نهى البلك تكتب: وسواس !

وسواس ..
بيوسوس ليّا ف كل نهار
والليل ستّار!
وف يوم الحق
يا ليك الجنة
يا ليك النار !
طب فين ح تروح ؟!
ومافيش غير همّا طريق مسموح
والدنيا ما بين
نفس الصنفين
ماهو فيها من الاتنين مقدار! ..

والشمس مدار ..
والشمس حريق !
وبتبعت نور دافى ورقيق !
لو منها قريب
تغرق فى لهيب
لو تبعد
مش راح تلقى طريق !

والليل قَمَرة
بعيون سمرة
ساكنُه عفريت جنِّى خنَّاس !
وآه م الوسواس !!

مش قادر حتى أبص ورايا ..
مش عايز اشوف ! ..
مش خايف أنا
ميِّت م الخوف !!
شايف جامع
لكن سامع
من ورا ودنى أصوات بتزيد
أصوات صرخات شبه الزغاريد !
على دقّ طبول
على صوت أهبل غلبان مخبول
عمّال بيقول فى كلام فاضى
عن بكرة .. وضحكة.. وطفل .. وورد
وخاتم ماس !!