السلام عليكم.. أنا عمري 23 سنة حبيت شخص وارتبطت بيه، هو غاية في الأخلاق وكانت العلاقة بيننا الحمد لله كويسة جدا، هو إنسان متفهم جدا وعاقل فيه كل شيء أي بنت تتمناه إلا حاجات طبعا بسيطة لأن مافيش حد كامل.. وطبعا كنا متفقين على الجواز بس يظبط أموره في الشغل الأول علشان يتقدم وهو مرتاح.. المشكلة بقى مش كل ده ومش بينا؛ المشكلة إن هو كان يعرف واحدة وفضل معاها فترة مش قصيرة بس سابها لأنه عرف عنها حاجات وحشة واكتشف إنها مش مناسبة له من عدة جهات.. بس هو كل ما كان بيبعد عنها كانت بتطلع له ووقت ما إحنا عرفنا بعض هو كان سايبها من فترة وهو أكدلي كده وأنا صدقته وأكد لي كمان إنه قطع أي طرق اتصال بينهما، وفجأة البنت دى بعتت لي رسالة على فيسبوك بتاعي قالت لي حاجات عني كانت حصلت في نفس اليوم ده هي عرفتها منه.. وكلامها طبعا كله استفزاز وقلة أدب غير إن البنت دي فعلا مش كويسة، واللي حصل إن أنا ما قلتلوش على حاجة خالص من اللي هي قالته، أنا بس سألته إنت لسه بتكلمها حلف لي وقال لي لأ، بس قال إنها اتصلت بيه وكانت بتطلب منه يشوفوا بعض.. بس أنا متأكدة إن في حاجة حصلت أكبر من إنها تكون مجرد اتصال بينهم، وبعدها أنا طلبت منه إني مش عايزة أشوفه ولا أسمع صوته تاني، وهو طلب مني إنه يفهم فيه إيه، بس أنا رفضت ده وانقطعت الاتصالات بينا.. ولغاية دلوقتي أسبوع ومافيش أي محاولة منه لأي حاجة، أنا بقى فعلا تعبانة أوي من غيره؛ لأني بحبه جدا وهو كويس جدا بس هي ربنا يهديها هدمت كل شيء، كلامها مش بيدل غير على إنها إنسانة مريضة أنانية رافضة إنها تشوفه مبسوط وسعيد مع أي واحدة تانية غيرها، لأنها برضه عملت نفس القصة دي مع بنت تانية هو كان خاطبها قبلي وسابوا بعض برضه بسببها.. أنا بقى دلوقتي محتارة هل أرجع أكلمه تاني وأفهمه إيه اللي حصل، وأشوف رده إيه عليّ وأحكم، ولا خلاص كده وأقول هو ميحاولش معايا تاني؟.