نهى البلك تكتب: يا نخيل .. !

بتهز جريدك يا نخيل على إيه !؟..
بتخيل وطالع فيها ع الآخر !
وبخيل , ولا طارح بلح نجنيه
ولا ضلة ليك ,, ولا راضي تتاخر
خاوي السُباط , وعباط كتير طلعوك
عالي , ومثالي , وخالي ,
ويغلبك صعلوك !

جدرك متين ,
ومين دا يقدر يقلعك !؟
دي الأرض عرضك ,
والتراب دا مضجعك
لو يسمعك رعديد بليد راح ترعبه
وان مَد إيد , علشان ما يطلع , تلهبه ..
صوت الجريد عالي , ومالي الجو
لكن ولو ..
يوم لما حَبّوا يخلعوك ,
سمعوك هزيت جريدك في الهوا
قطعوك ! ..