احمد عفيفي يكتب : التحرير الاتحادية .. رايح جي!

والله العظيم كان منظر يشرح القلب الحزين.. وكان مفاجأة للعبد لله الضعيف .. انا قلت حيروح الاتحادية يجي 500 او ألف واحد .. اقوم الاقي يمكن اكتر من 700 الف متظاهر .؟. وزيّهم في التحرير .. منظر والله العظيم أبكاني ، فرق السما م الأرض بين ناس خارجة من نفسها قرفانة من مرسي والإخوان .. وناس خارجة غصب عنها بأمر من مرسي والإخوان ..

يا ناس بصوا في الوشوش عشان تعرفوا الفرق بين البلاهة والنباهة .. اتكلموا مع الفريقين عشان تعرفوا الفرق بين التخلف والفطنة .. اسأل اللي عند الاتحادية امبارح واللي في التحرير : انت نازل ليه وعايز ايه .. واسمع كلام محترم لناس فاهمة بالضبط هى عايزة ايه .. واسأل اللي كانوا عند جامعة القاهرة نفس السؤال واضحك على الإجابة وبص على وش اللي بيتكلم وهو فاتح بقه مش فاهم اى حاجة .. طيب انت جي ليه وكان عليك بإيه ؟ والرد الوحيد : عشان مرسي حلو .. وممكن توصل درجة التخلف انك تسأل واحد جي مثلا من البحيرة : انت جي ليه يافلان .. فيرد : انا جي انتخب محمد مرسي عشان يبقى رئيس .. فتقول له : طيب ماهو رئيس بالفعل .. فيرد على طريقة الدكتور شديد زمان : وماله ياخويا .. عشان يبقى رئيسين .. ميضرش .. المهم يكون مبسوط وراضي.



صحيح على رأى الدكتور شديد .. وماله ياخويا المهم يبقى مبسوط وراضي .. طيب ياتري مرسي مبسوط وهو بيهرب من الجموع الغفيرة اللي راحت لحد باب قصر الاتحادية ؟ .. ياتري منظره ايه قصاد عياله وهو راجع جري مرعوب من اللي حصل عند قصره؟ .. طيب تصدقوا وتأمنوا بالله .. مرسي صعبان عليا.. واللي بيقول انه زي مبارك واخد دكتوراه في العند مش عارف حاجة .. هو مسكين لايعرف العند ولا ديالو .. هو ياعيني اتورط ورطة سودا ويتمنى بينه وبين نفسه دلوقتي انه يخلع ويرجع للجامعة تاني كافي خيره شره .. بلا رئاسة بلا زفت .. ماكنت قاعد رئيس حزب الحرية والعدالة ومستخبي .. مش في الواجهة .. كل همسة محسوبة عليا ..



مالي انا ومال الرئاسة واتحط في وش المدفع .. الاسم انا اللي باقول القرار ، والفعل انه جي لي من المقطم .. ناقص يقولها وبالفم المليان : والله ما انا لاعب .. دي لعبة وسخة ومفيش تنافس حقيقي .. انا وشوية عيال ضد شعب كامل وحرّيف .. وعايزني اغلب .. ليه هو انا " جدو " .. كل ما انزل اجيب جون .. ولا فاكرين بديع هو حسن شحاته .. ده دماغ بتخطط " يقصد شحاته " وده دماغ بتدمر وفاكره نفسها هى الوحيدة اللي تعرف القرد مخبي غداه فين .. انا تعبت .. عليا الطلاق تعبت .. ياريته الشاطر كان خدها وغار بيها وكان ساعتها يورينا شطارته بجد وهو بيواجه ناس دماغها توزن بلد ويعرف الفرق الرهيب بين رسالة على موبايل .. روح هنا وتعالى هنا وانصرف .. ورسالة جاية من العقل لكل واحد على حدة .. يتحرك وقت مايحب وفي الوقت اللي يحس فيه انه لازم يتحرك.



ارحم نفسك يا مرسي .. صدقني مش نافعة .. حتى لو رجعت في كلامك المرة دي كمان .. جماعتك مش حترحمك .. حتورطك كل ورطة والتانية وفي الأخر حتلاقي نفسك انت لوحدك اللي شايل الليلة .. امبارح خرجت هربان من الباب " الورّاني " بتاع القصر .. بكره حتضطر تخرج من نفس الباب برضه بس ع المطار .. ومتقلقش يا مرسي .. مش حتتعلق كتير في الجو بالطيارة زي زين العابدين .. مش عارف تروح فين .. قطر فاتحة لك صدرها .. ولو مش قطر.. اوباما وهيلاري حيشوفوا لك مكان أمن .. لأنك ببساطة قدمت السبت فلازم تلاقي الحد .



المهم خدها مني وقول الواد ده كان عنده حق .. انا مش أد اني ابقى رئيس مصر .. دي مصر دي طلعت كبيرة اوي وانا ماكنتش عارف .. واللي ميعرفش يقول عدس .. وبلاش سيرة العدس دي دلوقتي .. بتفكرني بأيام سودا .. باين عليها راجعة تاني .. بس المرة دي غير كل مرة .. عشان كده قلها يا مرسي وبصوت عالي : انا مش أد اللعبة دي .. م الأخر ياجماعة .. انا مش أد مصر!!