أحمد عفيفي يكتب :30 – 25 = 70 مليون!!

قبل ان تقرأ : عاد ابراهيم عيسى ببرنامج جديد .. وعاد يسري فوده ببرنامجه القديم .. فقررت اهجر قنوات الافلام وعدت استعد من جديد لتعاطي اصوات محترمة تتحدث بصدق ودون نفاق ممجوج .. فتحية للأثنين خالصة لوجه الله .. غير اني اشير الى ان عنوان هذا المقال من وحي اسم برنامج عيسى .. حتى وان خالفني في مفهومه ورؤاه.


*************
ايوه .. صح ..احسبها انت معايا .. لو شيلنا انصار 25 يناير من مؤيدي 30 يونيو حتلاقي الحسبة صح.. مش الناس كانت خايفة ومرعوبة من يوم 19 نوفمبر اللي فات .. يوم إحياء ذكرى محمد محمود .. ؟ وكان اللي بيدعو للحشد في اليوم ده الجماعة بتوع 25 يناير اللي بيكرهوا الجيش والشرطة .. كام واحد نزل ؟ قول انت .. الف .. الفين .. عشرة الاف .. ماشي انا معاك للأخر .. نقول عشرين الف ؟ .. موافق .. ده على اقصى تقدير .. اذن قُضى الأمر الذي فيه تستفتيان ..نسكت بقى ونتلّم .. وبصراحة مش عايزين دوشة ووجع دماغ .. مع كل الاحترام والتبجيل للي نزلوا لإحياء ذكرى شهداء محمد محمود ..على راسنا من فوق كل واحد مات عشان بلده تعيش .. لكن نتكلم من دلوقتي عن يوم 25 يناير اللي جي .. وحتبقى ثورة تالتة .. زي مانكون بنلعب في الحارة .. تيجي نعمل ثورة ؟.. كأننا بنقول زي العيال " الأبيحة " زمان : تيجي نلعب عريس وعروسة ونتخانق مين العريس ومين العروسة ..المسألة بقت ماسخة ودمها تقيل .. مش كفاية علينا الإخوان ووساختهم .. ؟ مش ناقصين بقى بتوع 6 ابريل وكام واحد من اللي اتعذب او اتهان ايام المجلس العسكري م الشرطة العسكرية والشرطة المدنية .. يخرم دماغنا اكتر ماهي مخرومة ..


انا قلت قبل كده في مقال سابق ، اللي له تار عند المجلس العسكري او الشرطة ياخده بالقانون .. من حق احمد حرارة اللي طارت عينيه الاتنين انه يرفع قضية ويطالب الشرطة بتعويض 100 مليون جنيه .. من حقه .. ولو منه أعمل كده .. مفيش أغلى من عين البني ادم .. لكن أعلن عدائي المستمر للجهازين " شرطة وجيش " في الوقت اللي هما فعلا اتغيروا وبقوا مع الشعب نسيج واحد ولُحمة واحدة .. يبقى انا عايز اعمل قلق وخلاص.


احمد حرارة بالذات.. بيني وبينه عمار كبير .. رغم اني عمري ماقابلته في حياتي .. بس فاكر اني كتبت مقال عنه من سنتين بعد ما فقد عينه التانية وكان عنوانه :" انت عين وانا عين ونشوف سوا مصر الجديدة " .. كنت بعرض عليه - واقسم بالله العظيم كنت صادق – انه ياخد عين من عنيا .. عشان احس اني رغم غربتي وبُعدي عن أحداث الثورة اني عملت حاجة في حياتي ليها قيمة .. لذلك ربما عتابي لحرارة تحديدا .. من تصريحاته المتكررة بأن الجيش معملش حاجة .. واذا كان عمل فده واجبه .. وان الشرطة مهما صلّحت من نفسها الا انها ايديها حتفضل متعاصة بدم اللي قتلتهم .


وبكده مش حنخلص ولا حتكون لنا نهاية .. صحيح عدد اللي بيسمّوا نفسهم ثوار يناير قليلين .. بس بجد بجد معطليّن الدنيا .. بقوا زيهّم زي الإخوان .. عاملين قلق وبس .. لاهما بالقوة اللي ممكن تقلب أوضاع بلد .. ولاهما متنيلين على عينهم وساكتين .. وكذلك نشطاء 25يناير اللي كتير منهم عليهم علامات استفهام كبيرة جدا .. لاهما قادرين يفرضوا كلمتهم " لأن عددهم قليل " .. ولا هما " بيتكنّوا " في مكان ويكفوا خيرهم شرهم .. لأ .. عاملين زي فرقع لوز .. تنطيط وطرقعة وبس .. واحنا جالنا صداع .. ومش عارفين نستريح ونحس اننا خلاص حطينا رجلينا على الطريق الصح ..كل ما نخطو خطوة .. يرجعونا هما عشر خطوات.


لازم نسلّم بالامر الواقع .. وعشان كده ارجع للمسألة الحسابية في العنوان " 30 – 25 = 70 مليون " .. دول بتوع 30 يونيو بجد .. نزل 33 مليون في الميادين وكان زيّهم واكتر شوية في البيوت حاطين علم مصر في البلكونة وكارت احمر لمرسي .. حقيقة لا ينكرها الا اعمى.. تأييد شعبي غير مسبوق في تاريخ الأمم لثورة بجد .. تقولي بقى فيهم فلول ..اقولك ماشي .. تقولي فيهم بتوع اسفين ياريس " ايام مبارك " اقول لك اوكيه .. تقولي كمان بتوع حزب الكنبة نزلوا .. اقولك يا الف مرحب بيهم .. لكن دول يطلعوا كام 4 مليون ؟ .. ماشي بس كان 30 مليون ناس عادية لاليهم في السياسة ولا يحزنون .. كان منهم عم محمد البقال اللي السنين حنت ضهره ولسه واقف على حيله عشان مستني ربنا يفتح عليه ويبعت لام العيال كيلو بدنجان تقليه قبل ولاده مايرجعوا م المدرسة .. والست ام علية اللي واقفة على ناصية حارة في بولاق ابو العلا بعد جوزها ممات واقفة تبيع شوية خضار عشان الواد ابنها محتاج كراسة وقلم يكتب به أد ايه الاخوان كانوا وحشين وازفت م الطين .. كان فيهم الاستاذ محمد المحاسب اللي في البنك اللي بياخد 500 جنيه ومديره بياخد 5 مليون .. كان فيهم ومنهم واحد غلبان هاجر هربا الى ايطاليا والمركب غرقت وربنا نجّاه .. لكنه مش قادر ينسى مصطفى وسعيد اصحابه اللي غرقوا قصاده ومعرفش يمد ايده عشان ينقذهم " سبحان من انقذه هو " لكن تقولي فيهم بلطجية وناس متأجرة .. اقولك لأ .. تقولي مفيش ثورة تقعد يومين ..الناس تنزل والجيش يخلّص الليلة ؟ .. اقولك : وانت محروق ليه .. وإيه المشكلة ؟ ..ملايين نزلت كإثبات جدّية في الخلاص .. قام الجيش حمى ولاد بلده وناسه .. هو لازم في الثورة نقعد سنة وسنتين ولازم يموت مننا كام الف شهيد .. يا أخي احمد ربنا انها خلصت بدري بدري .. الناس اتخنقوا م الاخوان خنقة سودا ولو مكنش الجيش نزل ..كانوا قعدوا في الميادبن وفرموا الإخوان بسنانهم.


بلاش لعب العيال ده .. بتوع 25 يناير بيغيروا من بتوع 30 يونيو .. لا .. احنا الثوريين بجد وانتوا ثوريين نص نص .. احنا في مرحلة في غاية الصعوبة .. دستور بيتعمل ومجلس شعب جي ورئيس جمهورية .. واللي بيحب مصر بجد يفوق بقى ويبطّل شغل التلات ورقات .. وفين السنيورة .. ؟ .. السنيورة حتضيع مننا كلنا اذا فضلنا ندلّع ونحط في كل حتة خازوق.. فوقوا بقى يا اللي بتسموا نفسكم بتوع 25 يناير .. الماتش خلص خلاص واللي بيعتمد ويحط أمله كله في الوقت بدل الضايع .. عمره ما بيكسب .. الماتش خلص والحكم صفر والنتيجة اتحسمت لصالح 70مليون مصري عايزين يعيشوا وياكلوا لقمة نضيفة ويعلّموا عيالهم ويعالجوهم .. الماتش خلص والجمهور مشي .. قاعدين ليه بقى لحد دلوقتي ..ماتقوموا تروحوا!!