صديق العيسوي يكتب: اشمعنى.. مرسي

بالمناسبة وتقريبا كده.. أنا الوحيد فى جريدة التحرير وموقع الدستور الأصلي اللى هنتخب محمد مرسى، لا ياربى فيه واحد كمان زميلى الخلوق أحمد القاعود قالى هنتخب مرسى، كده بقينا 2 من إجمالى 230 زميل فاضل شغالين فى الجرنال والموقع ما بين رؤساء أقسام ومحررين وإداريين وعاملين، والله نسبة مش بطاله، وكمان لازم تضع فى الاعتبار إننا مش "إخوان" ولا حتى أعضاء فى حزب الحرية والعدالة، باقى الزملاء اللى عددهم 228 منقسمين والحمد لله، منهم اللى هينتخب أبوالفتوح، واللى بيدعم حمدين صباحى، واللى هيدى صوته لعمرو موسى، حتى شفيق ياراجل هياخد صوت م "التحرير" ، زميلتنا الفاضلة ".............." قالتلى هنتخب شفيق، مش مهم يعنى صوتها اللى هينجحه.
زمايلى و"أساحبى" بلغة الفيسبوكيين كلهم مستغربين وزعلانيين أنى هنتخب مرسى، زى ما أكون هكفر ياجدعان، هو "مرسى" ده مش بنى آدم زينا، بلاش "واحد مننا" علشان حمدين مايزعلش، عموما أنا لست من هواة الدخول فى معركة لإقناع الآخرين بمرشحى فى إنتخابات الرئاسة، لييييييييييييييييه لأنها معركة خسرانة خسرانة خاصة مع زمايلى الناصريين الليبراليين اليساريين القوميين اللى أنا بحبهم، وأنا لا أقبل مطلقا أن مرسى يفرق بينا، ولا هو حتى كمان يرضى ده يحصل، الغريب يا أخى إن كل واحد مقتنع بمرشحه اقتنااااااااااااعا تاما لا يقبل المناقشة أو الجدال أو حتى التشكيك فى مصداقيته وشفافيته ونزاهيته، وبصراحه حقهم، طالما هيصوتله..
أما بقى بخصوص المرشح بتاعى الدكتور المهندس محمد مرسى، لا هقولك مشروع نهضة ولا وراه مؤسسة وصرح كبير، وأنه اعتقل قبل كده عشرات المرات من قبل زبانية النظام السابق، ولا هضرب على وتر أن رموز إسلامية وقيادات سياسية كتيرة بتأييده، ولا هقولك لعيبة الكورة كلها معاه وعلى رأسهم اللاعب الحريف والمحترم محمد أبوتريكة اللى مصر كلها بتعشقه، لالالالالا مش هلعب ع الوتر ده خالص.
هما كلمتين هقولهم وأختم بيهم المقال الهلس ده وأجرى على الله، أنا هنتخب محمد مرسى مش علشان هو محمد مرسى لأ.. أنا هنتخبه لأنى لما قعدت وسمعته وركزت معاه فى كل البرامج اللى طلع فيها لمست فيه شئ من الصدق والوضوح وعدم التلون والاعتزاز والفخر بانتمائه لجماعته - حتى لو اختلفنا معهم - لم يتنكر مرسى من بيعته مثلما فعل آخرون وطبعا محدش يقولى أنت تقصد أبوالفتوح! أنا ما بقصدش حد ياعم.. أنا بس بوضح، لم يرتم مرسى فى أحضان النظام السابق ولم يعمل لديه موظفا على مدار 43 سنة، وبرضو ماحدش يطلع يقولى أنت تقصد عمرو موسى، لم يشارك مرسى فى معركة الجمل ولم يهاجم الثورة والثوار ويلعن فى أم الثورة حتى الآن، وماحدش يطلع ناصح ويأكدلى أنى بقصد أحمد شفيق، عموما وعلشان ما أطولش عليكم.. صوتى لمرسى لأنه بلدياتى "شرقاوى أصيل" واللى يعرف الشراقوة كويس، يعرف أنهم ممكن يضحك عليهم، حد يقرطسهم، يبعلهم محطة مصر، يساهيهم ويسرق خلجاتهم، لكنه لا يمكن يسرق وطنهم ولا حتى شبر منه، والشرقاوى بالذات لا يمكن يبيع كرامته لحد، حتى لو كان مرشد الإخوان ذات نفسه.. عشان كده أنا أخترت مرسي.