الملحن والشاعر عزيز الشافعي يكتب: كنت نازل اشتري الدستور

يوم عيد ميلادي اللي هوة بالمناسبة عيد انتصارنا .. كنت نازل اشتري الدستور
يوم اجازة والشوارع فاضية خالص .. انسي انك تلقي زحمة ف المرور.
حاشتري الدستور واروح عالقهوة واشرب شاي بفتله بعد ما اضرب الفطور.
اصلي من عادتي اني ابدأ بالمقال بتاع ابراهيم .. دايما العنوان بيخطف واللي جوة ف الصميم.
والمقال مع انه جد بس بيضحك بجد .. واما تقراه من خطورته . تبقي خايف يلمحك بالصدفة حد.
هوة عيسي ده مش بيقلق م اللي كاتبه؟ .. هوة ايه عالغلب غاصبه؟
هوة ايه ف الحق عاجبه؟ .. طب ما كل الناس بتكدب ... ياما كدبوا وياما كتبوا
انت دون كيشوت ولا جيفارا ولا انت ابراهيم ؟
الغريبة انك منوفي بس برضه مش لئيم
كنت بقرا للقعيد وابراهيم منصور وخير .. اشوف بورنجا وبورتريه وعامود نجلاء بدير
نور ونوارة بثينة نبيل فاروق ..واقرا رباعيات سمير واتهوس م الكاريكاتير .
صفحة الفن الوحيدة رغم ان الفن مالي كل صفحة وكل سطر.
والرياضة صفحتين ودي الجريدة الوحيدة اللي زملكاوية ف مصر
يعني ناقصة يا ابراهيم ؟؟؟ مش كفاية انك معارض لا زملكاوي صميم.
الغريبة انك منوفي بس برضه مش لئيم
ياتري ياعمر يا طاهر كاتب النهاردة ايه .. الجدع ده دمه سكر مصري اصلي وابن ايه
وسط احلامي الجميلة شفت كشك جريت عليه .. قلت لبتاع الجرايد هات ياعم وخد جنية
قال مفيش
قولتله ازاي ياراجل هي خلصت ؟؟ طب مفيش .. طبعة تانية ولا تالتة ؟ نسخة حد قراها حتي؟
قالي عندي طبعة اولي بس غير الاولاني .. اي واحد يشتريها ف لحظة بيرجعها تاني
اصلهم شالوا ابراهيم... اصلهم شالوا ابراهيم
اتبسطت ياسي ابراهيم ؟؟ يومي باظ ... اعمل ايه دلوقتي يعني واروح لمين؟
اقرا ايه ؟؟ واقرا ليه ؟؟ حط نفسك مطرحي وقولي اعمل ايه؟
اوعي تسكت .. انت امتي سكت يعني؟؟ .. اوعي تيأس ..اوعي لانت كمان تبيعني
عايز اصحي بكرة الاقي .. ابراهيم كاد الاعادي .. والقي جرناني حبيبي .. واخطفه قبل الايادي
واوعدك اني ساعتها .. حعزمك علي عيد ميلادي