بالفيديو والصور.. اعملي بإيدك أجمل أشكال للتورتات لكل المناسبات

أهلا بكل بنات "قمر 14".. النهارده حلقتنا هتكون مختلفة تماما، بمناسبة إن رمضان والعيد خلاص على الأبواب والمناسبات الحلوة هتكون أكتر، هنتكلّم عن التورتات، ونعلّمك إزاي تعملي بإيدك أجمل أشكال التورتات والكب كيك اللي بتشوفيها في المناسبات بإمكانيات مصرية غير مكلّفة، وهتكون معانا ومعاكم خبيرة الحلويات "هند غنام" اللي هتقول لنا كل تفاصيل موضوعنا النهارده...

جرّبي في المناسبات تعملي التورتات بأشكال جديدة وتهادي بيها أصحابك وأقاربك، وهتشوفي قد إيه الحاجة لما بتكون من صنع إيدك بيكون لها شكل وذوق مختلف؛ خصوصا لمّا تكون مناسبة عزيزة عليكي؛ سواء كانت عيد ميلاد أو فرح أو أي مناسبة حلوة؛ لأن الحلويات بتكون الشيء المميز الموجود واللي بيلفت نظر الموجودين، علشان كده جرّبي تعملي أفكار جديدة للكب كيك والتورتات والحلويات من وحيك وإبداعك وبتكلفة أقل.

إضغط لمشاهدة الفيديو:
عجينة الكيك والتورتات بتبقى نوعين؛ إمّا عجينة أسفنجية وبتكون خفيفة وصحية، أو عجينة دسمة ودي بتستخدمي فيها زبدة، وبتكون دسمة إلى حد ما، والاتنين بيدّوا نفس النتيجة.
بالنسبة لتزيين التورتة أو الكب الكيك، تقدري تستخدمي عجينة السكر (الفندام)، ودي بتلاقيها متوفرة عند أي حد بيبيع خامات الحلواني، وبيكون لونها أبيض، وممكن تلوّنيها بألوان صحية علشان تدّيكي شكل أجمل، وطريقة استخدامها بتكون بسيطة، وهي إنك تغطّي بها الكيك، وتستخدمي قطع منها وتعمليها على هيئة أشكال وتزيّنيها.
الكيكة الإسفنجية
المقادير:
250 جرام دقيق
كيس بيكنج بودر
250 جرام سكر
كيس فانيليا
8 بيضة
الطريقة:
1- اضربي السكر مع البيض والفانيليا في المضرب جيّدا لمدة ربع ساعة.
2- ضيفي على الدقيق البيكنج بودر وحطّيهم على خليط البيض والسكر، وقلّبيهم بمعلقة باتجاه من تحت لفوق، وحطّيها في صينية مدهونة زبدة ورشة دقيق، ودخليها الفرن على درجة حرارة 170.
3- لو عاوزاها شيكولاتة استبدلي 3 ملاعق دقيق ب3 ملاعق كاكاو.
طريقة عجينة السكر:
1- هاتي العجينة وافرديها بالنشّابة وغطّي بيها الكيك، ولو عاوزة تلوّنيها اخلطي الألوان مع العجينة وافرديها.
2- ممكن تشكّلي بالعجينة أشكال قلوب أو ورد، وتزيّني بيها الكيك.

إضغط لمشاهدة الفيديو:
جرّبي تستغلي أفكارك وأشكال الكيك اللي بتعمليها، وتعملي مشروع خاص بيكي، وتقدّمي من خلاله أفكارك الجميلة والمختلفة.
ودي شوية نصائح هتفيدك:
1- خلّي عندك الجرأة بأنك تقدّمي أفكارك وتكوني مقتنعة إنها هتعجب اللي معاكي، علشان ثقتك هتظهر في أفكارك وشغلك.
2- الخامات الموجودة ممكن تلاقيها عند أي حد بيبيع خامات الحلواني وبيكون سعرها بسيط ورمزي.
3- استخدمي القطاعات اللي على هيئة أشكال علشان تساعدك في تزيين الكيك بشكل أجمل.

إضغط لمشاهدة الفيديو:
اعملي بإيدك أجمل أشكال للتورتات لكل المناسبات
* صحة وجمال
اضغط على الصورة لمشاهدة الجاليري:
وبكده بتكون خلصت حلقتنا النهارده..
يا رب تكونوا اتعلّمتم واستفتدتم..
ابعتوا لنا وقولوا لنا رأيكم..
سلااااااااام،،،