احمد عفيفي يكتب : دستور فيفي عبده : نص أنا .. نص إنتي!!! أحمد عفيفي بالذمة ده كلام ؟ على رأى المثل " سكتنا له دخل ب " حماره " .. ولا بلاش " الحمار " أحسن صاحبنا يزعل .. دخل بجاموسته .. بالبقرة بتاعته كأنه داخل زريبة بهايم ، لا تفهم شيئا ولا تعي شيئا مما يدور حولها سوى أنها تُحلب ثم تُحلب ثم تٌحلب .. وفي النهاية تُذبح ويأكلها الإخوان والسلفيين : ياخدوا الكتف والزند والفخده والريش وبيت الكلاوي وعرق الفلتو ويمصمصوا دين أمها ، ويسيبوا العضم للباقيين .. يا عم " كل .. بس متحفّش " .. بالهنا والشفا .. بس مش كده .. نقسمها قسمة العدل اللي يرضي ربنا .. انتو كام والشعب المصري كام ؟ .. لو حسبناها نلاقيكم تقريبا 360 نفر في البرلمان .. وقبل ماتقولوها عارفين .. انتم بتمثلوا ال 25 مليون اللي انتخبوكم .. على عيني وراسي .. 25 لو خصمناها من 85 يتفضل لنا 60 مليون مصري ، محدش منهم يعرفكوا ولا عاجبه شغل حوريني ياكيكا بتاعكم ولعب التلات ورقات. عايزين إيه تاني ؟ المجلس وسيطروا عليه بأغلبية كاسحة .. أوكيه ، مع إنكم بحق ربنا أخركم 10 أو 20 كرسي .. لكن ما علينا .. طبختوا الطبخة مع المجلس العسكري وانتصرتم في " غزوة الصناديق " ، واحنا اللي أكلنا البالوظة .. طلعتونا كفار " فشر كفار قريش " ، وضحكتوا على الجهلة ب " نعم " تودي الجنة و" لا " تلبد بيها في النار لحد مايبان لك صاحب ، مع ان ال " نعم " بتاعتكم واللي عاجبه المجلس العسكري ، سوف تُحاسبون عليها حسابا عسيرا ، لأنكم ضحكتوا بها علي الشعب ، مستغلين أميته وجهله وانحدار مستواه الفكري والثقافي . المهم خلص الاستفتاء وخلصت الانتخابات وأكلتوا الكعكة كلها .. طب حطوا في عينكم حصوة ملح واتلموا بقى .. لمّوا الدور وداروا نفسكم شوية .. لأ .. البجاحة عندكم متأصلة " سجعة وحلوة .. مشربش لييه " .. عايزين كمان تحطوا الدستور اللي يضمن سلامتكم 100 سنة جاية .. إيه .. خلاص اشتريتوا البلد ؟ ومين باعها لكم ان شاء الله .. ليييه .. كانت عزبة اللي خلفوه ؟ .. دي بلدنا احنا .. دي بلد حرارة ودومة واحمد ومحمد ومصطفى وحسن وحسين وابراهيم وعزة وسالي واميرة .. اللي ماتوا عشان انتوا تفضلوا عايشين وتاكلوها والعة. 50 % ايه اللي بتتكلموا عنها .. في شرع مين وفي أى قانون .. أنا مش خبير دستوري ، لكن اللي سمعته من خبراء كبار ييقول إنكم غلط وغلط وغلط ، وانتم عارفين ان ده غلط في غلط ، وبرضه مستمرين في المهزلة .. 50 % المجلس .. و50 % بقية فئات الشعب المصري كله ، وانتم كمان اللي تختاروا الخمسين التانية .. دستور مصر لميت سنة جاية يتحط بالطريقة دي .. " نص انا نص انتي " ياختي عليها وعلى جمالها .. ده ولا دستور فيفي عبده لما توّزع النقطة بينها وبين الكباريه اللي شغالة فيه ، او لو معاها رقاصة زي دينا - حاجة كده ملهلبة - فيمكن تتفق معاها " نص انا نص انتي " .. انما دستور مصر اللي حيحكمنا لسنوات طويلة ويأمن مستقبل عيالنا لازم يكون حاجة تانية .. ميت سنة يا ناس يا للي تخافوا متختشوش يكون معظمكم ومعظمنا ربنا افتكره ، وحنقف قدامه عرايا إلا من أعمالنا ، فلو كانت حسنات غفر لنا وأدخلنا الجنة .. وان كانت سيئات فليلة اللي خلفونا كوبية .. على رأى عادل امام : امشوا عدل في الدنيا احسن تاخدوا ب " البُلغ " في الاخرة ، وياريتها تيجي ع " البُلغ " وخلاص .. ده عذاب مقيم " كلما نضجت جلوهم بدلناهم جلودا غيرها ليذوقوا العذاب " . اعفينا يارب من يوم كهذا اليوم الأسود واعفي الإخوان والسلفيين " ماهم برضه مسلمين على الأقل بالاسم " من العذاب الأكبر .. حسابه ليس كأى حساب .. حساب مُضاعف .. ماشيين ب قال الله وقال الرسول ، لكن الحقيقة اللي ماشيين بيها فعلا" قال المشير والفريق عنان " .. استغفر الله العظيم .. حتخلّوني أخرج عن طوعي واهبّل في الكلام .. بس بجد انتم تخلوا الحجر ينطق .. عايزين تاخدوا كل حاجة وبأثر رجعي " ماحنا اتبهدلنا وطلعت عين اللي جابونا زمان ، ومن حقنا دلوقتي نفرح ونلم " النقطة " .. قصدي الغلة " .. بس ذنب الشعب إيه ؟ .. حتردوا وتقولوا وردودكم جاهزة : " ما الشعب انتخبنا .. وأرد انا : وانتم عملتوا إيه بالصلاة ع النبي .. جبتوا حقه من حد .. جبتوا حق اللي ماتوا ؟ .. قلتوا بعين قوية للمجلس العسكري اللي انت عملته ده غلط .. خليت العالم يتريق على مصر بعد ما امريكا " زغرت لك بعينها ، فرحت جايب واطي وهوا شيعت لها عيالها معززين مكرمين .. هو لسان وبس وفنجرة بق ، والنائب المحترم ، واتفضل اتكلم ولا تزايد .. لا تزايد ، ولمّا واحد تاخده الجلالة وحيقول بقين حلوين ، تقطعوا عليه الخط قصدي تقفلوا الميكروفون .. إيه .. فيه إيه؟ .. خلّتونا نغني أغنية عبد الوهاب " مين عذبك بتخلصوا مني " .. ما تروحوا تطلّعوا عين اللي عذبوكوا زمان ، ولا هما دلوقتي بقوا زي العسل ، وحرام نعمل فيهم اكتر من كده ، ولازم نرجّع لهم " هيبتهم " عشان ربنا يريّحنا من " خيبتهم " . ما تفوقوا بقى مين مخلّد فيها للأبد؟ .. مفيش .. طيب ما بلاش لعب الحواري ده وتنطيط القرود .. مش ناقصة قرود أصلها .. كفاية علينا القرود التانية اللي عايزة يتولع فيها بجاز في الصحافة والتليفزيون والسيما والمسرح ، قرود على حق ، يتنططوا من شجرة لشجرة ويعملوا لك عجين الفلاحة قصاد صباع موز ، أو شوية فول سوداني .. واحدة متسواش " نكلة " في قناة مشبوهة بتتكلم م العاصمة ، وواحد وزنه نص قنطار ويتكلم " بهدوووووء " .. وواحد يقولك " حدوتة مصرية " وهو " اقرع ونُزهي " .. والتاني يقولك " تحيا مصر " وهو " رمة ولا يسوى " والتالت يضحك ببلاهة ويقولك " ممكن " .. وقناة التحرير بعد عيسى ودينا ومعتز بالله عيبد الفتاح بقت وسامحوني في الكلمة قناة " التخرير " ، وكله دلوقتي بيسمع الكلام الا من رحم ربي .. والعقل نزل فجأة على ناس كتير كانت حرة ونزيهة ودلوقتي يقولوا لك خلاص هانت واذا العسكر ممشيوش ، انا اول واحد حنزل التحرير .. هو فين التحرير .. طفشوا منه أهله بجد .. العيال الرجالة بتوع 25 يناير .. بس ورحمة أمي راجعين تاني .. وساعتها يحق للمجلس العسكري يسحب اتوبيساته من الشوارع ويمنع البنزين تماما .. وحنمشيها " موتورجل " .. بس راجعين راجعين ، وساعتها بقى تعالي يا مجلس الشعب .. يا إخوان ويا سلفيين ، عايزين نشوف الناس اللي انتخبتكم .. قسما بالله حيعملوا فيكم عمايل ، حتى لو جهلة ومش لاقيين اللقمة ياكلوها .. بس بالإحساس كده .. انا انتخبتك .. عملتي إيه .. إدّيتك صوتي ، فرحت انت تدّي صوتك للمجلس العسكري .. شيلتك فوق راسي ، فرحت انت شايل البيادة فوق راسك .. عملت لك قيمة ، فرحت انت مضيّعها بتواطئك ومذلتك .. وعايزني بعد كده انتخبك .. ياخي هع وهع وهع .. بلا نيلة اللي اخدته القرعة تاخده ام الشعور .. ذلّتونا وكسرتوا نفسنا .. ياتكم القرف منك له .. له .. له . قال 50 % قال .. وابور طحين هو حنبيعه ونقسّم تمنه .. ولامرة " لبوة " جايبنها وبالنص .. كفاية بقى مسخرة وقلة قيمة أحسن تكبر في دماغي واقنع دينا الرقاصة انها ترشح نفسها للرئاسة ، واذا كان ع التلاتين الف توكيل ، بهزة وسط تجيب اكتر م اللي جابه أبو اسماعيل .. ما هو كله بيرقص .. بس رقص عن رقص يفرق .. دينا لما ترقص محدش يلومها .. لكن غيرها لمّا يرقص زيها .. الكل " يتف " عليه!!