أحمد عفيفي يكتب : « أخونة » منتخب مصر !!

وصلتني معلومات شبه مؤكدة ومن مصادر موثوق بها في المقطم حيث بديع افندي واللي اسمه الشاطر .. وايضا نفس المعلومات المؤكدة من الاتحادية وقصر القبة ، حيث الرئيس مرسي يومين هنا ويومين هناك ، حسب اتجاه المتظاهرين المطاردين له المطالبين بعزله وخلعه ومحاكمته.


تقول المعلومات شبه المؤكدة ان المنتخب القومي الكروي قد تمت أخونته بالكامل من أول اللي بيلم الكور من ورا الجون ، لحد الكوتش مرورا طبعا باللاعبين نفر نفر .. وبناء عليه اجتمع الرئيس مرسي بلاعبي المنتخب قبل السفر الى الدوحة بعد ان اطمئن وكشف بنفسه عليهم نفر نفر ، وتأكد ان كل لاعب مربي دقنه .. وشاف بعينه الشورت بتاع كل واحد منهم واصل لحد الركبة .. وسأل لاعب لاعب كام سؤال هو يعرف اجابته .. فإن تأكد له أن اللاعب يكذب ، أعطاه على قفاه صك الأخونة .. وان كان - والعياذ بالله - يقول الحق ، ضربه على قفاه برضه مع شلوتين حلوين ، واعطاه استمارة 6 .


اكثر من ذلك سألهم عن العصيان المدني اللي حاصل في مدن القناة وغيرها .. بلطجة ولا نوع من الاعتراض الصارخ على سياسة حكومة ونظام .. وكلهم ردوا في صوت واحد : بلطجة طبعا يا سيادة الريس .. فرد عليهم بارك الله فيكم! .. طيب والواد اللي اسمه محمد الجندي مات في حادثة سيارة ولا من التعذيب ؟ .. فردوا بصوت واحد : من حادثة سيارة طبعا يا سيادة الريس .. فرد وهو يحييهم : ماشاء الله عليكم .. إخوانجية ولا أحلى! .. طيب : جبهة الإنقاذ الوطني اللي فيها حمدين والبرادعي .. عملاء وولاد .... ، ولا وطنيين حقيقيين ؟ .. فردوا : الأولى طبعا يا ريس .. ثم سألهم السؤال الأهم : انتوا شايفين ان وجودي كرئيس شرعي وجي بالصندوق ، ولا برمي جتتي على الناس وواخدها بالدراع؟ .. ردوا : شرعي وشافعي ومالكي وابو حنيفة كمان .. برطع ياريس زي ما انت عايز .. انت اكيد شايف احسن من الشعب الجربان الجاهل .. وان شاء الله ربنا حيكتب لك السلامة طول ما سيادتك بتكذب وتنافق وتلاوع زي الإخوان ماعلّموك وزي ما انت بتعلمنا دلوقتي.

هنا اطمئن الرئيس مرسي ان الفريق القومي بالكامل أصبح اخواني اصيل وليس مجرد محب للإخوان .. واطمئن أيضا أنهم أجادوا وبسرعة الكذب .. مما أعطاه إحساسا أنهم من الممكن ان يخرج منهم فيما بعد رئيس جمهورية او مرشد عام .. ولكن بعد عمر طويل .. وقال لهم وهو يودعهم : انتوا دلوقتي رايحين الدوحة تلعبوا ماتش ودي مع قطر .. وانتوا عارفين قطر وقيمة قطر عندي انا وجماعتي كويس .. الناس دي عايزة مصلحتنا وناوية تعطينا كام مليار دولار نفك بيها ازمة الجماعة وتساعدنا على الانتخابات الجاية .. وهى يهمها طبعا ان أغلبية المقاعد تبقى للإخوان .. ولو ربنا كرمنا ونجحنا في التزوير وبالتزوير من غير ما اللي اسمه ابراهيم عيسى ابو حمالات ينط لنا فيها ويقول ان قاعدة البيانات ملعوب في اساسها .. حنبقى كده ميت فل وعشرة وحترضى عننا قطر .. ورضا قطر من رضى الرب .. واللي تغضب منه قطر تبقى أمه داعية عليه .. دي ناوية ياولاد تشتري مننا الهرم وابو الهول بمليارات الدولارات .. تخيلوا بقى شوية حجارة لا تودي ولا تجيب لمّا نضحك بيها على قطر ونبيعها لها بالشىء الفلاني .. هى دي الشطارة .. تبيع الحجارة وشوية تراب وتاخد قصادهم ذهب .. كمان يا ولادي ويا اهلي وياعشيرتي .. اذا ربنا وفقنا وضحكنا عليهم وبعنا لهم الهرم وابو الهول ، حتحلى في عينهم وياخدوا كمان قناة السويس .. ويخلوها ولا أجمل ولا أحلى .. ويمكن بعد كده نقنعهم يشتروا البلد باللي فيها .. ونرتاح بقى من المظاهرات وجبهة الإنقاذ والمعارضة بأنواعها وناخد احنا – وانتوا طبعا – اللي فيه النصيب ونخلع م البلد دي خالص.


عشان كده ياحبايبي ويا أهلي وعشيرتي .. انتوا رايحين تلاعبوا المنتخب القطري .. وانا عارف طبعا انكم ممكن تغلبوه بدل الواحد عشرة .. لكن لأ .. انا اتشاورت مع الشاطر والمرشد في هذا الأمر وخلصنا إلى الآتي : عايزينكم مش تتغلبوا من قطر .. عايزينكم تتمسخروا ويتمسح بيكم بلاط الملعب .. لأ صحيح مفيش بلاط في الملعب .. قصدي نجيلة الملعب .. عايز اليوم ده قطر ترفع اعلامها خفاقة في السماء انها فازت على منتخب الفراعنة .. اللي حتشتري كل فراعينه بعد كده .. يعني م الأخر اللي يلاقي الكرة في رجله والجون فاضي ، يعمل نفسه انه قلش ويحطها في الاوت .. ولو حارس المرمى بتاعنا داخل عليه مهاجم قطر يعمل نفسه انه حيمسك الكورة بجد ويفوتها من بين رجليه .. عايز اقول ان الماتش ده لازم تسيبوه لقطر .. ولازم نقف معاها وندّيها ثقة في نفسها .. دي داخلة على كأس العالم 2020 .. ولازمن ولابد تعمل لها منظر وتقول انها غلبت الفراعنة وسكعتهم على قفاهم.


خلاص ياولاد .. عاهدوا الله أمامي الان على السمع والطاعة .. لن نعود من الدوحة الا وقفانا يقمر عيش ومضروبين بالجزمة القطرية ومغلوبين اقلها تلاتة.


وحرص الرئيس مرسي على توديع المنتخب القومي في المطار وأعاد عليهم بسرعة ما قاله لهم وتمنى من كل قلبه ان يعود المنتخب مهزوما مدحورا منكسرا ، موطي راسه في الأرض .. وبعد ان نجح لاعبو المنتخب المصري في تنفيذ الأوامر الإخوانية حرفيا .. وعادوا يجرون أذيال الخيبة والهزيمة استقبلهم مرسي في المطار استقبال الفاتحين ، ووعد كل واحد فيهم بحقيبة وزارية بعد ما ينجح الإخوان في الانتخابات ويبقى من حقهم يشكلوا الحكومة.


... وانا باكتب المقال دلوقتي وصلتني معلومات مؤكدة ان أمير قطر بعث برسالة شكر إلى الرئيس مرسي على حسن توجيهاته للاعبي المنتخب المصري ، مؤكدا له انه سيشتري منه فعلا الأهرامات الثلاثة وابو الهول .. اما عن قناة السويس فقد أجّل إبرام العقد لحين اخر .. طالبا من مرسي ان يبعت له تاني المنتخب القومي المصري يلعب مع قطر مباراة ودية تانية .. بس بشرط .. المرة دي تتغلبوا عشرة - صفر .. واكد عليه .. 10 - صفر .. يا مرسي .. ماهو اللي " ..... " مرة وبمزاجه .. مش حتفرق معاه بعد كده عدد المرات اللي " ... " فيها !