محترم وبتاع بنات.. وقال لي "بحبك"

مشكلتي باختصار إني اتعرفت على شاب محترم جدا، ومتدين، ومن عائلة محافظة.. كنت وقتها في ثانوية عامة، وهو كان بيدرس في سنواته الأولى بإحدى كليات القمة.

كان كل يوم بيتصل ويكلمني كلام عادي يتطمن على أخباري وكده، لغاية ما في يوم قال لي إنه بيحبني ونفسه يكمّل معايا.. فأنا طبعا صدّيته، وقلت له إن ده مش وقته، قال لي إنه عارف كده ومستعد يستناني.. وبعدين راح حكى لأختي على اللي حصل، وهي طبعا أيّدت موقفي.

فضلت أكلمه عادي، ومانكرش إن مشاعري كانت جميلة من ناحيته، واللي ساعد أكتر إن ماكانش فيه شيء يمنع ارتباطنا في المستقبل؛ فإحنا الاتنين مستوانا الاجتماعي والمادي كويس جدا، والحمد لله.

المهم سمعت عنه كلام مش كويس؛ ملخصه إنه بتاع بنات وبيحب يرتبط كتير أوي؛ بمعنى أصح "مراهق".

طبعا ماواجهتهوش لأن مافيش حاجة تربطني بيه؛ بس قطعت علاقتي بيه، وماعدتش باكلمه، ومسحته من كل حياتي، وهو عرف وحاول يتكلم معايا ويفهم أنا باعمل كده ليه؛ بس أنا رفضت.

واتخرجت أنا وهو من نفس الكلية، وطبعا بنشوف بعض في اليوم أكتر من 50 مرة.. حاليا بنتكلم في الشغل، وحفلات الكلية، والندوات؛ فلاقيته بيتعامل برسمية.

أنا فعلا لسه بحبه؛ بس هو فعلا بيرتبط ببنات كتير، وكل ما يسيب واحدة يرجع لي تاني.

أنا عارفة إنه بيفكر بمبدأ: "لما أتجوز أتجوز واحدة زي دي (اللي هو أنا)"؛ بس أنا رافضة المبدأ ده.

وبقى بيتعمد يقف مع بنات جنبي لما يشوفني واقفة في الكلية.

أنا فعلا بازعل جدا، وحاسة إني لسه متعلقة بيه، ومش عارفة أعمل إيه، نفسي أسأله سؤال واحد: إنت راضي عن نفسك بالشكل ده؟

هو بجد محترم؛ بس بيوصلني عنه كلام مش ظريف.. أواجهه ولا أعمل إيه؟

Fantastic eyeoon


لو عايز تفضفض لنا دوس هنا