أحمد عفيفي يكتب: واحد زائد واحد بيساوي اتنين

مش تلاتة ولا اربعة .. مش حسبة برما هى .. اللي نزلوا يصوتوا للدستور هما خلاصة الشعب المصري .. والنتيجة لما تطلع فوق التسعين في المائة " نعم " طبيعي جدا .. لأن المعارضين - وهم قلة - قاطعوا واعلنوها صراحة مش نازلين .. " أراحوا واستراحوا " .. الإقبال كان ضعيف ؟ لأ .. بس برضه مكنش قوي .. طيب ليه ؟ .. اقولك لأن دايما الاستفتاء على الدستور بتبقى نتيجته معروفة مسبقا .. وناس كتير بتكّبر دماغها - مع ا ن ده غلط – ومتنزلش .. طيب الستات كانوا ماشاء الله كتير جدا .. وده طبيعي .. لان الستات من ساعة 25 يناير وهما كلمة السر في نجاح اى ثورة .. ممكن جدا تقوللي اصلهم بيحبوا السيسي وعشان كده هو خاطبهم بالاسم قبل التصويت .. حاقولك ممكن طبعا بس حبهم لمصر اكبر .. فلما يجي النداء من واحد انا اساسا بحبه يبقى لازم انزل واعرف يعني ايه استفتاء على دستور البلد في الوقت ده بالذات ..

طيب فين الشباب اللي هو عصب اى امة .. مش باينين ليه؟ .. ارد واقولك : لأ .. كانوا موجودين في اماكن كتير جدا خاصة اللي بعيد عن المدن الكبرى زي القاهرة والجيزة .. حتقوللي بس نسبتهم كانت قليلة .. ارد واقولك ماشي .. عايز تقول ايه يعني م الأخر ؟ .. حترد : يعني الشباب بتوع الثورة الحقيقيين مش موافقين على الدستور وعلى اللي بيحصل في البلد .. ؟ اسألك : اى ثورة بالضبط .. اصلها تفرق كتير .. 25 يناير ولا 30 يونيو؟ .. حترد : الاتنين .. حاقولك لأ .. كداب في أصل وشك .. بتوع 25 يناير جايز .. انما 30 يونيو مستحيل .. بتوع 25 يناير.. الاسامي المعروفة منها وفيها طلعوا كلهم اى كلام وعليهم مليون علامة استفهام .. ولهم ناس للأسف بتصدقهم وفاكراهم ثورجية بجد .. فممكن يمشوا على هواهم ويسمعوا كلامهم ويقرروا مقاطعة الاستفتاء .. انما 30 يونيو حاجة تانية .. وهما دول فعلا عصارة الشعب المصري اللي مالوش اجندات ولا نيلة .. كان عددهم كام في الميدان ؟ .. 30 مليون تقريبا .. ستات على رجالة على شباب على شابات .. واللي نزلوا يصوتوا للدستور كام تقريبا ؟ 25 مليون مثلا .. تبقى الحسبة صح .. 25 من 30 مليون نزلوا .. كويس .. اكتر من كده يبقى افترا .. ده استفتاء مش ثورة ولا انتخاب رئيس .. ده كده ميت فل وعشرة.

حتقوللي : السلفيين ضربوكوا بُمبة ومنزلوش .. حارد واقولك : تصدق وتأمن باللي خلقك .. دي احسن حاجة حصلت .. بلا نيلة .. اللي خدته القرعة تاخده ام الشعور .. اللي حصل لمرسي واخوانه قصاد عنيهم .. وعقلك في راسك تعرف خلاصك .. احنا بيهم ومن غيرهم مسلمين وموحدين بالله .. مش عاجبهم .. مطرح مايحطوا راسهم يحطوا رجليهم .

حتسألني : يعني انت مرتاح للدستور ومبسوط من الستات واللي عملته؟ حارد : مرتاح بنسبة كبيرة طبعا .. بس المهم الحكومة اللي حتيجي تعمل به بجد .. مش يبقى مجرد حبر على ورق .. اما عن الستات واللي عملته ان كنت تقصد الغنى والرقص .. فإيه المشكلة .. انت شفت واحدة لامؤاخذة قلعت ملط وراحت تهز بطنها .. ؟ ولا غيرها قعدت تتمايل وترقص رقص خليع على اغنية ليلة حب .. كلهم ستات محترمات وفيهم كتير محجبات .. وستات عواجيز رقصوا على تسلم الايادي تسلم ياجيش بلادي .. ده كفر والعياذ بالله ولا تعبير محمود عن الفرحة؟

طيب اخر سؤال حسأله وامشي .. لأ .. انت قاعد تسأل م الصبح .. سيبني انا اسألك وتجاوب بصراحة ... اتفضل .. يزيد فضلك .. انت عايز أم البلد دي تشد حيلها وتقوم وتقف على رجليها ولا تفضل على حالها من سىء لأسوأ؟ .. جاوب .. اوكيه حاجاوبك بس هات التاني .. ماشي : انت لسه شايف ان اللي حصل في 30 يونيو انقلاب ؟ جاوب .. اوكيه حاجاوبك بس هات التالت .. ماشي : انت مِلة أهلك إيه .. دين أبوك اسمه إيه ؟ جاوب .. متجاوب .. انت رحت فين يا ابن " الرقاصة " ؟ .. الافندي في لحظة ملقتوش قدامي .. كأنه فص ملح وداب!!