عبد المنعم حسين يكتب: روبابيكيا

عبد المنعم حسين
بيكيا .. بيكيا .. روبابيكيا نشترى القديم
نظام سابق متهالك .. حكمه بائد غشيم
أعلامى منافق .. بيرافق أى ظل زعيم
واللى ظل صامت وساكت عن المظاليم
وكل من ظنك جاهل مملوك .. عبد بهيم
واللى خِفَى وقت الحسم وظن نفسه لئيم
نَّضَّف بيتك .. اتخلص من الكراكيب
بيع زمن الغفله .. والسَفَله ولو بالملاليم
بيع واشترى نفسك وامنح نفسك التكريم
روبابيكيا .. أرمى يا مصرى .. يا حكيم
بيكيا .. بيكيا .. روبابيكيا
اتخلص من اللى فات عليهم ألف خريف
اللى صابغ واللى شادد و الغاوى تزييف
والطبال .. الزمار .. الحنجورى الهتيف
اللى مد قفاه للى وراه وهرا ايده تصقيف
اتخلص من الخواف اللى راكبه الخفيف
الملعثم .. الملجلج .. حامل ختم التسويف
اللى واكل كل الأطباق وسارق الرغيف
اتخلص من اللى لازقين فى الكراسى
وسايبين الشباب يدهنوا حيطه ورصيف
روبابيكيا .. اشترى اللى مفروض يترمى
لزوم التجديد .. والتطهير والتنضيف
تفيد بأيه خرابه فى غابه .. بالتكييف
تفيد بأيه الآثار لحاضر بلا تصنيف
بيكيا .. بيكيا .. روبابيكيا
اتخلص من قصور وكراسى الملوك
البرواز المدهب والسندات والصكوك
عَرضِنا المُباح سِفاح .. والدم المسفوك
صاحب التكيه والوسيه البطل المشكوك
والفاسد المفسد والبلطجى .. والصعلوك
والشعب الخانع اللى يحب يعيش مملوك
واللى مالوش أمل وكاره العمل المفكوك
الماشي ع الواقف بلا مواقف والمربوك
بيكيا .. بيكيا .. روبابيكا
عشان مصر انهارده
عشان مصر بكره