أحمد عفيفي يكتب: لسه الرحلة طويلة والمحطات كتيرة !!

لسه الرحلة طويلة والمحطات كتيرة .. والناس بتركب بهمومها من محطة لمحطة .. يرموا الخوف في محطة .. ويرموا الفقر في محطة .. وفي أخر الرحلة يبقوا ناس .. يبقوا ناس في أخر الرحلة.

من يجي 40 سنة وانا فاكر المسلسل الإذاعي البديع " الرحلة " الذي كتب قصته الهادىء الثائر صلاح حافظ .. " اللي ميعرفش صلاح حافظ يسأل عنه جدران مجلة روزاليوسف وتلميذه النجيب الصحفي الكبير الآن عادل حمودة " .. والكلمتين اللي بدأت بيهم .. كانوا مقدمة المسلسل بصوت المبدعة دائما أبدا فاتن حمامة .. وبيلخصوا الحكاية كلها ، واللي عايز يقوله صلاح حافظ .. وخد بالك من الكلمتين دول .. وفي أخر الرحلة يبقوا ناس.. يبقوا ناس في أخر الرحلة .. بعد ما يكونوا رموا خوفهم وفقرهم وذلهم وكبتهم .. محطة بعد محطة.. عشان في الأخر يبقوا ناس .. بني ادمين .. مش حيوانات.

إيه معنى الكلام ده ؟ .. وإيه مناسبته دلوقتي؟.. ماحنا رمينا الخوف خلاص ورمينا انكسارنا وذلة النفس وقمنا بالثورة .. بس لسه الثورة منجحتش .. ولسه الفقر معشش في بيوتنا وفي نفوسنا .. وحيزيد طول ما الإخوان بيحكموا ويتحكّموا .. واللي اتعمل فيهم في 60 سنة ، حيعملوه فينا احنا .. حيضربونا بالجزم وحيسجنونا ويطلعوا " دين أبونا " .. ايوه " دين ابونا " احنا .. انما هما لا لهم ملة ولا لهم دين .. اللي فاكر انهم زي نظام مبارك يبقى بيحلم .. مبارك مشي في 18 يوم بعد ماكبس على نفسنا 30 سنة .. والإخوان مش ناوين يسيبوا البلد الا على جثثنا احنا .. مش على جثثهم .. حيعملوا بلاوي سودا .. في يومين بس قتلوا اكتر من خمسين في بور سعيد والسويس.. عادي .. ايه المشكلة .. لك شوق تقول حاجة ؟ .. سمّعني كده صوتك.. لأ مش سامع .. زعّق اكتر عشان اسمعك واخرسك واقطع لسانك ولسان اللي جابوك ..

قالها لي صديق عزيز هنا في الكويت اسمه يوسف عبد الرحمن.. صحفي كويتي كبير وله شأن .. وانا بتكلم معاه قبل 25 يناير 2013 بيوم واحد .. أمني نفسي بعيد حقيقي للثورة بعد سنتين.. عيد اشوف فيه مصر حرة بجد .. غنية بناسها وعقولها وبأرضها وبخيرها .. اشوفها مصر زي ماهى .. زي ما ربنا خلقها .. إيمانها في قلبها .. " مش في دقنها " .. تصلي وتصوم وتبكي وهى بتقرا قرآن .. وبتبكي برضه وهى بتسمع ام كلثوم بتغني .. " القلب يعشق كل جميل.. وياما شوفتي جمال يا عين .. واللي صدق في الحب قليل .. وان دام يدوم يوم ولا يومين.. واللي هويته اليوم .. دايم وصاله دوم .. لا يعاتب اللي يتوب .. ولا في طبعه اللوم .. واحد مفيش غيره .. ملا الوجود نوره .. دعاني لبيته لحد باب بيته.. واما تجلّى لي .. بالدمع ناجيته .. بالدمع ناجيته".

يبكوا لمّا يسمعوا كلام الرسول عليه الصلاة والسلام لربنا : اللهم اشكو اليك ضعف قوتي وقلة حيلتي وهواني على الناس .. هما هما اللي بكوا برضه على " ماما نونة " لمّا ماتت في المسلسل الشهير " حمادة عزو" .. هما كده .. طبيعة اللي خلقهم كده.. مش حتتغير .. لا بحكم إخواني ولا بحكم سلفي ولا بالعفاريت الزرق.. يعني عايز اقول مش عشان غاويين طرب وموسيقى ومسلسلات يبقوا كفرة .. وكل الحاجات دي ما اخدتهمش من صلاتهم ولا صومهم ولا اشتياقهم ولهفتهم لزيارة بيت ربنا ومسجد رسوله الكريم .. يعني بنعرف ربنا اكتر ما بيعرفوه الإخوان .. مش زيهم بالكلام والحديت والرغي .. والصلاة في المسجد على الهواء مباشرة .. ولا في الرايحة والجاية نقول زيهم قال الله وقال الرسول .. بس عارفين ربنا قال ايه ورسوله قال ايه .. ربنا قال " كبر مقتا عند الله ان تقولوا ما لاتفعلون " .. تصدقوا على أد ما مرسي في كل خطبه بيستشهد بآيات قرآنية .. عمري ما سمعته بيقول الآية دي .. " كبر مقتا عند الله ان تقولوا ما لاتفعلون " .. لأنه لو قالها في اى مناسبة يمكن ربنا يخرس لسانه في لحظتها .. مش حيعرف يقولها .. ولا يقدر يقولها .. هو عارف انه بيضحك علينا احنا .. لكنه لا يجرؤ انه يضحك على ربنا ويغالطه .. لأنه عارف انه يكذب .. والدين عنده " مسيّس " استعمله لمصلحتي ومصلحة جماعتي والعب بيه ع الناس واقولهم " نعم " تودي الجنة و" لا " تودي النار .. غير كده ما يلزمنيش الدين ده .. ويوم الحساب " يوم يقول الكافر يا ليتني كنت ترابا " يحلها ربنا.. احنا فييين واليوم ده فيين .. احيني النهارده وموّتني بكره .. ونسي أخر أية في سورة الوقعة " واما ان كان من كان من المكذبين الضالين فنزل من حميم وتصلية حجيم ان هذا لهو حق اليقين فسبح باسم ربك العظيم ".

ارجع لصديقي الكويتي يوسف عبد الرحمن اللي قال لي : حسني مبارك حكم مصر كام سنة .. مش 30 .. حكم الإخوان .. اضرب في اتنين.

فقلت له جادا ومازحا : مش معانا احنا .. مش مع الشعب المصري

فرد : كل شىء ممكن .. بس الدم حيبقى كتير .. كتير اوي يا ابن عفيفي.

وصدق الرجل .. في يوم واحد اتقتل 50 .. ومرسي بيعزّي من على حسابه الشخصي في تويتر ومتأثر أوي يا حبة عيني .. مكنش عايز دم .. وهو اللي بجد بجد عايزها برك من الدم .. عايزنا نخاف ونكش .. عايزنا نرضي بالأمر الواقع على دماغنا لمّا فلقها نصين .. وزي ماسرقوا من محمود يس الهرم في فيلم " وقيدت ضد مجهول " .. هو وجماعته عايزين يسرقوا مننا كلنا البلد .. وياريت عشان يقعدوا فيها لوحدهم .. المصيبة السودا .. ناويين يبيعوها .. حتة لقطر وحتة لحماس والباقي نفتح المزاد ... الا اونا .. الا دو .. الا ثري .. مين يزوّد .. بلد خيرها يغرق العالم .. مين يشتري؟ .. بلد ناسها عقولها دهب .. مين يدفع اكتر؟ .. ومش حينسوا وهما بيبعوها انهم يأكدوا عشان تحلى في عين اللي حيشتري ان ربنا ذكر اسمها في كتابه الكريم.

مش بقولكم .. لسه الرحلة طويلة والمحطات كتيرة .. لكن أخرها لازم نبقى ناس .. نبقى ناس في أخر الرحلة.