أحمد عفيفي يكتب: نظام يحفر قبره ب 3 ارغفة!!

مش عارف مين العبقري ابن العبقري اللي قرران كل فرد في الشعب له في اليوم 3 ارغفة عيش .. وياخدهم ببطاقة التموين او ببطاقته العائلية .. يعني يقف في طابور الفرن 5 ساعات ولمّا يوصل للشباك يلاقي نفسه نسي البطاقة في البيت .. والراجل مش راضي يصرف له حصته من العيش .. يصعب على صاحبنا ان بعد وقفته في الطابور 5 ساعات يرجع البيت من غير ولا لقمة .. يقوم يقول له : خلاص ماشي .. اديني حصتي انا .. هات 3 ارغفة وحسبي الله ونعم الوكيل فيك وفي الرئيس مرسي .. يقوم الفران الغبي يرد : برضه لازم البطاقة .. مش يمكن متكنش مصري ومندس في الطابور عشان تاخد العيش .. يخرج صاحبنا عن طوعه ويفقد اعصابه ويرد : هو انت خلاص اعمى مش شايف .. شكلي بيقولك اني امريكاني مثلا .. ولو انا مش مصري ياحمار .. ايه اللي يخليني واقف 5 ساعات عشان 3 ارغفة .. هو فيه في الدنيا حد بيقف على طوابير العيش غير المصريين الغلابة .. داهية تاخدك انت والرئيس بتاعك.

اقسم بالله العظيم اني انا كنت فاكر حكاية ال 3 ارغفة دي نكتة .. اتاريها طلعت جد .. وكمان حكاية كل واحد معاه عربية له 5 لتر بنزين في اليوم .. ولو انت مسافر اسكندرية مثلا .. ال 5 لتر دوكهما يوصلولك بالعافية لحد بنها .. تقوم واقف مكانك وتستنى لبكره في الطريق وتعبي 5 لتر كمان يوصلوك لطنطا .. وفرصة تزور السيد البدوي وتدعي ربنا هناك انه ياخد الغبي ابن الغبي اللي اخد القرار ده .. وتبات في طنطا لتاني يوم وتحط كمان 5 لتر يوصلوك لكفر الزيات .. وهكذا لحد ماتوصل اسكندرية بالسلامة بعد اسبوع .. وطبعا مش ممكن تكرر الحكاية الوسخة دي تاني وانت راجع .. تقوم تولع في عربيتك وتركب القطر وتسأل الاول .. ناوي يوصلنا ولا ناوي ع الشر وحينقلب بينا عند مزلقان قليوب؟!

عموما العيال السكّرة بتوع الفيسبوك مش بيفوّتوا حاجة الا وهاتك يا تريقة على الحكومة والنظام " المرسوي البديعي " اللي يجنن واللي غلب فؤاد المهندس في مسرحيته " انت فين وانا فين " .. طعمياية ياكفرة .. طب خليهم اتنين .. خليهم تلاتة .. عيال الفيسبوك فسّروا حكاية ال 3 ارغفة وال 5 لتر بنزين .. بأنك انت بعد ما تطفح العيش ، تشتري 5 لتر بنزين وتولع في نفسك .. وده الهدف الخبيث اللي الحكومة والنظام عايزينه .. خلال سنة لو مشينا بالطريقة دي مش حنلاقي نص الشعب المصري .. والنص التاني نفكر له في حادثة قطر او غرق سفينة ونرتاح من ميتين ابوهم .. القلق ولاد الكلب اللي ناويين يقوموا بثورة تانية يوم الجمعة.

نظام غبي .. مشفتش في غبائه اتنين .. يعني الناس طالع عين اللي خلفوها وعاصرين يجي 80 مليون لمونة عشان يبلعوك وميرجعوش اللي في بطنهم " بطنهم ايه .. هى فيها حاجة اساسا " .. تقوم انت تعمل حكاية ال 3 ارغفة دي ، وقبل يوم 25 يناير اللي جاى .. دي ايه الذكاوة دي كلها .. كأنك بتقول ياللي لسه بتشاور عقلك تنزل ولا متنزلش .. انزل والا يبقى معندكش دم .. هو ممكن اعمل فيك ايه اكتر من كده عشان تنزل وتعترض .. 3 ارغفة يا كفرة يا ولاد " الهرمة " .. ده واحد زيي باموت في العدس ابو شعرية وميكفنيش 5 ارغفة في الطقة الواحدة وقدامي طبق العدس ، لدرجة اني بطلب من مراتي كتير لو لقيتني سرحت ودخلت في السادس تنبهني عشان القولون بتاعي مايطلعش عين أمي وانا في الحمام.

طيب لو ابني مثلا ماشاء الله صحته حلوة وتخين ونفسه مفتوحة للأكل على طول .. أديله رغيف واحد في الطقة واقوله الريس مرسي أمر بكده .. الواد ساعتها حينسى اني ابوه ويقول لي : انت ومرسي بتاعك لا مؤاخذة " ... "!

.. طيب لو واحد مراته حامل .. ده بفرض مثلا انها حامل ، مع اني مش عارف ممكن تحمل ازاى وجوزها بياكل 3 ارغفة بس في اليوم .. ده لو قدر يبوس راسها بس كل خميس يبقى جدع .. لكن لنفترض انها حامل .. اللي في بطنها ده مش عايز يتغذى .. يعني كان لازم الحكومة تعمل حساب الست الحامل وتصرف لها 6 ارغفة في اليوم .. بشرط تيجي بنفسها وبطنها قدامها مترين ، واذا الفران شك في أمرها ، فمن حقه " يشلحها " احسن تكون حاطه مخدة ولا حاجة . .. والله العظيم ده اللي ناقص يحصل يا عالم تخافوا متختشوش .. صحيح اللي اختشوا ماتوا .. انما انتوا لا خشا من ربنا ولا حيا من شعبكم.

عموما مش عايزين نظلم مرسي والنظام .. هما حيعالجوا حكاية ال 3 ارغفة دي بأنهم حيصدروا قوانين " تسد نفسنا "، مش عن الاكل بس .. لأ .. عن الدنيا كلها .. ففي الحالة دي يمكن كمان نستغنى عن المعونة المرسية الرغيفية .. ياكلها هو واهله وناسه وعشيرته.. وبالنسبة للبنزين .. بلاها بنزين .. يشربوه ويجروا يعملوا تمارين رياضة ويلفوا حوالين حديقة الطفل في مدينة نصر ، ولما البنزين اللي شربوه يخلص يقفوا .. لحد ما نلحقهم بميت صفيحة بنزين 95 " مش خسارة فيهم " .. ونولع فيهم كلهم ونخلص!

هو ده النظام الغبي اللي مش عارف يستفيد من اى تجربة حصلت .. فاكر اننا اغبياء .. او سذج .. نظام مرعوب " بيعملها على نفسه " .. من الخوف والهلع من يوم الجمعة الجاية والسبت كمان .. ايوه السبت اللي المفروض حنسمع فيه النطق بالحكم على المتهمين في مذبحة بور سعيد .. يقوم النائب العام " المرسوي " يطلع لنا بحجة بليدة وغبية متدخلش على عيل لامؤاخذة " بشخة " .. قال ايه يا سيدي لقينا ادلة جديدة في حكاية المذبحة .. ياسلام .. ومين ده اللي يستحق جايزة نوبل اللي جاب الادلة دي ودلوقتي؟ .. وكانت بتعمل ايه عند اللي خلّفته من سنة فاتت ؟ .. ورئيس الوزراء المحترم .. " بتريق طبعا " .. عايز يعمل السبت اجازة رسمية عشان يبقى مفيش محكمة .. وبعدين يقوم القاضي اليوم اللي بعده يؤجل الحكم لظهور أدلة جديدة .. وملعون ابو الالتراس " الرجالة ولاد الرجالة " .. وملعون ابو امهات العيال الورد اللي اندبحوا في الاستاد .. مش متخيل البيه المحترم ان اى تأجيل في القضية دي بالذات ممكن يحرق البلد .. مش كل البلد طبعا .. يحرق النظام والحكومة والنائب العام بجاز .. هو ايه الاستخفاف المستفز ده؟ .. ما تيجي لا مؤاخذة .. " ... " أحسن .. ماهو ده اللي ناقص .. عايز تكسر عيني عشان متجرأش وارفعها في وشك .. ياخي هع وهع وهع .. انسى وخد البنسة .. واتغطى وانت نايم عشان متحلمش كتير .. ولو عايز تحلم .. احلم على قدك .. بس وحياة شنبك ودقنك حلمك ده حيبقى كابوس حتصحى منه تلاقي نفسك في بيتكم .. والبلد نضفت ورجعت لولادها تاني.

قبل ما اقفل المقال لسه شايف مقال الزميل الجميل محمد حمدي وعنوانه " وايه المشكلة في اسقاط الرئيس ؟ " .. صحيح ايه المشكلة .. زي ماقلت قبل كده في مقال لي .. مراتي ومتجوزها شرعي بس مش نافعة معايا وواخداني في سكة سودا .. اطلقها .. ولا دي كمان عايزة استفتاء شعبي " غرياني " ؟ .. عمارة اساسها بايظ .. اهدها وابني غيرها ولا افضل فيها لحد مانموت كلنا ؟ .. انا عايز اسافر أحج بيت الله ، قمت انت واخدني ل " قطر " بدل السعودية .. يا عم قطر مفيهاش حج ولا الكعبة ولا المسجد النبوي .. دي كلها امريكان .. تقوم تقوللي بس حتعجبك وتبسطك ع الاخر وحتخليلك قناة السويس اللي مرسي ناوي يبيعها بصكوكه الاسلامية فلة شمعة منورة ولا جبل على في دبي .. ياعم انا عايز أحج وادعي ربنا يخلصنا منك ومن كل عشيرتك .. تقوم ترد بلؤم " زقازيقي " : ما هو عشان كده يا ابن الناصحة مش حنوّلك غرضكّ.

وارجع لسؤال محمد حمدي : ايه المشكلة في إسقاط مرسي ؟ .. كذب علينا وحنث بالقسم الدستوري وناوي يجرنا وراه لسكة اللي يروح ميرجعش .. نسيبه يعك ولا نخلعه ؟ .. طبعا نخلعه زي ما خلعنا اللي " أجعص " منه .. محدش تاني يقوللي اصله رئيس منتخب .. بدل ما عمل له حركة .. أكيد مش حتعجبه .... بكره الجمعة .. 25 يناير .. قولوا يارب.