أحمد عفيفي يكتب: حوار عصبي جدا مع اخويا .. اللي مش اخواني!!

قال لي : ازاى السيسي ساكت على " المرة " اللي اسمها سما المصري .. اللي عايزه الحرق وعاملة قناة اسمها الفلول .. وحاطه صورة مبارك على صدرها .. " قالها لي بالعامية البحتة " .. وقاعدة تهز فيهم .. ولا القذر اللي قصادها اللي عامل البرادعي .. والاتنين بيقولوا كلام اقذر من القذارة نفسها؟
قلت : م الأخر ياتها القرف .. انسانة مخبولة بكل معاني الكلمة وفعلا كونك تسيبها تتمادي في اللي بتعمله .. شىء مقزز .. لكن السؤال : مال السيسي بأم اللي جابت سما المصري؟
فرد : يعني زي ما قفل القنوات الدينية في 3 دقايق .. المفروض يقفل القناة الوسخة دي .. ولا هو عاجبه ان واحدة تتمسخر بالشكل ده؟
قلت : ومي قالك ان السيسي هو اللي قفل القنوات الدينية .. وهو دلوقتي يقدر يقفل قناة الفلول ان كان فيه قناة بجد اسمها الفلول ؟
قال : ومين غير السيسي يقدر يعمل او ياخد قرار دلوقتي؟
قلت : عندك رئيس مؤقت اسمه عدلي منصور .. ورئيس حكومة اسمه الببلاوي
قال : بلاش استعباط .. السيسي هو الحاكم الفعلي لمصر
قلت : ايه دليلك .. هات لي قرار واحد اخده يقول ان هو رئيس الجمهورية
قال : من غير ماياخد قرار .. هو رئيس الجمهورية
قلت : هى عافية يعني .. ولا عايز نتناقش بالعقل؟
قال : هو اللي بيحصل في مصر خلى حد عنده عقل
قلت : يعني من يوم 3 يوليو تحديدا .. ولحد يومنا هذا .. والإرهاب اللي مالي البلد والناس اللي بتموت والعيال اللي بتتخطف .. والتسريبات بتاعت عبد الرحيم علي وجنان مرسي في القفص الزجاجي .. كل ده السيسي مسؤول عنه بحكم انه رئيس فعلا من يوم ما اعلن عزل مرسي .. ده يبقى رئيس فاشل وميلزمناش.
قال : انت بتحاول تهرب من الاجابة
قلت : وهو فين السؤال اساسا .. ؟
قال : ما انا بقولك .. ازاى سايب واحدة زي سما المصري تعمل اللي بتعمله؟
قلت : ياسيدي كمان مرة ياتها القرف.. انا شخصيا باحتقرها واحتقر كل اللي يتفرج عليها ويضحك .. لكن ايه علاقة السيسي بيها .. ده لو حتى بفرض انه هو الحاكم الفعلي للبلاد .. حيسيب كل الهم الازرق ده ويبص على واحدة رقاصة ولا مغنية بتعري نفسها قصاد الناس .. اياك تولع يا اخي.
قال : ايوه ماهى بتشوه صورة الاسلام بتاعنا .. وانت عارف كويس .. انا مش اخوان.
قلت : وهى دي بس هى اللي بتشوه صورة الاسلام بتاعنا؟ .. طيب واللي فاتحة بيت دعارة .. واللي لسه بياخد رشوة .. والجزمة ابن الجزمة اللي خلّف من اخته 3 عيال .. ده مش تشويه للاسلام .. ولا عايز تقوللي ان السيسي المسؤول عن كده؟
قال : ايوه .. اى حاجة غلط هو المسؤول عنها
قلت : بأمارة ايه؟
قال : بامارة انه الرئيس
قلت بعصبية غير مفتعلة : عليّا الطلاق بالتلاتة .. السيسي مش رئيس مصر.
فقال : ماشي .. حيبقى رئيس مصر بعد الجيش ما فوّضه.
قلت وقد زادت عصبيتي : عليّا الطلاق كمان مرة الجيش ما فوّضه
قال : ياسلام .. هو لازم يقول بالمفتشر احنا فوضناك؟
قلت : مش من حقه اساسا كمؤسسة عسكرية انه يفوّض السيسي .. فقط تركوا له حرية اتخاذ القرار.
قال : خلاص ماهي باينة .. يبقى فوّضه
قلت : يا دين امي .. ياعم افهم .. اذا كان الراجل لحد اللحظة دي ما اعلنش انه حيترشح.
قال : بس حيترشح.
قلت : لمّا يحصل نبقى نحاسبه
قال : وتفتكر زي ما قفل القنوات الدينية .. حينسف سما المصري م الوجود؟
قلت : تاااااني .. الله يخرب بيت سما المصري على اليوم اللي شفتها فيه .. دي حاجة ملهاش لزمة اساسا .. مش محتاجة رئيس مصر يشيلها او يعلمّها الادب .. هى اساسا نكرة .. واحنا اللي دماغنا مخبولة اننا بنتكلم عنها.
قال : عموما .. السيسي قصاده بلاوي سودا .. ربنا يعينه عليها
قلت : صح .. واللي اسخف من سما المصري وعايزين الحرق فعلا.. كلاب السراية " زي ماسمّاهم ابراهيم عيسى " .. اللي من دلوقتي بيمرنوا نفسهم على لحس التراب اللي حيمشي عليه السيسي .. هما دول المشكلة الحقيقية .. مش تقوللي سما المصري .. دول بقى حطوا الرقص والعهر والدعارة وهز الوسط والتطبيل وكل وساخات الدنيا وضربوها في " خلاط " .. وراحوا شاربين واستعدوا من دلوقتي لشيل جزمة السيسي على دماغهم .. مش عشان هو جدع ولا عشان مصر .. لأ .. عشان هما اساسا " وسخين " والوسخ " المتأصل " صعب اوي انه ينضف .. لأنه مش عايز يبقى نضيف .. عاجباه الوساخة!
قال : وتفتكر السيسي حيسيبهم يلحسوا جزمته وهو فاهمهم واحد واحد؟
قلت : معتقدش
قال : ولو حصل ؟
قلت : يبقى فعلا ميلزمناش!!