أحمد عفيفي يكتب: بلاغ عن قنبلة نووية!!

بلاغ صريح ومن غير لف ولا دوران .. ومحدش يقول عني اني عندي معلومات وجبتها منين لما يحصل اللي انا بقوله بالكلمة وبالحرف .. وبالتوقيت دقيقة بدقيقة وثانية بثانية .. ماهو اللي بيعملوه الإخوان بقى مكشوف .. بس الغريب انه مكشوف للشعب ومش مكشوف للحكومة ..امبارح عمرو اديب كان حيجنني في برنامجه " القاهرة اليوم " .. بيقول عن الإخوان أغبياء ، لأنه كان عارف - وقالها ع الهواء - ان التفجير اللي جي بعد الدقهلية حيكون في الشرقية .. وحصل فعلا .. بس السؤال : مين الغبي هنا .. هما ولا الحكومة .. يعني عمرو أديب انصح من وزارة الداخلية والمخابرات العسكرية .. طيب ايه اللي خلاّك ياسي عمرو تعرف ؟ .. اصلها باينة للأعمى .. الإخوان عارفين ان محافظة الدقهلية تقبل العمى ولا تقبلش الجماعة .. عشان كده قبل التفجير بيومين تلاتة شغلونا او اشتغلونا بحكاية سواق التاكسي اللي دبحوه .. وخرجت مظاهرات تطالب بإعدام الإخوان خلال اليومين التلاتة دول .. وفي الزحمة جات المتفجرات ودخلت " واتستّفت " في العربية وبقت جاهزة للتنفيذ .. وكذلك الشرقية حسب مابيقول عمرو اديب 90% من أهلها ضد الإخوان ، عشان كده حصل التفجير التاني.

طيب ان كان كلامك ياسي عمرو صح وله وجاهته وانت رحت ولا جيت واحد عادي .. أمال جماعتنا في الشرطة والجيش غابت عنهم الحكاية دي ازاى لمّا هى باينة للأعمى .. وبعدين لو انت شايف ان هو ده اللي حصل .. يبقى مين الغبي .. الإخوان ولا الحكومة؟ .. اذا كنت انت عارف وفاهم .. يبقى اللي شغّالين في الشرطة والمخابرات بيبعيوا طماطم وفجل على ناصية الحارة وسايبين عربيات مفخخة تدخل وتخرج وهما فاكرينها متعبّية بامية وبطاطس وجاية من سوق العبور؟!!

المهم مش ده موضوعنا .. خليّني في البلاغ اللي لازم الكل يسمع به ويدرك أبعاده واللي حيترتب عليه اذا ما اخدناش بالنا .. المرة دي بقى مش قنبلة خايبة محلية الصنع فيها كام مسمار على شوية بارود من بتاع بومب العيد .. ولا حتى سيارة مفخخة بطن ونص متفجرات زي اللي كانت في الدقهلية .. ولا هى شبه اللي انفجرت من اسبوع في وسط بيروت .. ولا حزام ناسف زي اللي حصل في محطة قطار روسيا امبارح .. كل ده كلام فارغ قصاد اللي جي .. بقولكم قنبلة نووية .. والله العظيم مش بهزر والمعلومات مؤكدة .. وعرفتها من ابني ومراتي .. واختي وخالي وعمتي .. والاسطى سعيد الميكانيكي ومصطفى المكوجي وعم متولي البقال .. واستاذ الجامعة جاري والدكتور احمد صاحبي وصديق عمري .. والمهندس تامر والمحاسب وائل .. ورحاب وولاء وحسن وفايز وسامي أصحابي ع الفيس .. يعني مش انا لوحدي اللي عارف بحكاية القنبلة النووية .. كل مصر عارفة .. اللي بس مش عارفين او مش عايزين يعرفوا .. او عارفين وبيستعبطوا .. او عارفين ومش قادرين يصدقوا هما الإخوان المجرمين الارهابيين.

قنبلة نووية .. صنع محلي مصري .. لا جبناها من أمريكا ولا من إسرائيل .. " متعبّية " بصرخات وأهات وأوجاع على الأقل 85 مليون مواطن مصري .. فيهم اللي ابنه مات .. واللي جوزها خرج ومرجعش .. واللي اخوه كان زي البدر مالي البيت حركة ونشاط ، ودلوقتي قاعد مشلول بسبب شظية كسرت عموده الفقري .. ومتعبّية كمان بأمال عيال صغيرة عايزين بكره يجي احلى .. عايزين مستقبل مفيهوش كوسة ولا اهلي وعشيرتي ولا ابن البيه الكبير ياخد وياكل حق ابن البواب .. متعبّية كمان بدم كل شهيد من اول 25 يناير 2011 لحد اللحظة دي .. تخيلوا بقى لو انفجرت .. ممكن تعمل ايه؟

على فكرة على أد ماهى كده وتحس انها ممكن تدمر العالم .. الا انها مش بتموت .. ايوه مش بتموت ولا بتدمر ولا هى زي بتاعت هيروشيما وناجازاكي .. بس اقسم بالله العظيم اقوى منها .. عارفين ليه ؟ .. لأنها حتخلّى كل واحد يعرف حجمه الحقيقي .. وتجيب أخره .. حتبقى صرخة يوصل صداها للعالم كله قبل ما يوصل للإخوان .. احنا المصريين أصحاب القرار .. الكلمة لينا احنا مش لحد تاني .. اللي عملناه في 30 يونيو شرعي وشافعي ومالكي وابو حنيفة كمان .. واللي مش عاجبه يورينا عرض اكتافه .. حتقعد معانا بأدبك .. حتبقى بلدنا كلنا .. حتستهبل فيها وتقل بأصلك .. يبقى مكانك مش وسطنا.

كلام واضح وصريح اهو .. لا حنموّت ولا حنفني .. لا حنّهد ولا حنّدمر .. بالعكس احنا حنبّني ونعلّي .. قادر تشيل معانا .. بيتك ومطرحك .. حتهد وتخرّب .. يبقى انت اللي جبته لنفسك وتحصّل اهلك وعشيرتك في طره.

ياجماعة الخير طوّلت عليكم .. حقولكم عن مكان وزمان القنبلة النووية .. حتنفجر يوم 14 .. وواحدة اختها بالضبط يوم 15 يناير .. الساعة كام بالضبط ؟ معرفش بس عندك من 8 صباحا ل 8 مساء .. والمكان .. كل حتة فيكي يامصر .. واقف فيها وعليها ناس منك وليكي .. يموت منهم اللي يموت .. بس انتي تفضلي عايشة ومنورة الدنيا .. أمها .. وأدها.