محمد صبحي: والدي أوصى بسقوطي في معهد الفنون.. وطردني

كشف الفنان محمد صبحي عن ذكريات رغبته في دراسة الفن، مؤكدا أن والده رفض ذلك في بداية مشواره.
وقال محمد صبحي: "لما دخلت ثانوية عامة قررت أدخل معهد الفنون المسرحية، فتفاجئت بطرد والدي لي من البيت. قلت خلاص هاعتمد على نفسي وهصرف على نفسي، لأنه كان يرى الوسط الفني، وكان يعمل فيه، وكانت وجهة نظره: من أنت بجانب يوسف وهبي؟ وكنت عاوز أنجح".
وأضاف، خلال لقائه ببرنامج "الصورة" الذي تقدمه الإعلامية لميس الحديدي على شاشة النهار: "التحقت بالمعهد بالغصب، وتفاجئت بتوصية من والدي بسقوطي، وكل الأساتذة تلامذته، سعد أردش وجلال الشرقاوي ونبيل الألفي، قال لهم يسقط".
وتابع: "مكنش عاوزني أدخل الوسط. وسعد أردش سألني: اسمك إيه؟ قلت له: محمد محمود. قال لي: محمد محمود إيه؟ ومعملتش أي مشهد كوميدي في المعهد إلا وقت التخرج.. وسألني: أبوك بيشتغل إيه؟ قلت: ساعي. سألني: أبوك اسمه إيه؟ خوفت أسقط. حتى قال لي محمد توفيق: شايف السلم ده؟ عاوزك تمثل إنك طفل طالع وعمرك خمس سنين، ومرة تانية وأنت عندك 25 سنة، وبعدين وإنت عندك 80 سنة".
واستكمل: "قلت كده عاوزين يتسلوا عليّ، وأنا كنت عندي عزة نفس كبيرة، فطلعت السلم بسن خمس سنوات، ونزلت بسن 25 سنة، وبعدين حطيت رجلي على السلم ووقفت، وكلهم ساكتين وقالوا لي: إحنا هنستناك ساعة؟ إطلع يابني؟ قلت لهم: مش قادر. لقيت اللجنة كلها 13 عضو يصفقوا ونجحت".
واختتم: "طلبت من ربنا في كل صلاة اني مكنش أعظم ممثل، لكن قلت: يارب أبقى مختلف بس".
اقرأ أيضا | محمد صبحي: لا أعترف بالعمر.. أنا أكبر طفل في التاريخ