الانتخابات بكفر الشيخ ضبابية

تفاوتت اراء الناس حول اختيار مرشحى الشعب والشورى واختلفوا فى الاختيار ولكنهم اتفقوا فى ان الانتخابات ضبابية ولاتوجد معلومات واضحة لديهم عن القائمة والفردى حتى التقسيم الجديد للدوائر ومنهم من قرر عدم الخروج لانه مش فاهم حاجة فى لوغريتمات الانتخابات
فى البداية قال :جمال سعد المنسى تاجر موبليا
انا هنتخب اللى يتقى ربنا فينا واحنا تعبنا من اللى بيتكلموا وبعد كده منشفهمش الا بعد انتهاء الدورة وعلشان كده انا هنتخب المشايخ اكيد هيتقوا ربنا فينا ونجرب المره دى كمان هى يعنى ام المرات والصورمتعلقة فيها ناس كتير شكلهم كويس اما هما هيعملوا ايه ربنا يعنهم علينا لان مصر عايزة رجالة بتحب البلد ويكون قلبهم عليها زى ما قلبهم على اولادهم
احمد عتمان طه طالب بكلية الهندسة بكفرالشيخ بالنسبة للنظام الجديد للانتخابات انا مش فاهم حاجة خالص وانا سالت ناس كتير الكل مش فاهم ولا ايه النظام وانا مش عارف اختار بناء على ايه وحاسس ان ماليش دور وصوتى اكيد مش هيكون معبر عن الفترة القادة وكان واجب ان التليفزيون المصرى والاعلام بصفة عامة يبصروا الناس هما هيعملوا ايه يوم 28 القادم ومعظم الناس اللى متقدمة المرة دى هيه نفس الوجوه اللى عرفناها من اول الدنيا وكلمة برنامج انتخابى دى شبعنا منها وكلهم بيتكلموا كويس والفعل عكس القول
امانى سعد مسعود ست بيت من مطوبس قالت انا مش مهتمية بالكلام ده لانهم بيعكوا وبيغيروا النظام الانتخابى وانا مش شايفة حاجة بتتغير والثورة اتعملت واحنا مش عارفين حاجة احنا عايزين حكومة وخلاص وانا معنديش فكرة عن حاجة خالص وانا مش شاغلة دماغى بالانتخابات انا عايزة النتيجة واللى يجى يجى المهم ان مصر تبقى حلوة
احمد سعد احمد مدير مدرسة اعدادى الى الان لا نعرف اى برنامج انتخابى لاى مرشح واحنا يتم الاختيار للمرشح بناء على السمعة الطيبة وعلاقته بالناس وثقافته وطريقتة فى حل المشاكل ومن خلال كل دا هاختار المرشح وحتى الان لا نعرف الفردى والقائمة ودا شى مغيب علينا