سلام عليكم، حقيقي إنتم موقع هايل، وبتفيدوني، وأنا بعت لكم قبل كده وأفدتوني فعلاً؛ بس أنا دلوقتي فيه مشكلة مضايقاني، يا ريت تساعدوني برضه فيها. أنا من أول يوم ليّ في الدراسة اتعرفت على واحد، هو إنسان محترم جداً وإحنا كنا أصحاب جداً وعاملته زي أخويا بالضبط، وفعلاً هو حد كويس جداً وبيحترمني جداً وبيخاف عليّ جداً.
إحنا دلوقتي خلّصنا؛ يعني أعرفه بقالي خمس سنين؛ لكن هو من أول يوم كان واضح إنه بيحبني؛ بس أنا مش بارتبط بحد، وهو عارف كده؛ لكن من سنة كلمني في موضوع ارتباط، وأنا قلت له إننا أصحاب وإخوات، وكنت متضايقة أوي لا أخسره؛ لكن الحمد لله بعد كام يوم رجع معايا زي الأول كويس، وأنا كمان بصراحة بعد ما قال لي ما اقدرش أبعد عنه لأنه غالي عندي جداً؛ لكن دلوقتي أنا حاسة إنه بيحبني أكتر من الأول، وأنا كمان ساعات بافّكر إذا كنت فعلاً بحبه ولا هو زي أخويا وبس؛ لكن مش عارفة بس أنا بتضايق لما ألاقيه بيكلم حد أو بيسلم على حد من أصحابنا، وباحس إننا قريبين أوي وإنه بيفهمني أوي، وبيخاف عليّ أكتر ما أنا أخاف على نفسي.
لكن هو ظروفه لسه مش أوي، وبيكوّن نفسه، وطبعاً أهلي مش يرضوا بحاجة زي دي؛ على الرغم من إنهم عارفينه وبيعِزوه، وكمان أنا مش عارفة لو اتخطبت أقول له إزاي لو ده حصل، يبقى أنا خسرته نهائئياً أنا مش عارفة أتصرف معاه إزاي أو أعمل إيه يا ريت تفيدوني بجد.