييه .. كلكوا عليا ولا ايييه .. مع الاعتذار لمحمد صبحي في " الجوكر ".

ارجع واقول ياجماعة احنا مش في دولة .. احنا في ملهى ليلى .. احنا في كازينو بديعة مصابني .. احنا ولاد سنية سوست .. م الاخر ... احنا معندناش دم لو سكتنا ع اللي بيحصل.